Read Batak Toba 1 SAMUEL 13 Bible Online

1 SAMUEL 13 - Batak Toba bible

1 SAMUEL 13

¹I. [1] Dung salpu sataon hinarajahon ni si Saul, tole paduataonhon mangarajai Israel.

²Jadi dipillit si Saul ma di ibana tolu ribu halak sian Israel; dua ribu sian i dongan ni si Saul di Mikhmas dohot di dolok Betel, jala saribu dongan ni si Jonatan di Gibea-Benjamin, dipamuli do ianggo bangso na lobi i ganup tu undungundungna be.

³Dung i ditaluhon si Jonatan ma parangan ni halak Palistim, angka na marsaro di Geba, tarbortik ma barita i tu halak Palistim. Alai lam didokkon si Saul ma mamalu sarune di sandok tano i maningtinghon: Ingkon begeon ni halak Heber ma i. [129†]

⁴Jadi sandok Israel umbege barita i: Nunga ditaluhon si Saul parangan ni halak Palistim, nunga ngorngor huhut roha ni halak Palistim mida Israel. Jadi dipaluhut si Saul ma bangso i tu Gilgal.

⁵Marpungu ma dohot halak Palistim laho marmusu dompak Israel: Tolupulu ribu hureta, jala onom ribu parsihundul, jala situan natorop i tudoshon horsik na di topi ni laut hinadeakna; nangkok ma nasida jala marsaro di Mikhmas, tondong ni Bethapen.

⁶Jadi dung diida halak Israel naung hagogotan nasida, ai godoron do situan natorop i, gabe martabuni ma bangso i di angka liang, dohot di ramba, dohot di dolok batu, dohot di godunggodung dohot di angka bondar.

⁷Taripar do huhut halak Heber tu bariba ni Jordan, tu luat Gad dohot Gilead; alai tading di Gilgal dope ianggo si Saul, jala sandok situan natorop i godoron be do mangihuthon ibana. II.

⁸Jadi dung pitu borngin lelengna ibana paimaimahon janji na binahen ni si Samuel, hape matua so ro si Samuel tu Gilgal, mampar ma situan natorop i sian lambungna. [130†]

⁹Dung i ninna si Saul ma: Boan tu ahu pelean situtungon dohot angka pelean hamauliateon; gabe dipelehon ibana ma pelean situtungon i.

¹⁰Jadi dung tolhas dipelehon pelean situtungon i, ida ma, ro ma tongon si Samuel, gabe ruar ma si Saul manjumpangkon ibana, mandok tabena.

¹¹Dung i ninna si Samuel ma: Aha do na binahenmu? Jadi ninna si Saul ma: Dung huida mampar bangso i sian lambungku, jala ndang ro ho di tingkina i, tole halak Palistim marpungu di Mikhmas.

¹²Jadi ninna rohangku ma: Tuat ma annon halak Palistim mandapothon ahu tu Gilgal, laos so martangiang dope ahu di adopan ni Jahowa, jadi hupahum rohangku, laos hupelehon pelean situtungon i.

¹³Dung i ninna si Samuel ma tu si Saul: Na oto do pambahenmi, ndang diradoti ho tona ni Jahowa Debatam, na tinonahonna tu ho; ai nuaeng nian naeng pahoton ni Jahowa harajaonmi gumomgom Israel ro di salelenglelengna. [131†]

¹⁴Alai anggo nuaeng ndang hot harajaonmi; nunga pola dilului Jahowa sada halak bangunan ni rohana, naung tinonahon ni Jahowa bahen partogi ni bangsona, ai ndang diradoti ho, na tinonahon ni Jahowa tu ho. [132†] III.

¹⁵Dung i hehe ma si Samuel, laos nangkok sian Gilgal tu Gibea-Benjamin; alai anggo si Saul umbilang situan natorop i, angka na jumpang di lambungna, arga onom ratus halak toropna. [133†]

¹⁶Ianggo si Saul dohot si Jonatan, anakna i ro di situan natorop, angka na di lambungnasida i, maringan do di Gibea-Benjamin, alai marsaro di Mikhmas do anggo halak Palistim. [134†]

¹⁷Dung i borhat ma parbajo sian parsaroan ni halak Palistim tolu panggungan; panggungan na sada mamedu dompak dalan laho tu Opra, tu luat Saul;

¹⁸Panggungan na sada mamedu dompak dalan laho tu Bethoron; panggungan na sada muse mamedu dompak dalan partalpahan, tondong ni rura Zeboim, tungkan halongonan. [135†]

¹⁹Alai ndang adong jumpang nanggo sada tungkang bosi di sandok tano Israel, ai ninna roha ni halak Palistim do, sai unang ma sanga halak Heber mambahen podang manang mundimundi. [136†]

²⁰Dibahen i ingkon tuat sandok Israel manopot halak Palistim laho patiptiphon gigi ni ninggalana be manang gupakna, manang tangkena, manang sasapna.

²¹Jadi ndang bolut be baba ni gigi ni ninggala, sasap, gupak dohot tangke, nang patigor turatura tu horbo.

²²Ia dung tole ari tongtangan i, ndang adong jumpang podang manang hujur di tangan ni sandok halak situan natorop, dongan ni si Saul dohot si Jonatan; alai anggo di si Saul dohot di si Jonatan, anakna i, adong do jumpang.

²³Dung i borhat ma sada panggungan ni halak Palistim laho tu jaringjing Mikhmas. [137†]