Read Bats'i k'op Marcos 10 Bible Online

Marcos 10 - Bats'i k'op bible

Marcos 10

¹Iloc' batel ti Jesuse, ibat ti estado Judea xchi'uc ti jech uc'um Jordán. Yan vuelta laj stsob sbaic tal ti stojol ti Jesuse ep jchi'iltac. Hech yu'un ti Jesuse lic xchanubtas yu'un hech ono'ox tspasilan.

²Italic ti stojol ti Jesuse cha'vo' oxvo' ti fariseoetique. Yu'un sc'an spasbeic proval yo'nton ti Jesuse, hech laj sjac'beic: ―¿Mi stac' ti jsutes cajniltutic? ―xchiic.

³Itac'av ti Jesuse, hech laj sjac'be: ―¿C'usi laj yal ti Moisese? ―xchi.

⁴Itac'avic: ―Ti Moisese laj yal ti persa tsts'iba ti jun ti c'usi sventailuc ti tsutes ti yajnile, hech xu' tsut yu'un, xchi ti Moisese ―xchiic.

⁵Itac'av ti Jesuse, hech laj yalbe: ―Scoj ti tsots yo'ntonic ti antiguo jtatamoltique hech yu'un ti hech i'ac'bat lisensa yu'un ti Moisese ti tsutes yajnilique. Hech yu'un hech ts'ibabil comel.

⁶Mu hechuc ti sliqueb ti balumile. Yu'un ti Diose c'alal laj spas ti sba crixchanoe, jun vinic jun ants laj spas, ti xchi ti sc'op ti Diose.

⁷Hech ts'ibabil uc: “Hech yu'un ti viniquetique tscomes stot sme', chic' yajnil.

⁸Jun no'ox chc'ot xchi'uc yajnil. Hech yu'un mu cha'vo'uc icom yu'un jun no'ox ic'ot”, ti xchie.

⁹Hech yu'un ti much'utic jun no'ox ic'otic yu'un ti Diose, mu me sp'ev sbaic ―xchi ti Jesuse.

¹⁰Patil c'alal i'och xa ti yut na ti bu chvay ono'ox ti Jesuse, más ijac'bat sjam yu'un ti yajchanc'opetique.

¹¹Ti Jesuse hech laj yalbe: ―Scotol ti much'u tsutes ti yajnile, mi chic' yan ants, ja' chmulivaj obi.

¹²Mi tscomes smalal ti antse, mi chic' sbaic xchi'uc yan vinic, ja' chmulivaj obi ―xchi ti Jesuse. Ja' sc'opilal ti Jesuse ti laj yac'be bendición ti ololetique (Mt. 19:13‑15; Lc. 18:15‑17)

¹³Ti jchi'iltaque laj yiq'uic tal ti stojol ti Jesuse ololetic yu'un ac'o yac' sc'ob ti Jesuse ac'o yac'be ti sjol ti ololetique. Ti yajchanc'opetique sc'an spajesic ti much'utic ti hech snopojique.

¹⁴C'alal laj yil ti Jesuse ti hech tsc'an tspajesvanic ti yajchanc'opetique, mu lecuc laj yil. Hech laj yalbe: ―Ac'o taluc ti jtojol ti ololetique. Mu me xapajesic yu'un ti much'utic tspasatic ti mantal yu'un ti Diose ja' hech chc'otic hech chaj c'u che'el olol.

¹⁵Melel ti c'usi chacalbeique, ja'to mi chac'ot hech chaj c'u che'el olol, ja'to xu' chaspasot ti mantal ti Diose ―xchi.

¹⁶Ti Jesuse laj spet ti ololetique, laj yac' sc'ob, laj yac'be ti sjolic ti ololetique, laj yac'be bendición scotolic. Ja' sc'opilal ti unen vinic ti jc'uleje (Mt. 19:16‑30; Lc. 18:18‑30)

¹⁷C'alal chloc' batel ti Jesuse, anil ital jun jchi'il. Tal squejan sba ti stojol ti Jesuse. Hech laj sjac'be: ―Maestro, ho'ot lequil vinicot. ¿C'usi chcut chicuxi sbatel osil? ―xut.

¹⁸Ti Jesuse hech laj yalbe: ―¿C'u yu'un lequil vinicot xavutun? Mi junuc mu'yuc much'u lec, ja' no'ox stuc ti Diose.

¹⁹Chana' ti c'usi chal ti mantaletique. “Mu me xamulivaj. Mu me xamilvan. Mu me xa'elc'aj. Mu me xanopbe smul avecino. Mu me xalo'lavan. Paso me ti muc' atot ame'”, ti xchie ―xchi ti Jesuse.

²⁰Itac'av ti vinique: ―Scotol avi to jch'unoj c'alal nich'i tal ―xchi.

