Read Bawm Chin GENESIS 17 Bible Online

GENESIS 17 - Bawm Chin bible

GENESIS 17

¹Abram chu kum sâwmkua leh kum kua asi liauah LALPA chu a sinah â langh le, “Kei Pathian zeizawng tikho ka si. Ka thu ngâi le, thil dik ti kumza rawh.

²Na sinah thudân ka tuk lai le, thlâk tamtak ka nan pêk lai,” a ti.

³Abram chu tual tawngh khet hen a kûn; chun,

⁴Pathian nih, “Na sinah hi thudân hi ka tuk asi: phun tamtak thlâktu si ding hen ka nan tiamh.

⁵Na min chu Abram asi lai lo rawh, Abraham[5] asi lai rawh, phun tamtak thlâktu ah ka nan siam rawh ruangah.

⁶Thlâk tamtak ka nan pêk lai le, an lakah zeimaw mi chu lalchem an si lai. Thlâk tamtak na nei lai le, phun tla an hawng si lai.

⁷“Zungzâl thudântuk hâwi hen na sinah leh na thlâk tla hi nûnah um ding mi sinah ka thutiam chu ka theihkumza lai. Na Pathian ka si lai le, na thlâk tla Pathian khawm ka si lai.

⁸Hi mun, ram dang mi hâwi a nan umnâk hi na sinah leh na thlâk tla sinah ka pêk lai. Kanaan ram zawzawng hi na thlâk le tla tâ asi kumza lai le, kei chu an Pathian ka si lai,” a ti.

⁹Pathian nih Abraham sinah, “Nang leh na thlâk tla mâilei ah um ding mi tla nih ka thudântuk chu nan zûl vevê ding asi.

¹⁰Nang leh na thlâk tla nih nan lakah mipa fa fêm tan ding chu rem nan ti hep ding asi.

¹¹Tu thawk hen mipa fa zawng chu ni riat ni ah, sal nan in ah a suak mi leh ram dang thawk hen nan châwk mi khawm an fêm nan tan khap na ding asi. Hi hi nannih leh keimah karah thudântuk asi ti theihnâk ah asi.

¹³Mi kip fêmtan an si ding asi. Chu chu taksa leikâng thu ah zungzâl nan sinah thudântuk asi lai.

¹⁴Mipa fa fêmtan lo mi chu ka minung si lo mi ah ngaih asi lai. Ka thudântuk a zûl lo ruangah” a ti.

¹⁵Pathian nih Abraham sinah, “Na nupi khawm tu thawk hen Sarai asi lai lo rawh le, a min ah Sari[6] asi lai rawh.

¹⁶Amah chu mal ka sâwm lai le, amah thawk hen fapa ka nan pêk lai. Amah chu mal ka sâwm lai le, phun tla nu a hawng si lai, a thlâk tla lakah lalchem tla an hawng um lai,” a ti.

¹⁷Abraham chu a mêl tual tawngh khet hen a kûn le, a dawn dudup le, a nih a suak, “Mi kum zâ a tling nûnah fa nei kho asi awt ma le? Sari hi kum sâwmkua asi mi nih fa a nei kho awt ma?” a ti.

¹⁸Abraham nih, “Zei ruangah Ismael chu ka rotingtu asi awt lo zia?” ti hen Pathian a deih.

¹⁹Sikhawmsele, Pathian nih, “Silo. Na nupi Sari nih fapa a nan ring piak lai le, a min ah Isak[7] na sak lai. A sinah leh a thlâk tla sinah thudân ka tuk mi chu ka theihkumza lai. Chu chu zungzâl thudântuk asi.

²⁰Ismael thu ah na deihnâk khawm ka theih, churuang chun amah khawm mal ka sâwm lai le, fa tamtak leh thlâk tamtak ka pêk lai. Lal leinih pa ah ka siam lai le, a thlâk tla chu phun rokual tak ah ka siam lai.

²¹Sikhawmsele, na fapa Isak sinah thudân ka tuk mi chu ka theihkumza lai le, kumvei ah tu tik dingah Sari nih a ring ding mi chu,” a ti.

²²Pathian nih Abraham chu a sawnh dih rawh chun a kaltâk rawh.

²³Chu ni lîlâ ah chun Abraham nih Pathian thu zûl hen, a fapa Ismael leh a insung khurah mipa dang zawzawng a insung khur ah sal a suak mi leh a châwk mi chu an fêm a tan piak na rawh.

²⁴Abraham chu fêmtan asi liauah chun kum sâwmkua leh kum kua mi asi.

²⁵A fapa Ismael lam chu kum leithum mi asi.

²⁶An panih hen chu ni ah an fêm an tan le,

²⁷Abraham sal tla zawzawng khawm.