Read Batak Toba PANGUNGKAPON 6 Bible Online

PANGUNGKAPON 6 - Batak Toba bible

PANGUNGKAPON 6

¹Dung i huida ma, diungkap Birubiru i ma sada sahap sian na pitu i, jadi hubege ma sada sian parngolu na opat i marsoara songon ronggur mandok: Ro ma ho! [80†]

²Dung i hubereng, jadi adong ma hoda sihapaspili; na marsior do na mangkunduli hoda i, dilehon do tu ibana tumpal, laos borhat do ibana marhamonangan, asa monang. [81†]

³Jadi dung diungkap sahap paduahon, hubege ma parngolu paduahon mandok: Ro ma ho!

⁴Dung i ruar ma hoda na asing, na rara songon api; dilehon ma tu na mangkunduli hoda i huaso mambuat dame sian tano on, asa masiseatan, laos dilehon ma podang na balga tu ibana.

⁵Jadi dung diungkap sahap patoluhon, hubege ma soara ni parngolu patoluhon mandok: Ro ma ho! Jadi huida, adong ma hoda sada na birong; ditiop na mangkunduli hoda i do sada dasing di tanganna. [82†]

⁶Jadi hubege do songon soara di tongatonga ni na opat parngolu i mandok: Sasolup eme sahupang, jala tolu solup eme na rara sahupang; ia miak dohot anggur, unang hahua! [83†]

⁷Jadi dung diungkap sahap paopathon, hubege ma soara ni parngolupaopathon mandok: Ro ma ho!

⁸Jadi hubereng, gabe adong ma hoda sada silansat; ia goar ni na mangkunduli hoda i, hamatean do, jala mangihut do tu ibana banua toru; jadi dilehon do di nasida huaso tu saparopat ni pangisi ni tano on, mamusa nasida marhitehite podang dohot haleon dohot hamatean hian nang marhitehite binatang angka na di tano on. [84†]

⁹Jadi dung diungkap sahap palimahon, huida ma ditoru ni langgatan i tondi ni angka naung sineat, ala ni hata ni Debata dohot ala ni pangkatindangkonnasida. [85†]

¹⁰Na marsoara na gogo do nasida manjoujou, angka ninna ma: Sadia leleng nari, ale Tuhan na badia jala na sintong, asa manguhumi Ho jala mangaluluhon mudarnami tu angka na mangingani tano i? [86†]

¹¹Gabe dilehon ma tu ganup nasida abit na saksak, jadi didokkon ma nasida maimaima sangombas nari, paima tumpu nang angka dongannasida naposo, angka hahaangginasida, angka sipusaon dope songon nasida. [87†]

¹²Jadi huida, dung diungkap sahap paonomhon: Masa ma lalo bolon, gabe mamirong ma mata ni ari songon harung hori, jadi sandok bulan i songon mudar. [88†]

¹³Jala mardekdehan ma bintang angka na di langit i tu tano, songon di hau antajau, na mameuthon parbuena, ia jumpa hinutur ni alogo na gogo. [89†]

¹⁴Jadi dibalun ma langit i songon surat na binalun, meret ma nasa dolok dohot pulo sian inganannasida.

¹⁵Gabe martabuni ma angka raja ni tano on dohot angka na sangap, angka induk ni soldadu, angka na mora dohot angka na gogo, angka anak somang nang angka anak mata: Martabuni be ma tu angka liang dohot batu na di dolok. [90†]

¹⁶Gabe didok nasida ma tu angka dolok dohot batu: Tinggang i jala hungkupi hamu ma hami maradophon bohi ni na hundul di habangsa i dohot maradophon rimas ni Birubiru i! [91†]

¹⁷Ai nunga ro ari ni rimasnasida na balga i; tung ise tartahan i? [92†]