Read Bawm Chin GENESIS 22 Bible Online

GENESIS 22 - Bawm Chin bible

GENESIS 22

¹A nehnûnah chun Abraham chu Pathian nih a nik le, a sinah a kawh, “Abraham,” a ti. Abraham nih “Uai hinah ka um” ti hen a sâng.

²Pathian nih, “Na fapa na neihlem mi Isak na dâwt thlo mi kha put le, Moriah ram ah kal rawh. Chu ram mi tlâng kan muhtir ding mi ah chun bâwlnâk ah ka sinah hawng ap,” a ti.

³A thâituan zîngtê ah Abraham nih a bâwlnâk rangah thing châr a khawmh le, sanatung a phurhtir le, Isak leh a to-aw panih chu a sinah a put na. Pathian nih a simh mi mun ah chun kal ding anna thawh rawh.

⁴A ni thumnâk ah Abraham nih an kalnâk ding mun chu râl lât hen a muh.

⁵Churawhchun, a to-aw tla sinah, “Sanatung hen hinah um ko u, hi ngâksia leh kei chu chunah kan va kal lai le, Pathian kan va sawnh lai; chun nan sinah kan hawng kîr nawlh lai,” a ti.

⁶Abraham nih Isak rangah bâwlnâk ding thing châr a puttir le, anih nih chun nâmtê leh meiṭil tih ding mi a put. Munkhat hen an kal liauah,

⁷Isak nih a pa rangah “Pa!” a ti. “Zei me, ka fapa?” ti hen a sâng. Isak nih, “Mei leh thing chu a um le, sikhawmsele, bâwlnâk ding dawrâ chu ka muh lo ne e?” a ti.

⁸Abraham nih, “Pathian nih pakhat hawng kan pêk ko lai,” ti hen a sâng. An panih hen munkhat an kal vima.

⁹Pathian nih a simh mi mun chu an va tlung rawh. Abraham nih mâichâm a siam le, a tlûnah thing chu a timhtuah. A fapa chu a ṭêm le, mâichâm tlûnah mi thing pawng tlûnah a thâng.

¹⁰Thah ding hen a nâmtê zum chu a lirh rawh.

¹¹Sikhawmsele, vân thawk hen LALPA vânmifial nih, “Abraham, Abraham!” ti hen, a auh. Anih nih, “Uai, hinah ka um,” ti hen a sâng.

¹²“Ngâksia chu nganfâk pêk lah le, zeitin khawm ti lah” a ti. “Pathian na ṭih zia leh a lakah na fapa neihlem na ûi lo zia tuah ka theih rawh,” a ti.

¹³Abraham nih a kiangkam a zauh le, dawrâ chal, bua nih a ki a awh le, a tâng mi a muh. A va kal le, a tleih le, a fapa ruangrûl ah bâwlnâk ah a mang rawh.

¹⁴Abraham nih chu mun chu “Jehova-Jire’’ (LALPA nih a ruat) a ti. Tu tiang hen mi le tla nih, “LALPA nih a tlâng ah a ruat,” an ti.

¹⁵LALPA vânmifial nih Abraham chu vân thawk hen avei nihnâk ah a auh fâwn.

¹⁶“Keimah min sâl hen thu ka tiam, LALPA nih thu a sim bâwngmal tamtak ka nan sâwm lai. Na fapa neihlem mi ûi lo hen ka sinah hi hâwi thil na ti ruangah,

¹⁷na thlâk tla chu vân ah ârfi zat leh tipi kapah sep zat hen kan pêk lai. Na thlâk tla nih an mêlma tla an neh lai.

¹⁸Phun zawzawng tla nih an thlâk tla mal ka sâwm na mi hâwi hen malsâwmnâk an hawng ka deih lai. Ka thupêk zawzawng na zûl ruangah,” ti hen thu a tiamh.

¹⁹Abraham chu a to-aw tla sinah a kîr le, a rual hen a umnâk Bersheba leiah an kîr rawh.

²⁰Chu nûnah Abraham nih a unaupa Nahor rangah Milkah nih fa pariat a ring piak rawh mi a theih le:

²¹Uz chu fa tîr asi, Buz chu a unaupa asi, Kemuel chu Aram pa asi.

²²Kesed, Hazo, Pildas, Jidlap leh Bethuel

²³Rebek pa. Milkah nih hi fapa pariat hi Abraham naupa Nahor rangah a ring piak.

²⁴Reumah chu Nahor nupisûn asi le, Tebah, Gaham, Tahas leh Maakah a ring na.