Read Batak Toba PANGUNGKAPON 21 Bible Online

PANGUNGKAPON 21 - Batak Toba bible

PANGUNGKAPON 21

¹I. [1] Dung i huida ma banua ginjang na imbaru dohot tano na imbaru, ai nunga salpu banua ginjang na parjolo dohot tano na parjolo i; laut i pe ndang adong be. [297†]

²Jala huida ma huta na badia i tuat sian banua ginjang sian Debata, i ma Jerusalem na imbaru, na pinature songon oroan na sinanggulan mandapothon harajaanna. [298†]

³Jadi hubege ma soara na gogo sian habangsa i, na mandok: On do joro ni Debata di tongatonga ni angka jolma; na maringanan ma Ibana di tongatonganasida, jala nasida ma bangsona, jala Debata sandiri saor tu nasida! [299†]

⁴Jadi apusan ni Debata ma nasa iluilunasida sian matanasida: Ndang adong be hamatean nang arsak ni roha; nang angguhangguk, nang na hansit, ndang disi be; ai nunga salpu na parjolo i! [300†]

⁵Dung i didok na hundul di habangsa i ma: Ida ma, saluhutna do hupaimbaru! Jadi didok ma: Surathon ma i, ai haposan do angka hata on jala na sintong! [301†]

⁶Laos didok ma tu ahu: Nunga saut! Ahu do Parjolo jala Parpudi, Bonana jala Ujungna. Lehononku ma tu na mauas sian mual aek hangoluan i, so pola tuhoron! [302†]

⁷Teanon ni na monang i ma saluhutna; jala Ahu gabe Debatana, ibana gabe anakku! [303†]

⁸Alai angka na mandele jala na so porsea jala angka na ramun ro di angka pamunu dohot parmainan dohot angka na sumomba ajiajian ro di saluhut pargabus manjalo tohapna di laut na gor api dohot barerang, i ma hamatean na paduahon i! [304†] II.

⁹Dung i ro ma sada sian na pitu surusuruan i, naung maniop saoan na pitu, angka na marisi haporsuhon parpudi na pitu i, didok ma mandok ahu: Ro ma tuson; hupatuduhon ma tu ho oroan i, soripada ni Birubiru i! [305†]

¹⁰Jadi diboan ma ahu di bagasan tondi tu dolok na balga jala na timbo, dipatuduhon ma tu ahu huta na badia, i ma Jerusalem, tuat sian banua ginjang, sian Debata. [306†]

¹¹Hasangapon sian Debata do di huta i. Ia sondangna tudos do tu mata intan na ummarga, songon batu Jaspis na marhillong. [307†]

¹²Balga jala timbo do parik ni huta i, sampuludua do harbanganna; sampuludua surusuruan do di atas harbanganna; ia goar angka na sinuratan disi, i ma goar ni marga Israel na sampuludua i. [308†]

¹³Tolu harbangan sian habinsaran, tolu sian utara, tolu sian dangsina, tolu sian hasundutan.

¹⁴Sampuludua do batu ojahan ni parik ni huta i; disi do na sampuludua goar ni na sampuludua apostel ni Birubiru i. [309†]

¹⁵Ditiop na mangkatai dohot ahu do sada tungkot sere, asa suhatonna huta i dohot angka harbanganna ro di parikna. [310†]

¹⁶Na maropatsuhi do hapeahan ni huta i, dos do bohangna dohot unjurna. Jadi disuhat ma huta i marhitehite tungkot i; dapot ma saribu limaratus paal: Dos do unjurna dohot bohangna dohot timbona. [311†]

¹⁷Laos disuhat ma parikna, saratus opatpulu opat asta; suhatsuhat ni jolma do na di surusuruan i.

¹⁸Sian batu Jaspis do parik i dipauli, jala sere na pinapita do huta i songon sorminan na tio.

¹⁹Dipajeges do angka ojahan ni parik ni huta i marhitehite ragam ni batu na arga: Ia ojahan na parjolo batu Jaspis do, ia na paduahon Sapir, na patoluhon Kalkedon, na paopathon batu Samarados. [312†]

²⁰Ia na palimahon batu Sardonik, na paonomhon Sardion, na papituhon Krisopras, na paualuhon Berillos, na pasiahon Topasion, na pasampuluhan Krisopras, na pasampulusadahon Hiakintos, na pasampuluduahon batu Ametistos.

²¹Ia na sampuludua harbangan i sampuludua mutiha do; ganup harbangan sian sada mutiha. Ia alaman ni huta i sere na ias do, songon sorminan na tio. [313†]

²²Ndang adong huida joro di bagasan huta i, ai Tuhan Debata, Sigomgom saluhutna, do jorona rap dohot Birubiru i.

²³Ndang ringkot di huta i mata ni ari manang bulan, asa sondanganna; ai hasangapon ni Debata do patiurhonsa, Birubiru i do panondangna. [314†]

²⁴Na mardalani ma angka bangso di bagasan sondangna; boanon ni angka raja ni tano on ma hasangaponnasida tusi.

²⁵Ndang na hinsu harbanganna manipat ari, ai ndang masa disi borngin. [315†]

²⁶Jadi boanonnasida ma hasangapon dohot hamuliaon ni angka bangso tubagasan huta i. [316†]

²⁷Na so tupa masuk tu huta i nasa na ramun, nang siula hagigian dohot gabus, nda holan angka naung tarsurat di buku hangoluan na di Birubiru i. [317†]