Read Bawm Chin GENESIS 13 Bible Online

GENESIS 13 - Bawm Chin bible

GENESIS 13

¹Abram chu Kanaan simlei kângah a nupi leh a neih zawzawng hen Aigupta thawk hen a suak le, marlei ah a kal rawh. Lot khawm a sinah a kal bâk.

²Abram chu minei tak asi, dawrâ tla, kêl tla, ran rual leh ngûn leh tangka khawm a nei.

³Chu mun chu a kaltâk le, â ṭhial le, Bethel lei fûk hen a kal vima. A lânah mâichâm a siam le, a umnâk mun Bethel leh Ai karah mi mun a va tleng le, chunah chun

⁴mâichâm a siam le, chunah chun LALPA a sawnh.

⁵Lot khawm nih dawrâ tla, kêl tla, ran rual tla, dâwngsungkhur leh to-aw tla a nei bâk.

⁶Ran an nei vevê mi a tam tuk le, munkhat um ding hen ram ningnonâk nih a tinh lo rawh.

⁷Churawhchun Abram ran zauhtu leh Lot ran zauhtu lakah remlonâk a hawng suak rawh. (Chu liau chun Kanaan mi leh Perizit mi tla chu ram lakah an um.)

⁸Abram nih Lot sinah, “Unau kan si ruangah na mi le ka mi tla hi remlo hen an um ding asi lo.

⁹Churuang chun a dang hen kan um râu lai. Zei ram tal na duh mi thîm rawh, kâng khat lei na kal chun kei kâng dangah ka kal lai,” a ti

¹⁰Lot nih a kiangkam Jordan Vakuam zawzawng chu a zauh le, Zoar lei kalnâk tî tamnâk lei tla, LALPA DÛM[3] mawh Aigupta ram ah mi hâwi chu a muh. (chu chu Sodom leh Gomorah khuapi LALPA nih a râwk lânah mi chu asi.)

¹¹Lot nih Jordan Vakuam zawzawng chu a rangah a thîm le, saklei kângah â ṭhial rawh. Chu chu an panih hen anna dangnâk chu asi.

¹²Abram chu Kanaan ram ah a um le, Lot chu tivakuam khuapi lakah Sodom kiangah a um.

¹³Chunah minung tla chu LALPA tlûnah an sual le, an ṭha lo.

¹⁴Lot nih a kaltâk nûnah LALPA nih Abram sinah, “Na umnâk thawk hen mun kip zauh le,

¹⁵na muh mi zawng chu nang leh na thlâk tla rangah nan tâ si kumza ding hen kan pêk awt asi.

¹⁶Âukhawm nih rêl châwk lo rê ding hen thlâk tla ka nan pêk lai le, mi nih sep an rêl kho lo hâwi hen asi lai!

¹⁷Tuah kal le, ram pumpi zauh hep, a ektê hen nangmah rangah ka nan pêk awt mi asi ruangah,” a ti.

¹⁸Churawhchun Abram chu a um mun a ṭhial le, Mamre mi thing thenhlimh kiang Hebron ah a va um rawh, chunah chun LALPA rangah mâichâm a siam.