²¹Hech yu'un ti Jesuse laj sq'uelbe sat, c'ux laj ya'i. Hech laj yalbe: ―Oy to c'usi sc'an to avu'un. Batan, ba chono scotol ti c'utic oy avu'une, q'uelambo ti me'onetique. Hech oy ac'ulejal ti vinajel chc'ot. Patil chtal ats'acliun batel ―xchi.

²²Ep laj yich' mul ti vinique yu'un ti hech i'albat yu'un ti Jesuse. Yu'un mu sc'an spas yu'un ep sc'ulejal li' ti balumile. Chich' mul ti c'alal isut batele.

²³Hech yu'un ti Jesuse xmelmun lic sq'uelbe sat ti jchi'iltaque. Hech yu'un hech lic yalbe ti yajchanc'opetique: ―Vocol chac' sba ti ventainel yu'un ti Diose ti much'u jc'uleje ―xchi.

²⁴Ich'ay yo'ntonic ti yajchanc'opetique yu'un ti hech laj yale. Ti Jesuse laj xcha'albe yan vuelta: ―Jnich'nab, vocol chac' sbaic ti ventainel yu'un ti Diose ti crixchanoetique.

²⁵Hech chaj c'u che'el mu xjelav jcot camello ti xchac acuxa, ja' no'ox hech uc ti much'u jc'uleje mu xu' chac' sba ti ventainel yu'un ti Diose ―xchi.

²⁶Más ich'ay yo'ntonic. Hech laj sjac'be sbaic: ―¿Much'u cac'tic xu' chcol che'e? ―xut sbaic.

²⁷Hech yu'un ti Jesuse laj sq'uelbe satic, hech laj yalbe: ―Ti crixchanoetique mu xu' scolta sba stuc. Ti Diose scotol xu' yu'un tspas stuc yu'un jelaven sp'ijil ―xchi ti Jesuse.

²⁸Hech yu'un ti Pedroe lic yalbe: ―Ho'ontutique scotol laj xa jcomestutic. Laj xa jts'acliotutic ―xut.

²⁹Itac'av ti Jesuse, hech laj yalbe: ―Melel ti c'usi chacalbeique, scotol ti much'u laj xa scomes mi sna, mi sbanquiltac, mi yits'inabtac, mi svixobtac, mi yixleltac, mi smucubtac, mi stot mi sme', mi yol xnich'nab, mi slum, ho'on ti jventa yu'un ac'o pucuc ti lequil ach' c'ope, ho'vinic vuelta ch-epaj xq'uexol ti ch-ac'bat ti ora to. Ch-ac'bat sna xchi'uc yermanotac, xchi'uc sme', xchi'uc yol xnich'nab, xchi'uc slum. Ta me xich' contrainel uc. Ti patil ta me xich' xcuxlejal sbatel osil.

³⁰

³¹Scotol ti much'utic hech tsnop ti yo'nton ho'on jbaejbeun mi xchi tsnop, ja' patil ti yantique mi xchi, ja' patil chc'otic lume. Ja' jbael chc'otic scotol ti much'utic mu hechuc tsnopique. Ja' ep ti much'utic patil chc'otique ―xchi ti Jesuse. Ja' sc'opilal ti yan vuelta laj yal ti Jesuse ti chmilate (Mt. 20:17‑19; Lc. 18:31‑34)

³²Ti Jesuse xchi'uc ti yajchanc'opetique c'alal ibatic ti be yu'un chmuic batel ti Jerusalén, ja' jbaejbe ti Jesuse. Ich'ay yo'ntonic ti yajchanc'opetique ti yu'un ja' jbaeltic no'ox chbat, mu'yuc sc'opilal cha'i mi oy c'usi chc'ot ti pasel te ti Jerusalén. Ti stuquique ixi'ic c'alal laj sts'acli batel. Hech yu'un ti Jesuse laj sq'uej sbaic xchi'uc. Lic yalbe ti c'usi chc'ot ti pasele.

³³Hech laj yalbe: ―A'yo me ava'yic, ta xa xijc'ot ti Jerusalén. Ho'on ti co'ol crixchanoucutique te chiyac'ucun ti sc'ob ti totil paleetique xchi'uc ti sc'ob ti jchi'iltic ti chchanubtasvanic ti smantal ti Diose ti scuyoj sbaique. Ja' chixchapambucun jc'opilal yu'un chismilucun. Chiyac'ucun entrecal uc ti sc'ob yanlum viniquetic.

³⁴Chislabanucun, chiyac'bucun acial, chistubtabucun jsat. Patil chismilucun. Chicham, patil ti yoxibal c'ac'al chicha'cuxi loq'uel ti ch'en ―xchi ti Jesuse. Ja' sc'opilal ti oy c'usi laj sc'ambeic ti Jesuse ti Jacoboe xchi'uc ti Juane (Mt. 20:20‑28)

³⁵Hech yu'un ti xnich'nab ti Zebedeoe, ja' ti Jacoboe xchi'uc ti Juane, inopejic tal ti stojol ti Jesuse. Hech laj yalbeic: ―Maestro, ti jc'an ti chavac'buntutic ti c'usi chajc'ambote ―xut.

