Read Batak Toba PANGUNGKAPON 17 Bible Online

PANGUNGKAPON 17 - Batak Toba bible

PANGUNGKAPON 17

¹Dung i ro ma sada sian na pitu surusuruan, na umpeop saoan na pitu i, mangkatai dohot ahu, didok ma: Ro ma, hupatuduhon ma tu ho uhum na tu boruboru na jahat, na balga, na hundul di topi ni angka aek godang! [229†]

²Donganna marmainan do angka raja na di tano i, jala naung gabe mabuk do pangisi ni tano i dibahen anggur parmainanonna i. [230†]

³Jadi diluahon ma ahu di bagasan tondi tu halongonan. Jadi huida ma sada boruboru hundul di atas binatang na rara, na gok goar panginsahion, pitu do uluna, sampulu tandukna. [231†]

⁴Haen na rara dohot haen hasumba do abit ni boruboru i, na nilampisan dohot sere nang mata intan dohot mutiha; ditiop do di tanganna panginuman sere na gok hagigian dohot hahodaron sian parmainanonna i. [232†]

⁵Na tarsurat do di pardompahanna goar hahomion: Babel na balga, ina ni angka parmainan dohot angka hagigian na di tano on. [233†]

⁶Jadi huida boruboru i mabuk, dibahen mudar ni angka na badia dohot mudar ni angka sitindangi ni Jesus, gabe longang situtu ma rohangku marnidasa. [234†]

⁷Gabe didok surusuruan i ma mandok ahu: Boasa longang roham? Hupaboa ma tu ho hahomion ni boruboru on dohot binatang na mangusung ibana, na marulu pitu jala martanduk sampulu.

⁸Ia binatang na niidami, na mangolu do i najolo, ndang mangolu be nuaeng, na nangkok ma i muse sian banua toru, asa laho tumopot hamagoan. Gabe longang ma roha ni pangisi ni tano on, nasa na so tarsurat goarna di buku hangoluan na sian mula ni hasiangan on, di na idaonnasida binatang i, naung mangolu najolo jala ndang mangolu be nuaeng, gabe ro muse. [235†]

⁹On do lapatanna na marhabisuhon: Na pitu ulu, i ma pitu dolok, na hinundulan ni boruboru i, jala pitu raja do i. [236†]

¹⁰Nunga pesan na lima, disi dope na sada, ndang dope ro na sada nari; jala dung ro, satongkin sambing ibana mian.

¹¹Ia binatang na mangolu najolo, gabe ndang mangolu be, i do na paualuhon; laos sian na pitu ondeng do ibana, jadi na laho tumopot hamagoan.

¹²Ia na sampulu tanduk na niidami, sampulu raja do i, na so manjalo dope harajaon, alai jaloonnasida do huaso mangarajai sangombas, rap dohot binatang i. [237†]

¹³Saroha ma nasida, lehononnasida do gogo dohot huasonasida tu binatang i.

¹⁴Na marmusu ma nasida dompak Birubiru i, gabe taluhonon ni Birubiru i ma nasida, ala Ibana Tuhan ni angka tuan jala Raja ni angka raja; ia angka donganna, i ma angka na tarjou, angka na tarpillit jala haposan. [238†]

¹⁵Dung i didok ma tu ahu: Ia angka aek na niidami, inganan ni boruboru na jahat i, i ma angka bangso, angka punguan bolon, angka marga dohot hata. [239†]

¹⁶Ia tanduk na sampulu, na niidami, dohot binatang i, hosomannasida ma boruboru na jahat i, lungunan ma bahenonnasida ibana jala marsaemara, allangonnasida ma sibukna, jala tutungonnasida ma ibana tu api. [240†]

¹⁷Ai dipahehe Debata do rohanasida pasauthon tahina hian, mangulahon hasadaon ni roha, mangalehon harajaonnasida tu binatang i, paima saut angka hata ni Debata. [241†]

¹⁸Ia boruboru na niidami, i ma huta na balga, na mangarajai angka raja na di tano on.