Read Bawm Chin GENESIS 15 Bible Online

GENESIS 15 - Bawm Chin bible

GENESIS 15

¹Chu nûn chun, Abram nih langhnâk a muh le, LALPA nih a sawnh mi a theih, “Abram, ṭih rîlmâl lah, vânduainâk ah mi ka nan hum lai le, lâwmman rokual tak ka nan pêk lai,” a ti

²Abram nih a sâng le, “Chungnungchem LALPA, fa ka nei lêm lo mi, zei lâwmman ṭha me na ka pêk awt? Kei rotingtu chu Damaska khua mi Eliezer cho asi.

³Fa na ka pêk lo ruangah chun, ka to-aw mi pakhat hi ka neih tingtu ding asi ko,” a ti

⁴Churawhchun, LALPA nih a sinah thu a sim nawlh mi chu a theih le, “Hi na to-aw Eliezer nih na ro â ting ding asi lo, nangmah fa ngelchel nih na ro chu â ting lai,” a ti.

⁵LALPA nih lênglei ah a suakpi le, a sinah, “Vân lei khi zauh le, ârfi tla khi rêl nik, khi zat khin na thlâk tla chu tamtak an um lai,” a ti.

⁶Abram nih LALPA a rinhsan, churuang chun LALPA nih a lawmh le, a thinlung a tawng.

⁷Churawhchun, LALPA nih a sinah, “Kei LALPA, Babulon ram ah mi Kaldai tla umnâk Ur khua thawk hen hi ram hi nangmah tâ ah a nan pêk ding hen a nan suakpitu chu ka si,” a ti.

⁸Sikhawmsele, Abram nih chun, “Chungnungchem LALPA, ka tâ asi ding mi zeitin ka theih kho lai?” a ti.

⁹LALPA nih a sâng le, “Chaw pakhat, kêl pakhat, dawrâ chal pakhat, kum thum mi hep leh vaṭhu pakhat leh lâilêng pakhat hawng ka put,” a ti

¹⁰Abram nih ran tla chu Pathian sinah a put le, a lâi ah a tan na le, anmah tan zâwn chiauah tlar nih hen a siah na le, vâ lam chu a tan na lo.

¹¹Ruaklâwmmu tla chu sa ruak tla lakah an hawng ṭum le, Abram nih a dâwi na.

¹²Nî a hawng tlâ rawh chun, Abram chu a it thlit le, a lakah thil ṭihnungkâi leh lâukâi tak a hawng um.

¹³LALPA nih a sinah, “Na thlâk tla chu mi ram ah an um lai le, chunah chun sal an si lai le, kum zali nehsawh hen an um lai.

¹⁴Sikhawmsele, anmah nehsawhtu phun chu ka rêp na lai le, mi ram mi an hawng suak tikah chun neihnâk rokual tak an suakpi lai.

¹⁵Nang chu tar khên hen na dam lai le, thlangam tak hen na thi lai le, an vûi lai.

¹⁶San li an si lân lo chu hinah na thlâk tla an hawng kîr nawlh lai loh, Amor tla chu rêp leh nar an si khonâk ding an sual thlo lân lo chu,” a ti.

¹⁷Nî chu a tlâ le, a hawng mûi rawh, mei bêl lakah meikhû leh meifâr alh chu lâkkhatko ah a hawng lang le, sa vo chan mi karah anna zî lemang.

¹⁸Chun, chunah chun LALPA nih Abram sinah thudân a tuk rawh. Hi hâwi hen a ti; “Hi ram hi Aigupta ramri thawk hen Eufretis Tipi tiang na thlâk tla ka pêk rawh.

¹⁹Chubang chu hi tla hi an si: Kenit, Keniz tla, Kadmon tla,

²⁰Hit mi, Periz mi, Rephaim,

²¹Amor mi, Kanaan mi, Girgasit mi leh Jebus mi ram tla an si.