Read Bawm Chin GENESIS 14 Bible Online

GENESIS 14 - Bawm Chin bible

GENESIS 14

¹Lalchem pali, Babulon ah mi Shinar lalchem Amraphel, Ellasar lalchem Ariok, Elam lalchem Kedorlamer Goim lalchem Tidal

²chu lalchem dang panga tla: Sodom lalchem Bera, Gomorah lalchem Birsa, Atmah lalchem Sinah, Zeboim lalchem Semeber leh Bela (mawh Zoar) lalchem tla chu do ding hen an suak rawh.

³Hi lalchem panga tla hi Sidim Vakuam ah anna bawp le, chu chu tu liauah Tipi Thi asi.

⁴Kum leinih sung chu Kedorlamer thuneihnâk tangah an um le, a kum leithumnâk ah lam chun a lakah an hel rawh.

⁵A kum leilinâk ah chun Kedorlamer leh amah bawptu tla chu an kawrsen tla hen an hawng le, Asterot Karnaim a mi Rephaim, Ham ah mi Zuzim, Kiriathaim phâi a mi Emim,

⁶Edom tlâng ah mi Hor tla chu an neh na rawh, ramkaro kiangah mi Elparân tiang hen an ṭhâwl na.

⁷Churawhchun, an hawng a let le, Kades leiah an hawng kîr nawlh, (chu chu Enmispat ti asi.) Amalek ram zawzawng tla an neh le, Hazazon Tamar mi Amor tla khawm an neh na.

⁸Churawhchun Sodom lalchem, Gomorah lalchem, Atmah lalchem, Zeboim lalchem leh Bela lalchem hi lalchem panga tla nih chun an kawrsen tla Sidim Vakuam ah an pumh na le,

⁹Elam lalchem, Goim lalchem, Babulon lalchem, Ellasar lalchem, pali tla rangah an do.

¹⁰Chu tivakuam chu lâwngthlîng khur hen a khat thlo le, Sodom lalchem leh Gomorah lalchem chu râl an tuk mi an teknâk ah khur lakah an tlâ le; lalchem dang pathum tla lam chu tlâng leikângah an tek le, an suak.

¹¹Lalchem pali tla nih chun Sodom leh Gomorah mi thil zeizawng an buh tla hen an lâk le, an kal ving.

¹²Abram unaupa fapa Lot chu Sodom ah um mi asi le, amah leh a thilneih hen an lâk hep.

¹³Sikhawmsele, minung pakhat a suak le, Amor mi Mamre tâ thing thenhlimh kiangah um mi Abram Hebrai mi chu a va simh. Mamre leh a unaupa Eskol leh Aner chu Abram ṭangpitu an si.

¹⁴Abram nih a unaupa fapa chu an tleih ving tih a theih rawh chun, a umnâk mun ah râltuktu ding mi chu a pumh na le, an ektê hen 318 an tling. Chun, lalchem pali tla chu Dan tiang hen an ṭhâwl na.

¹⁵Chunah chun a murui hen a siam na le, an mêlma tla chu zân ah an va do na le, an neh na. Damaska marlei kângah Hobah tiang hen an dûm na,

¹⁶an thil lâk rawh mi khawm a suh nawlh na le, a unaupa fapa Lot, a thil neih leh a sinah mi nunau tla, midang an tleih mi zawzawng a suh nawlh hep na.

¹⁷Abram chu Kedorlamer leh lalchem dang tla a neh na mi chu a hawng kîr le, Saveh Vakuam ah Sodom lalchem nih a va dawng. (Saveh kuam hi Lalchem Tivakuam khawm an ti.)

¹⁸Melkizedek Salem lalchem, Chungnungchem Pathian bâwlpu nih chun Abram rangah sang leh uain a put piak le,

¹⁹mal a sâwm le, “Chungnungchem Pathian tual leh vân siamtu nih Abram chu malsâwm seh!

²⁰Chungnungchem Pathian na mêlma lakah nehnâk a nan pêktu chu sawr hen um seh!” a ti. Chun, Abram nih Melkizedek rangah a thil lâk parâ lû ah pakhat a pêk.

²¹Chun, Sodom lalchem nih chun Abram sinah “Thil na suh mi vial kil le, ka minung tla vial hawng ka pêk ko,” a ti

²²Abram nih a sinah, “LALPA Pathian Chungnungchem, tual leh vân Siamtu sinah,

²³na thil zeikhawm lâk lo ding hen lazâi leh pheikawk renhnâk tê men lâk lo ding hen siat kâ sirh. Abram chu ‘keimah nih ka neihtir mi,’ na ti lonâk ding hen:

²⁴Na tâ rerêng zeikhawm ka rangah ka lâk awt lo. Ka minung tla tâ cho lo chu. Sikhawmsele, hawng ka bawptu, Aner, Eskol leh Mamre nih chun an vo lâk na seh,” a ti