Read Batak Toba 1 SAMUEL 31 Bible Online

1 SAMUEL 31 - Batak Toba bible

1 SAMUEL 31

¹I [1] Jadi dung tole tongtang halak Palistim dompak halak Israel, gabe maporus ma halak Israel moradophon halak Palistim, jala marragean nasida di atas dolok Gilboa.

²Dung i sai dilotongi halak Palistim ma si Saul dohot angka anakna, dibunu halak Palistim ma si Jonatan, si Aminadab dohot si Malkisua, angka anak ni si Saul.

³Lam tarsugutsugut ma dohot si Saul, sai ditumpur halak parsior ibana, gabe targisik bugangna dibahen halak parsior i.

⁴Dung i didok si Saul ma mandok naposo siusung sinjatana: Umpat ma podangmu jala tihamhon tu ahu, asa unang ro halak parhulup on maniham ahu, huhut mangalesanlesan ahu. Alai ndang olo naposo siusung sinjatana i, ai mabiar situtu do ibana. Dung i dibuat si Saul ma podangna, laos maninggangkon dirina tusi. [315†]

⁵Jadi dung diida naposo siusung sinjatana i naung mate si Saul, dohot ma ibana maninggangkon dirina tu podangna, laos mate rap dohot rajai.

⁶Jadi rap mate ma di na sadari i si Saul dohot anakna na tolu i dohot naposo siusung sinjatana ro di sude halak donganna i.

⁷Jadi dung diida halak Israel angka na di baribaon ni rura i dohot angka na di baribaon ni Jordan naung maporus halak Israel, jala naung mate si Saul dohot angka anakna, ditadingkon nasida ma angka huta i, jala maporus. Jadi ro ma halak Palistim maringan disi. II

⁸Dung i marsogotna i ro ma halak Palistim laho mamupusi angka na marragean i, gabe jumpang nasida ma si Saul dohot anakna na tolu i marpeahan di atas dolok Gilboa.

⁹Dung i ditipul nasida ma uluna jala diduduk angka sinjatana, dipaebangkon ma i tu luat ni halak Palistim humaliang laho mamaritahon barita i di bagasan joro ni ajiajiannasida dohot tu situan na torop i.

¹⁰Dung i dipampeakkon nasida ma sinjatana i tu bagasan joro ni Astarot, ianggo bangkena digantung nasida do tu parik ni huta Betsean.

¹¹Alai dung dibege isi ni Jabes di Gilead barita taringot tu na binahen ni halak Palistim tu si Saul. [316†]

¹²Borhat ma nasa baoa sialo musu mardalan manipat borngin i, dibuat nasida ma bangke ni si Saul dohot bangke ni angka anakna i sian parik ni huta Betsean, jala diboan tu huta Jabes jala disirabuni disi.

¹³Dung i dibuat ma angka holiholina, laos dibandahon ma i di toru ni hariara di Jabes, jala marpuasa nasida pitu ari lelengna. [317†]