Read Bawm Chin GENESIS 33 Bible Online

GENESIS 33 - Bawm Chin bible

GENESIS 33

¹Jakob nih Esau chu minung zali hen a hawng mi a muh le, a fa le tla chu Leah, Rakel, leh a nupisûn panih tla sinah a ṭhen khuai na.

²A mâilei chem ah a nupisûn leh an fa tla, chu zûl ah Leah leh a fa tla, a madungchem ah Rekel leh Josef.

³Jakob chu mâilei chem ah a va kal le, vei sarih tual lei kûn hen a mâimûk.

⁴Esau chu a tawng ding hen amah leiah chun a va tek le, a râlthuam chu a kiangah a siah le, a va châwchawk, an ṭap vevê rawh.

⁵Esau chu â hâwi le, nunau ngâksia tla chu a muh na le, “Na sinah mi minung tla hi âu tla me an si?” ti hen a deih. Jakob nih, “Ka u, hi bang tla hi Pathian ka lakah a ṭha ruangah hawng ka pêk mi asi,” a ti.

⁶A nupisûn tla chu an fa tla hen an hawng le, Esau rangah mâi an mûk.

⁷Chun, Leah leh a fa tla khawm an hawng, a dawnghnâk ah Rakel leh Josef khawm an hawng le, mâi an mûk bâk.

⁸Esau nih, “Zapi minung ka tawng na mi kha zeitin mi? Kha zei zia?” a ti. Jakob nih a sâng le, “Na thinlung ka tawng khonâk ding ka ti le ma kha a,” a ti.

⁹Esau nih, “Unaupa, kei khawm ka nei tâwk rêng bâk, na neih chu nangmah nih a ting ko,” a ti.

¹⁰Jakob nih, “Silo, zângfahtê hen na thinlung ka tawng tak mi asi chun ka thilpêk hi lâk rawh,” a ti. Na mêl muh hi Pathian mêl muh tluk hen ka ruat, tuah hi tluk hen ka lakah na ṭha.

¹¹Na rangah ka hawng put mi lâwmman hi zângfahtê hen hawng ka lâk piak ko; Pathian ka lakah vêl a nei le, ka herh mi zawzawng a hawng ka pêk,” a ti, lâwmman chu a lâk lân lo a pêk êu.

¹²Esau nih, “Kal ding hen lam kanna tîm lai rawh, kei mâilei chem ah ka ka lai,” a ti.

¹³Jakob nih a sâng le, “Ngâksia tla hi an chak lo zia leh dawrâ leh ranrual leh an fa tla kilkâwi an herh zia khawm na theih ko; tâwm khulrang hen kan khalh na asi chun ni khat ko khawm an thi ver lai.

¹⁴Kan mâilei ah kal vima le, kan ranrual leh an fa tla hen Edom ram na umnâk tiang hen dusah hen kan zûl lai,” a ti.

¹⁵Esau nih, “Takhan chun, ka minung zeimaw zat chu ka nan mâk piak na lai ne,” a ti. Sikhawmsele, Jakob nih a sâng le, “Zeirang khawm a herh loh, na thinlung tawng cho ka duh,” a ti.

¹⁶Churawhchun, chu ni chun Esau chu Edom ram leiah chun a kîr rawh.

¹⁷Sikhawmsele, Jakob chu Sukot ah um mun a khuar, a ran leh amah umnâk ding hen. Churuangah asi chu mun chu Sukot an ti nâk chu.

¹⁸Jakob chu Mesopotamia ram thawk hen a kîr le, Kanaan ram ah Sekem khuapi chu him tak hen a va tlung rawh, khuapi kiangah mi phâiah um mun a khuar.

¹⁹Chu mun khingkhuai chu Sekem pa Hamor thlâk tla thawk hen tangka zâ hen a châwk.

²⁰Chunah chun mâichâm a siam le, a min ah Israel Pathian min suangkhâng hen “El-elohe’’ a ti.