Read Bawm Chin GENESIS 21 Bible Online

GENESIS 21 - Bawm Chin bible

GENESIS 21

¹LALPA nih a tiamh mi hâwi hen Sari chu mal a sâwm le,

²a râi le, a tar nûnah Abraham rangah fapa a ring piak. Ngâksia chu a hawng suak lai ti hen Pathian nih a ti mi cham takah a suak.

³Abraham nih a min ah Isak a ti.

⁴Isak chu ni riat a tling liauah Pathian nih thu a pêk mi hâwi hen Abraham nih a fêm a tan piak.

⁵Isak a suak liauah Abraham chu kum zâ mi asi.

⁶Sari nih, “Pathian nih lâwmnâk leh nihnâk hawng ka pêk rawh, a theihtu zawng nih an hawng ka nihpi lai,” a ti.

⁷Amah ber nih, “Abraham a tar nûnah fapa ka ring piak mi leh fa ka pawm ding mi hi âu me sim khotu um lai?” a ti.

⁸Chun, ngâksia chu a hawng ṭhang le, nûk a tlei rawh chun, Abraham nih puai rokual tak a tuah.

⁹Ni khat chu, Aigupta nunau Hagar nih Abraham rangah fapa a ring piak mi Ismael leh Sari fapa Isak an pang.

¹⁰Sari nih a muh na le, Abraham sinah, “Hi salnu leh a fapa hi nar ving na. Ka fapa Isak nih a ting ding mi na neih, hi nunau fapa nih hin tingvo zeikhawm a nei kho lai lo,” a ti.

¹¹Hi thu nih hin Abraham chu thungâi a lawksawngtir, Ismael khawm a fapa asi bâk ruangah.

¹²Sikhawmsele, Pathian nih Abraham sinah, “Na salnu leh a fapa ruangah lawksawng lah, Sari nih a sim zia hen ti ko, thlâk tla ka nan tiamh mi kha Isak thawk hen ding mi asi ruangah.

¹³Hi salnu fapa rang khawm hin fa tamtak ka pêk bâk lai. Phun pakhat an hawng si lai le, anih khawm na fapa asi,” a ti.

¹⁴A thâituan zîngtê ah Abraham nih Hagar chu buh leh savun tî dûr tî khat phak mi a pêk. A dunglei ah a fa chu a pâwktir le, a kaltir rawh. Hagar chu a kal le, Bersheba ramkaro ah a vâi lemang.

¹⁵Tî a dih rawh chun, a fa chu thing bû tangah a siah thlap le,

¹⁶feet 300 tluk a lât hen a to. “A thinlung hen, ka fa thi ding mi ka zauh ngam lo,” a ti. Chunah a to liauah a ṭap rawh.

¹⁷Pathian nih ngâksia ṭap hâu a theih le, vân thawk hen vânmifial nih Hagar sinah, “Hagar, zeirangah ti ti na lawksawng? Ṭih lah. Pathian nih ngâksia ṭap hâu a theih rawh.

¹⁸Thawk le, va thawh le, va lêm rawh. A thlâk thawk hen phun rokual tak ka siam lai,” a ti.

¹⁹Chun, Pathian nih a mit a deitir le, tikhurchawh a muhtir. A kal le, savun tî dûr lakah tî khat phak a râwn le, ngâksia chu a pêk.

²⁰Ngâksia chu a ṭhang vima le, a sinah Pathian a um; Paran ramkaro ah a um le, sa kah thiam tak asi.

²¹A nu nih Aigupta mi nunau a nupi ah a ṭhît piak.

²²Chu liau chun Abimelek chu a kawrsen hotu Phikol hen Abraham sinah an va kal le, a sinah, “Thil na ti mi zawzawng lakah Pathian na sinah a um.

²³Churuang chun keimah leh ka fa tla leh ka thlâk tla na perpet na lo ding hen Pathian mâika ah thu tiam rawh. Na rangah zumh ka kâi hâwi hen ka lakah leh hi na umnâk ram ah um mi tla rangah zumhtlâk na si ding hen thu a tiam rawh,” a ti.

²⁴Abraham nih “Ka tiam e,” a ti.

²⁵Abraham chu Abimelek to-aw tla nih tikhurchawh an chuhpi na mi thu ah Abimelek sinah a phun.

²⁶Abimelek nih, “Âu nih dek a ti aw, ka theih loh, nang khawm nih hawng ka simh lo le, ka theih tîr cho asi,” a ti.

²⁷Churawhchun, Abraham nih dawrâ leh ranrual tla, Abimelek rangah a pêk; chun an panih hen remnâk thu an ruat rawh.

²⁸Abraham nih a ranrual lakah mi dawrâ fa pasarih a dangtê hen a thlei le,

²⁹Abimelek nih, “Zeirangah kha hâwi na ti,” a ti.

³⁰Abraham nih a sâng le, “Hi dawrâ pasarih hi hawng ka pawm piak le, hi ka ti mi ni hin hi tikhur chawh hi keimah chawh mi asi ti theihnâk ding hen,” a ti.

³¹Chu mun min ah chun Bersheba[11] a ti, an panih hen chunah chun thutiamhnâk an siam ruangah.

³²Hi Bersheba ah remnâk an siam thluh rawh chun, Abimelek leh Phikol chu Philistia ram ah chun an kîr nawlh rawh.

³³Chun, Abraham nih Bersheba ah Tamarik thing a phun le, Zungzâl Pathian LALPA chu a sawnh.

³⁴Abraham chu Philistia ram ah hun sâwt ual a um.