Read Bawm Chin GENESIS 38 Bible Online

GENESIS 38 - Bawm Chin bible

GENESIS 38

¹Chu liau chun Juda nih a unau tla a kaltâk le, minung pakhat a min Hirah, Adullam khua mi sinah um ding hen a va kal.

²Chunah chun Juda chu Kanaan mi nunau Sua fanu hen anna tawng. A umpi le,

³fapa a ring piak le, a min ah Er a sak.

⁴A râi nawlh le, fapa dang a ring nawlh, a min ah Onan a sak.

⁵Fapa a nei nawlh le, a min ah Selah a sak, chu a fa a suak liau chun Juda chu Akzib ah a um.

⁶A fa tîr Er rangah Juda nih a nupi Tamar a lâk piak.

⁷Er chu a sual thlo le, LALPA a lawmhtir lo thlo, churuangah LALPA nih anih chu a thah rawh.

⁸Churawhchun Juda nih Er unaupa Onan sinah, “Kal le, na unaupa nupi va ihpi; a pasal unaupa na si ruangah na ti ding mi chu va lim rawh, churawhchun na unaupa nih thlâk tla a nei khonâk ding hen,” a ti.

⁹Sikhawmsele, Onan nih chun fa nei khawmsele kei fa ding asi lêm lo a ti le, a ihpi kipah anna pâwl mi thisen chu lênglei ah a zut tir vima, a unaupa rangah chi a thlâk kho lonâk ding hen.

¹⁰Chu a thilti nih LALPA lung a sitir lo le, anih khawm chu LALPA nih a thah bâk rawh.

¹¹Juda nih a monu Tamar sinah “Na pa in leiah va kîr le, ka fapa Selah hi a nupi neih a zâ lân lo chu, chunah numei hâwi hen va um rawh,” a ti. Hi a tinâk san chu Selah khawm a unau tla hâwi hen thah hen a um bâk lai ti a ṭihṭanh ruangah asi; churawhchun Tamar chu a pa in leiah a kîr rawh.

¹²A nehnûntê chun Juda nupi chu a thi le, a ulh mi ni tla a len le, a hâwipa Hirah, Adullam mi hen Timnah ah an va kal le, chunah chun dawrâ mul an mêt.

¹³Mi âumawh nih Tamar sinah, “Na ṭangpa chu a dawrâ mul mêt ding hen Timnah leiah a kal awt,” ti hen a simh.

¹⁴A numei thuam hen â thuam mi chu a lît le, a mêl chu puan hen a khuh le, Timnah khua leiah a kalnâk lampi Enaim tualmâi ah a to. Juda fapa a tlum chem mi Selah chu nupi nei zâ ko na hen a umhtir na dah lo rih ti a theih ruangah.

¹⁵Juda nih a muh le, a mêl a khuh ruangah â zuar mi nunau si ding hen a ruat.

¹⁶Lamvâu ah a ihpi le, a sinah, “A man zeizat na hauh awt?” a ti (a monu asi ti a theih loh.) A monu nih, “Zei na ka pêk awt?” a ti.

¹⁷Juda nih, “Kêl lâ, ka ranrual lakah mi kan kuat lai,” a ti. Anih nih, “A ṭha, na ka tiamh mi kêl na ka kuat lân lo chu thil zeimawh kil ding hen na ka pêk ding a suak lai,” a ti.

¹⁸“Chu thutiamnâk rang ding hen zei kan pêk lai,” a ti. Nunau nih a sâng le, “Na min dehnâk, a rî leh na put mi ṭhianṭhunh,” a ti. Churawhchun a pêk le, a ihpi le, a râi rawh.

¹⁹Tamar chu in leiah a tlung le, a nipuan a lît le, a numei puan chu â aih nawlh.

²⁰Juda nih a hâwipa Hirah chu nunau rangah kêl lâ va pêk hen, thu a tiam mi thil tla va lâk ding hen a fial. Sikhawmsele Hirah nih chu nunau chu a tawng kho lo.

²¹Mi âu tla mawh, Enaim khua mi a deih na le, “Nunau â zuar mi lamvâu ah a to mi kha zei me a um?” a ti. Annih nih an sâng le, “Â zuar mi nunau zeiliau khawm hinah a um lo,” an ti.

²²Chun, a va kîr le, Juda sinah, “Ka tawng kho loh, chunah um mi tla nih â zuar mi nunau rerêng a um lo,” an ti.

²³Juda nih, “Thil tla kha a ting pawt ko seh, mi nih an hawng kan nihsanh salam lai, pêk ding ka tum le, khawmsele na hei tawng lo mi chu,” a ti.

²⁴Thla thum nûnah mi âumawh nih Juda sinah, “Na monu Tamar â zuar mi hâwi hen thil a ti le, a râi rawh,” a ti. Juda nih, “Suah ule, thi thlo hen rawh ko u,” ti hen thu a pêk.

²⁵An tleih rawh chun, a ṭangpa sinah thu a thanh le, “Hi thil neitu nih a hawng ka raih mi asi. Hi bang min dehnâk, a rî leh ṭhianṭhunh tla hi âu tâ me si zauh set nik,” a ti.

²⁶Juda nih a theih le, “Hi nunau hi a dik asi, ka fapa Selah hen ka umhtir na lo mi ka mawh asi,” a ti. Juda nih a ihpi pawt lo rawh.

²⁷A nau neih a zâ rawh chun, fa phîr a pâwi ti a theih.

²⁸Seng a pêk rawh chun, pakhat nih a bân a hawng suah le, nau dawmhtu nih la zâi a sen mi a khih le, “Hi hi a suak masa mi asi,” a ti.

²⁹Sikhawmsele, a bân chu a nûk nawlh ving, a unau pakhat chu a suak masa dauh. Chun, nau dawmhtu nih chun, “Hi hi na hawng suak ding dân chu asi ma hi a!” a ti le, a min ah Perez[32] a sak.

³⁰Chun, a nehnûnah a unau lasen zâi khih mi a hawng suak le, a min ah Zerah a sak.