Read Bawm Chin GENESIS 26 Bible Online

GENESIS 26 - Bawm Chin bible

GENESIS 26

¹Abraham um liau mi silo hen pâmnâk dang a hawng tlung le, Isak chu Philistia lalchem Abimelek Gerar ah a um mi sinah a va kal.

²LALPA chu Isak sinah â langh le, hi hâwi hen a ti: “Aigupta ah kal lo hen um ka nan tinâk ram ah hin um ko.

³Hinah um ko, na sinah ka um lai le, mal ka nan sâwm lai. Hi ram tla zawzawng hi na thlâk tla leh nangmah rangah ka nan pêk lai. Na pa Abraham sinah thu ka tiamh mi khawm ka theihkumza lai.

⁴Vân ah mi ârfi zat hen thlâk tla ka nan pêk lai. Hi ram zawzawng tla hi ka pêk na lai. Na thlâk tla mal ka sâwm na mi hâwi hen phun zawzawng nih an hawng ka deih lai.

⁵Abraham nih ka dân leh thu a ngâi hen a zûl ruangah mal ka nan sâwm lai,” a ti.

⁶Churawhchun Isak chu Gerar ah a um.

⁷Chunah mi tla nih a nupi thâwngthâng an deih le, “Ka farnu,” a ti. Chu ram mi tla nih a nupi Rebek mêlṭha tak an duh ruangah an thah lai ti a ṭih ruangah ka nupi a ti ngam lo.

⁸Isak chu chunah sâwt ual a um rawh chun Abimelek nih a langawtkawt thawk hen a zauh le, Isak leh Rebek anna dâwt zia a muh na.

⁹Abimelek nih Isak sinah mi a fial le, hi hâwi hen a ti, “Na nupi asi ko mi! Zeirangah ka farnu na ti zia?” a ti. Anih nih, “Ka nupi ka ti chun nan ka thah lai ti ka ruat ruangah,” ti hen a sâng.

¹⁰“Kan lakah zei zia hi hâwi na ti?” a ti. Abimelek ber nih, “Ka minung âutal nih na nupi hi awl tak hen an ihpi lai le, kan sualnâk mawh chu nangmah mawh asi lai,” a ti.

¹¹Abimelek nih mipi tla a ṭhih na le, “Âuzawng hi minung leh a nupi nehsawhtu chu thah an si lai,” a ti.

¹²Isak nih chu ram ah chun thlâi a chîng le, a tuh kum ah mi a leh zâ a tawng, LALPA nih mal a sâwm ruangah.

¹³A dingchang vima le, mi nei tak a hawng si.

¹⁴Dawrâ rual tla leh ranrual tla leh to-aw tla tamtak a nei ruangah Philistia mi nih amah chu an nahsuah rawh.

¹⁵Churawhchun a pa Abraham a dam liauah an to-aw tla nih an chawh mi tikhur chu an silh piak hep na.

¹⁶Abimelek nih Isak sinah, “Kan ram kaltâk ving, kanmah ngâk hen thil na ti kho dauh rawh,” a ti.

¹⁷Churawhchun, Isak nih a kaltâk le, Gerar Kuam ah um mun a khuar le, chunah zeimaw tiang ding a um rawh.

¹⁸Abraham dam liauah tikhur a chawh le, a thih nûnah Philistia mi nih an khap mi chu a chawh nawlh fâwn. Isak nih chu tikhurchawh chu a pa nih a phuah ziatê hen a min a phuah nawlh.

¹⁹Isak to-aw tla nih tivakuam ah chun tikhur an chawh le, ti an tawng.

²⁰Gerar mi dawrâpu leh Isak dawrâpu tla anna tawh le, “Hi hi kanmah tâ asi,’’ ti hen Isak nih chu tikhurchawh chu “Esek’’ (Tawhnâk) ti hen a sak.

²¹Isak to-aw tla nih tikhur dang an chawh nawlh le, chu lak khawm tawhnâk a um fâwn le, churuangah a min ah “Sitna’’ (Mêlmâknâk) a ti.

²²Chu thawk hen mun dangah â ṭhial le, tikhur dang a chawh nawlh. Hi lak lam chun tawhnâk a um lo rawh, churuangah a min ah “Rehobot’’ (Thawsuaknâk) ti hen a sak. “Tu lam chun, LALPA nih hi ram ah hin thawsuaknâk hawng kan pêk rawh le, hi ram ah hin kan sul-le-lam a tluang vima lai rawh,” a ti.

²³Isak nih chu mun chu a kaltâk le Bersheba ah a va kal.

²⁴Chu zân ah chun a sinah LALPA â langh le, hi hâwi hen a ti, “Kei hi na pa Abraham Pathian ka si, lâu rîlmâl lah; na sinah ka um, ka to-aw Abraham sinah thu ka tiamh mi ruangah mal ka nan sâwm lai le, thlâk tamtak ka nan pêk lai,” a ti.

²⁵Isak nih chunah mâichâm a siam le, LALPA a sawnh. Chunah um mun a khuar nawlh le, a to-aw tla nih tikhur dang an chawh.

²⁶Abimelek chu Gerar thawk hen ti dân ding simhtu Ahuzat leh a kawrsen hotu Phikol hen Isak sinah an kal.

²⁷Churawhchun Isak nih, “A lânah nan ram ah um ding nan ka duh lo le, nan ka hua thlo mi, zei zia keimah muh ding hen nan hawng zia,” a ti.

²⁸Annih nih an sâng le, “Tu chun LALPA na sinah a um ti kan theih le, nang leh kannih karah remnâk bir tak siam ding ṭha kan ti.

²⁹Kannih nih nganfâk zeikhawm kan pêk lo mi hâwi hen nang khawm nih hawng kan pêk bâk lo ding hen thu na tiam ding kan duh,” an ti. “Na lakah khua kan ruat le, thlangam tê hen kan kaltir le, tu chun LALPA nih mal an sâwm tak ti a lang,” an ti.

³⁰Isak nih an rangah puai a tuah piak na le, an din hen an ei rawh.

³¹A thâituan zîngtê ah mikip nih mah thutiam chiau siatsirh hen an birhtir. Isak nih dam bâk u ti hen hâwikawmh ṭha tak si hen an ṭian rawh.

³²chu ni lîlâ ah chun, Isak to-aw a hawng le, an tikhurchawh thu chu a hawng simh, “Tî kan tawng rawh” an ti.

³³Chu tikhurchawh min chu “Siba’’ (Thutiamnâk) a ti. Chu chu asi Bersheba[16] khuapi nih min a putnâk san chu.

³⁴Esau chu kum sâwmli a tling ah Hit mi nungâk panih a umpi na, Beri fanu Judit leh Elon fanu Basemat an si.

³⁵Rebek leh Isak um nuamtir lotu an si.