Read Bats'i k'op Apocalipsis 19 Bible Online

Apocalipsis 19 - Bats'i k'op bible

Apocalipsis 19

¹Ho'on ti Juanune patil laj ca'ibe sc'op ep crixchanoetic te ti vinajel. Ep ti jyalel. Tsots chc'opojic, hech laj yalic:Hocol yalbucutic ti Diose, nijcolucutic xa ti sventa ti Cajvaltic Dios cu'untique.Stuc chch'umbat sc'op sbatel osil.Stuc tspas mantal sbatel osil.

²Toj chchapanvan.Chc'ot ti pasel ti c'utic chale.Laj xa yac'be castigo yu'un smul ti babiloniaetique, ja' ti pasbil ti muc' ono'oxe.Ja' hech chaj c'u che'el jmulavil ants laj sbolibtas scotol crixchanoetic ti babiloniaetique.Ti Diose laj xa yac'be stojic yu'un ti imilbat ti abatetic yu'une, xchiic.

³Yan vuelta laj yalic: ―Hocol yalbucutic ti Diose sbatel osil te chich'ic castigo o ―xchiic.

⁴Ti veinticuatro ti vo' totiletique xchi'uc ti chanvo'ique laj spatan sbaic ti lum, ilequilc'opojic yu'un ti Diose ti te nacal ti muc'ta naclebale. Hech laj yalic: ―Jun yutsil ti hech chc'ot ti pasel. Hocol yalbucutic ti Diose ―xchiic.

⁵Oy much'u chc'opoj te yo' bu ti muc'ta naclebale. Hech laj yal:Hocol yalbucutic ti Diose, xachiic me, ho'oxuc ti yabatoxuque, ho'oxuc ti laj xa axi'ic ti Diose, manchuc mi tsots avabtelic ono'oxe, manchuc mi mu tsotsuc avabtelic ono'oxe, xchi.

⁶Laj ca'i hech chaj c'u che'el chc'opoj ep crixchanoetic. Tsots chc'opoj hech chaj c'u che'el nojelal uc'um, o hech chaj c'u che'el chauc ti tsots ch-avane. Hech laj yal:Hocol yalbucutic ti Diose.Stuc tspas mantal ti Cajvaltic Diose, ja' ti stuc jelaven sp'ijile.

⁷Nichim no'ox co'ntontic ti jpastic ti muc' yu'un laj xa sta yorail ti chnupun ti Cajvaltique.Chapal xa ti yajnile.

⁸Ti ac'bil ti sc'u'e pasbil ti lino poc' ti toyol stojole.Lum sac ti jyalel; chquevan ti sc'u'e, xchi xc'opoj. Ti lino poq'ue ja' señail ti toj yo'ntonic ti i'ac'batic ti much'utic oyic ti stojol ti Diose. Ja' sc'opilal ti q'uin yu'un chnupun ti Cajvaltique

⁹Ti ch'ul abate hech laj yalbun: ―Ts'ibao ti hun avi to: “Jun no'ox yutsil ti much'utic ch'amumbil yu'un ti Cajvaltique yu'un chba sq'uelic ti chnupune” ―xiyutun. Hech laj yalbun uc: ―Ja' sc'op ti Diose, ja' melel ―xiyutun.

¹⁰Ho'oni laj jpatan jba ti stojol yu'un jc'an ti jpas ti muc'. Hech laj yalbun: ―Mu me xapas hech. Ja' chapas ti muc' ti Diose. Yu'un ho'oni co'ol cac'oj jbatic ti abatinel yu'un ti Diose xchi'uc scotol avermanotac uc ti jamal chalbeic sc'opilal ti Jesuse. Yu'un co'ol chcalbetic sc'opilal ti Jesuse, hech yu'un co'ol yabatucutic ti Diose xchi'uc ti j'alc'opetic ti vo'one ―xiyutun. Ja' sc'opilal ti much'u scajlebinoj ti saquil ca'e

¹¹Laj quil más ijam ti vinajele. Te oy saquil ca' laj quil. Ti much'u scajlebinoje toj yo'nton mu sna' xlo'lavan, xchi sc'opilal. Toj chchapanvan. Toj ti castigo chaq'ue.

