Read Batak Toba 1 SAMUEL 12 Bible Online

1 SAMUEL 12 - Batak Toba bible

1 SAMUEL 12

¹I. [1] Dung i ninna si Samuel ma tu sandok Israel: Ida ma, nunga hutangihon soaramuna taringot tu saluhut na pinaboamuna tu ahu, jala nunga hupabangkit sada raja di hamu. [115†]

²On pe, ida ma, rajai ma manguluhon hamu; nunga sarimatua ianggo ahu jala ubanon, ia angka anakku, ida ma, di tongatongamuna do nasida, jala ahu manguluhon hamu sian sidakdanakonku rasirasa sadarion.

³Ida ma, dison do ahu, maralus ma hamu dompak ahu di adopan ni Jahowa dohot di adopan ni raja naung miniahanna: Tung dung ma hubuat lombu ni manang ise, manang halodena, tung dung ma hurupa manang ise, manang hubahen gogo tu manang ise, manang manjalo sisip ahu sian tangan ni manang ise, tung hupapitpit matangku mida ibana? Asa hupasuang nuaeng tu hamu. [116†]

⁴Dung i ninna nasida ma: Ndang dung mambahen gogo ho tu hami, jala ndang dung dirupa ho hami, jala ndang dung manjalo agia aha ho sian tangan ni manang ise.

⁵Jadi ninna si Samuel ma tu nasida: Ingkon Jahowa ma sitindangi dompak hamu sadarion, sitindangi dohot raja naung miniahanna, paboa na soadong jumpang hamu agia aha di bagasan tanganku! Sitindangi ma tutu, ninna bangso i. II.

⁶Dung i ninna si Samuel ma tu bangso i: Jahowa tongon naung pabangkit si Musa dohot si Aron, jala naung manogihon ompumuna ruar sian tano Misir.

⁷Antong pajonok hamu ma jongjong tuson, asa hupasingot hamu di jolo di Jahowa taringot tu saluhut denggan basa ni Jahowa angka na binahenna tu hamu dohot tu ompumuna i.

⁸Dung sahat si Jakkob tu Misir, mangangguhi ma angka ompumuna tu Jahowa, gabe disuru Jahowa ma si Musa dohot si Aron, asa ditogihon nasida ompumuna i ruar sian Misir, jala dipahundul nasida di inganan on. [117†]

⁹Alai dung dihalupahon nasida Jahowa, Debatanasida i, gabe dipasahat Ibana nasida tu tangan ni si Sisera, partogi ni parangan di Hazor, dohot tu tangan ni halak Palistim, dohot tu tangan ni raja sian Moab, angka na marmusu dompak nasida. [118†]

¹⁰Jadi mangangguhi ma nasida tu Jahowa, angka ninna do: Nunga mardosa hami, tung hutadingkon hami Jahowa, jala huoloi hami angka Baal dohot Astarot; on pe sai palua ma hami sian tangan ni musunami, asa huoloi hami Ho. [119†]

¹¹Jadi disuru Jahowa ma si Jerubbaal dohot si Bedan dohot si Jepta dohot si Samuel, asa dipalua hamu sian tangan ni musumuna i humaliang, asa sonang hamu maringan. [120†]

¹²Alai dung diida hamu si Nahas, raja ni halak Amon ro mangalo hamu, gabe didok hamu tu ahu: Ndada ho, ingkon adong raja sada mangarajai hami, hape Jahowa, Debatamuna do nian Rajamuna i. [121†]

¹³On pe, ida ma, indi raja na pinillitmuna i, na pinangidomuna i, jala ida ma, nunga dilehon Jahowa raja sada tu hamu. [122†]

¹⁴Molo dihabiari hamu Jahowa, jala dioloi hamu Ibana, jala ditangihon hamu soarana, jala ndang dialo hamu hata ni Jahowa, jala rap nang hamu, nang raja na mangarajai hamu mangihuthon tu Jahowa Debatamuna i, jadi dongananna ma hamu.

¹⁵Alai molo so ditangihon hamu soara ni Jahowa, jala dipaaloalo hamu hata ni Jahowa, jadi tangan ni Jahowa ma mangalo hamu, songon naung nialona angka ompumuna i.

¹⁶Antong pajonok hamu ma jongjong tuson, jala ida hamu ma hata na balga on, sibahenon ni Jahowa di adopanmuna.

¹⁷Nda masa do nuaeng gotilon eme? Joujou ma ahu annon tu Jahowa gabe paroonna ma ronggur dohot udan, asa tung ditanda jala diida hamu godang ni hajahatonmuna, naung binahenmuna di adopan ni Jahowa, laho mangido raja sada di hamu. [123†] III.

¹⁸Jadi joujou ma si Samuel tu Jahowa, gabe diparo Jahowa ma ronggur dohot udan sadarina i. Jadi mabiar situtu ma sandok bangso i mida Jahowa dohot mida si Samuel. [124†]

¹⁹Dung i ninna sandok bangso i ma tu si Samuel: Sai tangiangkon ma angka naposomon tu Jahowa Debatam, asa unang mate hami, ai hutambai hami do tu saluhut dosanami na sai laon hajahaton on na mangido di hami sada raja.

²⁰Jadi ninna si Samuel ma tu bangso i: Unang hamu mabiar! Nunga tutu dibahen hamu saluhut hajahaton on, asal unang manimbil hamu sian Jahowa, sai oloi hamu ma Jahowa sian nasa rohamuna.

²¹Jala unang manimbil hamu mangihuthon tu na so marguna, na so tarbahen mangurupi manang paluahon hamu, ai tung na so marguna do angka ajiajian. [125†]

²²Ai ndang tagamon tadingkonon ni Jahowa bangsona ala ni Goarna na timbul i, dung sapala dihalomohon Jahowa mambahen hamu gabe bangsona. [126†]

²³Ahu pe antong, dao ma i sian ahu, tung mardosa dompak Jahowa, tung mansohot tumangiangkon hamu, sai podahononku do tu hamu dalan na denggan dohot na tigor i. [127†]

²⁴Asal dihabiari hamu Jahowa, jala dioloi hamu Ibana di bagasan hasintongan sian nasa rohamuna; ai ida hamu ma godangna i naung binahenna tu hamu. [128†]

²⁵Alai molo didatdati hamu mambahen na jat, rendep ma nang hamu, nang rajamuna i bahenonna.