Read Bawm Chin GENESIS 3 Bible Online

GENESIS 3 - Bawm Chin bible

GENESIS 3

¹LALPA Pathian siam mi lakah rûl chu a fing perpê chem. Rûl nih nunau sinah, “Pathian nih dûm lakah mi thing rah zeikhawm hi nan ei ding asi lo a nan ti tak na ma?” a ti

²Nunau nih chun, “Hi dûm ah mi thing rah zeital hi kan ei kho,

³a lâi ah mi tilo chu. Pathian nih a rah nan ei ding asi lo, tawngh khawm nan tawngh ding asi lo, nan ei chun nan thi lai hawng kan ti,” ti hen a sâng.

⁴Rûl nih chun, “Âwkrâwl, nan thi lai lo,” ti hen a sâng.

⁵“Pathian nih nan ei chun amah bang hen nan um lai le, a sia a ṭha nan theih awt mi a theih ruangah a ti mi makha a!” a ti

⁶Nunau nih thing ṭha tak leh rah dawh tak chu a muh le, ei hen hawng fing ding mi chu a chê awt chiam ê ti hen a ruat. Churawhchun a rah zeimaw mi chu a kawih le, a ei rawh. Chun, a pasal khawm zeimaw mi chu a pêk le, anih khawm a ei rawh.

⁷An ei kâ hen theihthiamnâk an hawng nei le, takkaro an si zia anna theih rawh; churawhchun theipi nah an ṭhit le, anna aih.

⁸Chu zânlei ah chun LALPA Pathian chu dûm ah a hawng mi an theih le, thing nâwngah an thuptâk.

⁹Sikhawmsele Pathian nih mipa chu a kawh le, a sinah, “Zeiah na um?” a ti

¹⁰Anih nih, “Dûm ah na um mi ka theih le, takkaro ka si ruangah ka ṭih le, ka nan thuptâk asi,” ti hen a sâng.

¹¹“Takkaro na um mi âu nih an simh?” ti hen Pathian nih a deih. “Thing rah ei lo ding kan ti na mi kha nan ei mu?” a ti.

¹²Mipa nih chun, “Nunau ka sinah mi nih khan theirah chu hawng ka pêk le, ka ei ko rawh,” a ti.

¹³LALPA Pathian nih nunau sinah, “Zeirangah na ti êu?” a ti. Nunau nih chun, “Rûl nih ei ding hen hawng ka perpet mi chu a,” ti hen a sâng.

¹⁴Chun, LALPA Pathian nih rûl sinah chun, “Hi ruangah hin rêp na si lai le, nangmah cho nih ram sa zawzawng lakah hi siat hi na phurh lai: Tu thawk hen na pâw hen na lâwn lai le, na dam sung zawngah valeidip na ei ding asi.

¹⁵Nang leh hi nunau hi kan huatir na lai; na thlâk leh a thlâk anna mêlma kumza lai. A thlâk nih na lû thî a suah lai le, nangnih a thlâk tla kê na chuk lai.

¹⁶Churawhchun nunau sinah, “Na naupâwi hamhnâk leh na fa ringnâk nganfâk ka zualtir lai. Hi hâwi sikhawmsele na pasal duhnâk na nei kumza lai, anih nih na tlûnah thu a nei lai,” a ti.

¹⁷Chun, mipa sinah, “Na nupi thu na ngâi le, ei lah ka nan ti mi theirah kha na ei rawh. Chu na thilti ruangah chun tual chu siatbarh asi rawh. Na dam kar zawzawng ei tawng ding hen hamh tak hen rian na ṭuan lai rawh.

¹⁸Ling leh bua tla a zan lai le, mâng ah a kho mi tla na ei lai.

¹⁹Siam hen na umnâk valei ah na kîr nawlh lân lo chu, tual nih rah suah ding hen thlan suak hen hamh tak hen rian na ṭuan ding asi. Valei thawk hen siam na si le, valei lîlâ ah na chang nawlh lai,” a ti.

²⁰Adam[1] nih a nupi chu Evi ti hen a min a sak, minung zawzawng nu asi ruangah.

²¹Chun, LALPA Pathian nih Adam leh Evi rangah ran vun hen puan a siam piak na le, a aih na.

²²Chun, LALPA Pathian nih, “Tuah chun minung chu kan lakah mi pakhat hâwi a hawng si rawh hen, a sia leh a ṭha theihnâk a nei rawh. Nungnâk thing rah ei hen nung kumza ding siang asi lai lo rawh,” a ti.

²³Churawhchun LALPA Pathian nih Eden dûm ah mi chu amah siamnâk tual nâwn ding hen a nar rawh.

²⁴Chun, Eden saklei sîrah chun thil nung tla leh nâmsâu alh zeilei zawng â zî kho mi a siah. Âuzawng nungnâk thing kiangah a hawng mi tla lakah vêng ding hen.