¹²Ti jujup'ej ti sate xpulpun no'ox chtil hech chaj c'u che'el yat c'oc'. Ep scorona ti sjol. Ts'ibabil sbi pero mu'yuc much'u laj sna'. Stuc no'ox laj sna'.

¹³Ts'ajbil ti ch'ich' ti sc'u' ti slapoje. Ja' ti C'op sbie, ja' ti tal yalbucutic c'u x'elan yo'nton ti Jtotic Diose.

¹⁴Chi'imbil yu'un scotol yabat ti te oyic ti vinajele. Jun no'ox yutsil ti sc'u'ic ti slapojique. Pasbil ti lino poc' x'elan. Sac ti jyalel. Puru saquil ca' scajlebinojic scotolic.

¹⁵Ti C'ope yac'oj sba chloc' ti ye espada. Oy lec ye ti espadae yu'un hech chac'be castigo scotol ti much'utic mu xch'umbat sc'ope. Tsots tspas ti mantal scotol. Persa chch'umbat smantal yu'un. Hech ch-ac'bat castigo ti much'utic tscontrainic ti Diose yu'un ilinem ti Diose ti stojolic.

¹⁶Ti sc'u' xchi'uc ti scub hech ts'ibabil sbi: Ja' ti reye ti tspas ti mantal scotol yan reyetic. Ja' ti totil ajvalile ti tspas ti mantal scotol yan ajvaliletic, xchi.

¹⁷Laj quil oy jun ch'ul abat te va'al ti sba ti c'ac'ale. Tsots ic'opoj. Laj spas ti mantal ti xuleme ti tanjole. Hech laj yalbe: ―La'ic me, tsobo abaic tal yu'un chac' ep ve'elil ti Diose.

¹⁸Chati'beic sbec'tal reyetic xchi'uc capitán soldadoetic, xchi'uc much'utic yan tsots yabtel yich'ojic. Chati'beic sbec'talic ca'etic xchi'uc ti much'utic scajlebinojique, xchi'uc sbec'talic scotol ti much'utic tscontrainic ti Diose manchuc mi oyic ti libre, manchuc mi oyic ti mozoil, manchuc mi tsots yabtel yich'ojic, manchuc mi mu tsotsuc yabtel yich'ojic ―xut.

¹⁹Laj quil te stsoboj sbaic ti primero jti'vanej bolome xchi'uc ti reyetic te ti balumil, scotol xchi'uc ti yajsoldadoetique, yu'un tspasic pleito xchi'uc ti C'ope ti te cajal ti ca'e, xchi'uc ti abatetic yu'une.

²⁰Itsacat ti primero jti'vanej bolome xchi'uc ti nopbilal j'alc'op yu'une. Ti nopbilal j'alc'ope ja' ti laj spas jchop o abteletic ti stojol ti primero jti'vanej bolome hech ilo'laat scotol ti much'utic yich'ojbeic smarca ti primero jti'vanej bolome. Ja' ti much'u laj squejan sbaic ti stojol ti sloc'tombail ti primero jti'vanej bolome. Ti xcha'va'alique, ja' ti primero jti'vanej bolome xchi'uc ti nopbilal j'alc'op yu'une, cuxul itenatic ochel ti muc'ta c'oc' yo' bu chtil azufre.

²¹Ja'uc ti much'utic laj sts'acliic ono'ox ti primero jti'vanej bolome xchi'uc ti nopbilal j'alc'op yu'une, ja' scotolic imilatic ti espada ti yac'oj sba chloc' ti ye ti C'ope ti te cajal ti ca'e. Tal ti'batuc sbec'talic yu'un ti xuleme ti tanjole. Inoj xch'utic ti xuleme ti tanjole.