Read Batak Toba 1 SAMUEL 6 Bible Online

1 SAMUEL 6 - Batak Toba bible

1 SAMUEL 6

¹I. [1] Asa pola pitu bulan leleng ni poti ni Jahowa di luat ni halak Palistim.

²Dung i dipaluhut halak Palistim ma angka malim dohot pangarunding, angka ninna ma: Aha do sibaenonnami taringot tu poti ni Jahowa? Sai pabotohon hamu ma tu hami manang aha bahenonnami hamulianna tu ingananna hian. [54†]

³Jadi didok angka nasida ma: Molo naeng tongoshononmuna poti ni Debata ni Israel, unang rumar boti tongoshon hamu ingkon paihuthononmuna sada pelean parsalaan tusi. Molo tung malum hilalaonmuna, andar ma botoonmuna manang ala ni aha umbahen so manginsurut tanganna sian hamu.

⁴Jadi ninna nasida ma: Aha do pelean parsalaan sipaihuthononnami tusi? Dung i didok nasida ma mangalusi: Lima baro sere dohot lima monsi sere, marguru tu bilangan ni raja ni halak Palistim, ai sada do uhumi na mangonai tu nasida sude dohot tu rajanasida i. [55†]

⁵Dibahen i ingkon bahenonmuna do sumansuman ni baromuna dohot sumansuman ni monsimuna, angka na mangago tu tano i, ingkon lehononmuna hamuliaon tu Debata ni Israel; anggiat dipaganggang tanganna sian hamu dohot sian debatamuna dohot sian tanomuna.

⁶Jala boasa tung tangkanganmuna rohamuna, songon na tinangkangan ni halak Misir dohot Firaun najolo rohanasida i? Nda songon on do, dung ditorui Jahowa nasida, balik do nasida mandokkon bangso i mardalan? [56†]

⁷On pe, hobas i hamu ma mambahen padati na imbaru sada, jala buat hamu dua lombu panusuan, angka na so dung niaugaan, tu lombu i ma pampe hamu padati i, alai olat hamu anakna i sian pudina mulak tu bara.

⁸Dung i handit hamu ma poti ni Jahowa, jala pajongjong hamu tu padati i; jala sombasomba sere, angka sipaihuthononmuna tusi bahen pelean parsalaan, bahen hamu ma i tu bagasan potipoti di lambungna, jala loas hamu laho manulus dalanna.

⁹Dung i matahon hamu: Molo dalan parbalohan ni tanona dinangkohi laho tu Betsemes, andar ma Ibana do na mambahen jea godangon tu hita; alai molo ndang, botoonta ma na so tanganna do na mangonai tu hita, hamamasana hian do i tu hita.

¹⁰Jadi dibahen angka baoa i ma songon i, dibuat nasida ma dua lombu panusuan, jala dipampe padati i tusi, alai dihurung do anggo anakna i di bara.

¹¹Dung i dipajongjong nasida ma poti ni Jahowa tu padati i ro di potipoti, isian ni angka monsi sere dohot sumansuman ni baronasida.

¹²Jadi sai ditulus angka lombu i dalan panigoran mangihuthon dalan laho tu Betsemes; sai dalan balobung i ditulus nasida, huhut marumbeumbe, jala ndang manimbil tu siamun manang tu hambirang; sai diiringiring angka raja ni halak Palistim do antong sahat ro di partalpahan ni Betsemes. II.

¹³Alai ragat mambuat eme di rura do ianggo isi ni Betsemes, jadi manaili dompak ginjang ma nasida, gabe diida nasida poti i, jala las rohanasida marnidasa.

¹⁴Dung i sahat ma padati i tu hauma ni si Josua, isi ni Betsemesi, laos ngongong disi, jala adong disi sada batu na bolon. Dung i ditahai nasida ma parhau ni padati i, jala lombu i dipelehon bahen pelean situtungon tu Jahowa.

¹⁵Dung i dipaijur halak Lepi ma poti ni Jahowa dohot potipoti di lambungna, isian ni sombasomba sere i, jala dipeakkon tu batu na bolon i; laos mamelehon angka pelean situtungon dohot sipotongon halak Betsemes sadarina i tu Jahowa. [57†]

¹⁶Alai dung ditonduri na lima raja ni halak Palistim pangalahona, mulak ma nasida tu Ekron sadarina i.

¹⁷Jala on do baro sere, angka na pinaihut ni halak Palistim bahen pelean parsalaan tu Jahowa: Sian Asdod sada, sian Gaza sada, sian Askelon sada, sian Gat sada, sian Ekron sada. [58†]

¹⁸Angkupni angka monsi sere. Marguru tu bilangan ni saluhut angka huta ni halak Palistim, ginomgom ni raja na lima i, olat ni huta na gonting sahat ro di sosor ni halak parpea; jala batu na bolon i do sitindangi, pangulonan ni poti ni Jahowa rasirasa sadarion, di hauma ni si Josua, isi ni Betsemesi. III.

¹⁹Alai hona toru ma halak Betsemes, ala na tiniliknasida i poti ni Jahowa, jala dibunu sian nasida pitupulu halak sian limapulu ribu halak. Jadi margudompong ma bangso i, ala hataluan bolon na binahen ni Jahowa di tongatonganasida. [59†]

²⁰Dung i ninna halak Betsemesi ma: Tung ise ma manahan tindang di jolo ni Jahowa, Debata na badia sisongon i? Jala ise do ulaning topotonna, dung laho sian lambungta? [60†]

²¹Dung i disuru nasida ma suruanna manopot isi ni Kiriat Jearim, angka ninna ma: Nunga mulak poti ni Jahowa ditaruhon halak Palistim; sai tuat ma hamu mangalap tu hamu.