Read Bawm Chin GENESIS 34 Bible Online

GENESIS 34 - Bawm Chin bible

GENESIS 34

¹Ni khat chu Jakob leh Leah fanu Dinah chu Kanaan nunau zeimaw mi sinah a va kal.

²Hamor fapa Sekem, Hiv mi, ram pakhat hotu nih a muh le, a tleihrêm hen a ihpi rawh.

³Churawhchun chu nunau chu thungâi a mêldî le, a nunau nih duh ding ko hen â ṭang.

⁴Sekem nih a pa sinah, “Hi nungâk hi ka nupi rangah hawng ka lâk piak,” a ti.

⁵Jakob nih a fanu thangnawmh hen a um mi chu a theih le, a fapa tla ran ruangah phâi ah an kal mi an hawng tlung lân lo chu zei thu khawm a sim lo.

⁶Sekem pa Hamor chu Jakob sawnh ding hen a kal le,

⁷chu chu Jakob fa tla phâi thawk hen an hawng kîr lântê asi. Chu thu an hawng theih rawh chun, an thinlung a purh khit le, Israel mipi zauhnawmh hen Sekem nih Jakob fanu a tleihrêm mi thu ah thungâi an thin a thawk.

⁸Hamor nih a sinah, “Ka fapa Sekem nih na fanu thungâi a duh le, zângfahtê hen umpitir râu rawh.

⁹Nan mi leh kan mi tla kar ah nupi pasal umhtawnh kho ding hen remnâk kan siam lai.

¹⁰Churawhchun hi kan ram ah kan sinah na um kho bâk lai le, na duhnâk mun zawngah na um kho lai; thawsuak tak hen sâw na leh lai le, thil tla na nei lai,” a ti.

¹¹Sekem nih Dinah pa leh a unau sinah, “Hi hi rem ti ule, nan duh mi zawng kan pêk na lai.

¹²Zei lâwmman nan duh, hawng ka simh ule, nan fanu man rangah zeizat tal si seh, nan duh zia zia hen hauh ule; nan ka deih mi zawng chu kan pêk na lai, amah hi nan hawng ka umpitir phawt chun,” a ti.

¹³Sekem nih an farnu chu thang a nawmh rawh ruangah Jakob fa tla nih Sekem leh a pa Hamor chu perpet leikâng hen an sâng.

¹⁴A sinah, “Fêmtan lo mi chu kan farnu kan umpitir kho lo, kan rangah ningzak a kâi awt.

¹⁵Kanmah hâwi hen nan mipa vial fêm tan ver tik cho ah rem kan ti kho lai.

¹⁶Chu hâwi asi tikah a umhtawnh ding rem kan ti lai le, nan sinah um hen murui khat kan si kho lai.

¹⁷Sikhawmsele, kan remruatnâk hi nan pawm lo hen fêm nan tan lo chun, kan farnu hi kan lâk lai le, kan kal ving awt,” an ti.

¹⁸Hi remruatnâk hi Hamor leh a fapa Sekem nih ṭha ual hen an theih.

¹⁹Tlangvâlpa nih Jakob fanu chu a duh tuktarâi le, an thuruat chu ti reh ding a duh, amah chu an dâwngsung lakah a lukhâi chem asi.

²⁰Hamor leh a fapa Sekem chu an khua kulh kawtkâ tohâwngnâk mun ah an va kal le, an khua mi tla sinah an va sim:

²¹“Annih tla khi kanna tlâk thlo le, hi ram ah hin kan sinah um bâk na sele, duh duh hen tlawng le lêng na bâk seh, ram tâ nih anmah rang ding hen a kâu tâwk rerêng: an fanu tla kan umpi na lai le, kannih fanu tla khawm umpi na bâk seh.

²²Hi minung tla hi kan sinah um hen murui khat si ding hen chun a san pakhat cho a um, chu chu anmah tla hâwi hen kan mipa tla vial an fêm tan hep ding mi chu asi.

²³An thil neih zawzawng leh thil dang tla khawm kan tâ asi bâk awt lo ma? Kan sinah um na bâk ding hen rem kan ti ko lai,” an ti.

²⁴Chu khuapi mi minung tla zawng nih Hamor leh Sekem thusim chu rem an ti le, mipa vial nih an fêm an tan hep.

²⁵Ni thum nûnah chun an fêmtan mâ a fâk liau chir ah, Jakob fapa panih Simeon leh Levi, Dinah ṭapa nih chun an nâmsau an lâk le, khuapi ah an va kal le, theih manh lân karah an mipa tla an thah ver na.

²⁶Hamor leh a fapa Sekem khawm an thah sih. Sekem in ah mi Dinah chu an kalpi ving.

²⁷Chu an thah na nûnah Jakob fapa dang tla nih khua chu an va rawk le, an farnu thang an nawmh mi ruangah phû an lam:

²⁸Ranrual tla, dawrâ, sanatung tla leh khuapi ah mi thil dang tla phâisen ah mi hen an lâk.

²⁹Thil sung tatak tla an lâk le, an nunau leh an fa tla zawzawng leh in ah mi thil zawzawng an kalpi hep.

³⁰Jakob nih Simeon leh Levi sinah, “Ka lawksawngnâk nan siam; tu chun Kanaan mi tla, Periz mi tla leh hi ram mi zawzawng nih an hawng ka hua lai rawh; minung tâ nih tam ka nei lo; thu anna rual hen an hawng ka do chun, kan dâwngsung zawzawng vei dep ding asi ko rawh,” a ti.

³¹Sikhawmsele, annih nih, “Kan farnu hi nunau â zuar mi hâwi hen a ti mi kan duhzia asi lo,” an ti.