Read Bawm Chin GENESIS 11 Bible Online

GENESIS 11 - Bawm Chin bible

GENESIS 11

¹A tîr chun, laikulh minung zawzawng tla chu thu munkhat mang hen hawlh khat hen an hawlh.

²Saklei kângah an va kal le, Babulon ramsung Shinar phâi ah an um.

³“Chei! Tual kan rawh lai,” an ti. Churawhchun tual rawh mi leh a senghnâk an nei rawh.

⁴“Tuah khuapi siam sele, vân tawngh khet hen insâng kan sak lai, kan min thangnâk ding leh tual tlûnah kanna rek ver lonâk ding hen,” an ti.

⁵LALPA chu an khuapi siam leh insâng an sak mi zauh ding hen a hawng ṭum le,

⁶“Hi minung tla hi tuah anna khat hen hawlh pakhat hen an hawlh; hi hi thilti ding an tum mi an dawmh mi chu asi ko rawh. Sâwtlotê ah an duh mi zawng an ti kho ko lai!

⁷Kan va ṭum lai le, anna pêm lonâk ding hen an hawlh tla kan chawmh piak na lai,” a ti.

⁸Churawhchun LALPA nih tual ah mun kipah a rek na le, khuapi an siam mi chu an bângtâk rawh.

⁹Chu khuapi chu Babel (Babulon) an ti. Chunah chun LALPA nih an hawlh tla a dang piak na hen, chu thawk ber chun tual tlûn mun kipah a rek na ruangah.

¹⁰Hi bang tla hi Sem thlâk tla an si. Sem chu kum 100 mi asi le, buanso nûnah kum nih asi ah fapa Arpaksad a nei.

¹¹Chu nûnah kum 500 dang a dam le, fa dang tla a nei.

¹²Arpaksad chu kum 35 a tling ah fapa Selah a nei.

¹³Chu nûnah kum 403 dang a dam le, fa dang tla a nei.

¹⁴Selah chu kum 30 a tling nûnah fapa Eber a nei le,

¹⁵chu nûnah kum 403 dang a dam le, fa dang tla a nei.

¹⁶Eber chu kum 34 a tling ah fapa Pelek a nei;

¹⁷Chu nûnah kum 430 dang a dam le, fa dang tla a nei.

¹⁸Pelek chu kum 30 a tling ah fapa Reu a nei,

¹⁹chu nûnah kum 209 dang a dam le, fa dang tla a nei.

²⁰Reu chu kum 32 asi ah fapa Seruk a nei;

²¹Chu nûnah kum 207 dang a dam le, fa dang tla a nei.

²²Seruk chu kum 30 a tling ah fapa Nahor a nei;

²³chu nûnah kum 200 dang a dam le, fa dang tla a nei.

²⁴Nahor chu kum 29 a tling ah fapa Terah a nei;

²⁵chu nûnah kum 119 dang a dam le, fa dang tla a nei.

²⁶Terah chu kum 70 a tling ah Abram, Nahar leh Haran a neih na asi.

²⁷Hi bang tla hi Terah thlâk tla an si; Abram, Nahor leh Haran. Haran chu Lot pa asi.

²⁸Chun Haran chu Babulon ram ah Kaldai mi tla umnâk khuapi Ur ah a pa dam liauah a thi.

²⁹Abram nih Sarai a umpi le, Nahor nih Haran fanu Milkah a umpi; chu chu Iskah pa khawm asi.

³⁰Sarai chu fa a nei kho lo.

³¹Terah nih a fapa Abram leh Haran fapa Lot a tupa a kalpi na le, a monu Sarai Abram nupi khawm anmah tla hen Babulon ram ah mi Kaldai tla umnâk Ur khuapi chu an mâk le, Kanaan ram leiah an kal rawh. Haran tiang hen an kal le, chunah chun an va um.

³²Terah chu kum 205 a tling hen chunah chun a thi rawh.