³⁶Ti Jesuse hech laj sjac'be: ―¿C'usi chac'an chajpasboxuc? ―xut.

³⁷Hech itac'avic: ―C'alal cha'och ti pas mantal, ac'un xinaquitutic jun ti abats'ic'ob, jun ti ats'et ―xchiic.

³⁸Hech yu'un ti Jesuse hech laj yalbe: ―Mu xana'ic ti c'usi chac'ambune. ¿Mi xu' avu'unic chavich'ic vocol hech chaj c'u che'el chquich' vocol ho'oni? ¿Mi xu' avu'unic ti contrainel hech chaj c'u che'el chquich' contrainel ho'oni? ―xchi.

³⁹Hech itac'avic: ―Xu' cu'untutic ―xchiic xtac'avic xcha'va'alic. Ti Jesuse hech laj yalbe: ―Melel ti c'u che'el chquich' vocol ho'oni, ti c'u che'el chquich' contrainel, hech chavich'ic uc.

⁴⁰Ho'on mu xu' chacalbeic ti chanaquiic jun ti jbats'ic'ob jun ti jts'et. Chapal yu'un ti Jtote ti much'utic te chnaquiic ti jtojole ―xchi.

⁴¹Ti xchi'iltaque ti lajunvo'e mu xtun laj ya'yic. Hech yu'un lic scontrain ti Jacoboe xchi'uc ti Juane.

⁴²Ti Jesuse laj yic' tal ti stojol ti lajchavo'ique. Hech laj yalbe: ―Chana'ic c'u x'elan tspasic ti ajvaliletic yu'un yanlum viniquetic. Chac' sbaic ti pasel ti muc'. Ti totiletic yu'unique ja' tsujvanic ti abtel.

⁴³Mu me hechuc chapasic ti ho'oxuque. Ti much'u tsc'an ti totil chc'ot avu'unique, ja' chac' sba ti abatinel avu'unic.

⁴⁴Ti much'u sc'an ti tspasat ti muc' avu'unique, ac'o me yac' sba ti abatinel ti atojolic.

⁴⁵Hech me xapasic hech chaj c'u che'el ho'oni ti co'ol crixchanoucutique. Yu'un ho'oni ma'uc nital yu'un chi'abatinvan. Ja' tal cac' jba ti abatinel. Tal cac' jba ti milel sventa scolel scotol crixchanoetic ―x'utatic yu'un ti Jesuse. Ja' sc'opilal ti ijambat sat ti Bartimeoe (Mt. 20:29‑34; Lc. 18:35‑43)

⁴⁶Hech yu'un ic'otic ti jteclum Jericó. Patil c'alal iloq'uic batel ti Jericó ti Jesuse xchi'uc ti yajchanc'opetique its'acliat batel yu'un ep jchi'iltac. Te snacanoj sba ti ti'be jun ma'sat c'ot sta. Bartimeo sbi ti ma'sate. Ja' tsc'an paramote. Ja' tsc'ambe ti much'utic te chjelave. Timeo sbi ti stot ti ma'sate.

⁴⁷Ti ma'sate c'alal laj ya'i ti te ch-ech' ti Jesuse, ja' ti liquem tal ti Nazarete, hech laj yavta: ―Jesús, ho'ot ti yelnich'onot ti Davide ti ac'opilal chatale, c'uxubinun ―xchi chavta.

⁴⁸Ti yan jchi'iltaque ti te xchi'inojic batel ti Jesuse sc'an spajesic. ―Anchan ―xutic. Más no'ox tsots laj yavta: ―Ho'ot ti yelnich'onot ti Davide, avocoluc me, c'uxubinun ―xchi.

⁴⁹Laj sva'an sba ti Jesuse, hech laj yalbe ti crixchanoetique: ―Ic'bun me tal ―xut. Hech yu'un ba yiq'uic tal ti ma'sate. Hech laj yalbeic: ―Mu me xavich' mul. Lican, chayic'ot ti Jesuse ―xutic.

⁵⁰Hech yu'un ti ma'sate ti ora ilic. Laj sten comel ti xchije. Ital ti anil ti stojol ti Jesuse.

⁵¹Ti Jesuse hech laj yalbe: ―¿C'usi chac'an chajpasbot? ―xchi. Itac'av ti ma'sate, hech laj yalbe: ―Maestro, avocoluc jambun jsat ―xchi.

⁵²Ti Jesuse hech laj yalbe: ―Xu' chabat. Icol xa ti asate yu'un laj ach'un ti xu' cu'un ―xchi. Ti ora ijam ti sate hech lic sts'acli batel ti Jesuse.