Read Bawm Chin GENESIS 4 Bible Online

GENESIS 4 - Bawm Chin bible

GENESIS 4

¹Churawhchun Adam chu a nupi hen nu leh pa anna theih le, pum lâwng lo hen a hawng um rawh. Fapa a ring le, “LALPA ṭangpi hen fapa ka nei rawh,” a ti. A min ah Kain ti hen a sak.

²A nehnûn ah fapa dang Abel a ring nawlh. Abel chu dawrâ vêngtu asi le, Kain lam chu phâisen tuahtu asi.

³Hun zeimaw zat nûnah Kain nih chun LALPA rangah a phâisen ah mi thlâi zeimaw zat a pêk.

⁴Abel nih chun a dawrâ rual lakah a suak masachem mi a lâk le, a thah le, a mehtît a ṭha chem mi LALPA rangah a pêk. Abel leh a thilpêk nih chun LALPA a lawmhtir.

⁵Kain leh a thilpêk lam chu a lawmh lo. Kain chu thungâi a thinthawk le, a râng.

⁶Chun, LALPA nih Kain sinah, “Zeirangah na thin a thawk? Zeirangah kha nih thinthawk mêl an puttir?

⁷Thil dik ti le chu na nihsuak ding mi; khawmsele thilsual na ti ruangah sualnâk nih na inkhâr bul ah an bawh ko. Chu sualnâk nih chun na tlûnah thuneih a duh le, chu chu na neh ding asi,” a ti.

⁸Kain nih a unaupa Abel sinah, “Phâisen ah kan kal lai,” a ti. Phâisen leiah an kal rawh chun a naupa leiah Kain chu â her le, a thah rawh.

⁹LALPA nih Kain rangah, “Na unaupa Abel zeiah a um?” ti hen a deih. “Ka theih loh, ka unaupa zauhkhenhtu ma ka si?” ti hen a sâng.

¹⁰Churawhchun LALPA nih a sinah, “Zeirangah hi thil ṭihnungkâi hi na ti? Na unaupa thisen nih tual thawk hen aw-hâu bang hen phû lam ding hen hawng ka auh.

¹¹Siatbarh na si rawh le, tual na nâwn kho lai lo rawh. Na thah liauah tual nih a kâ âng hen a bawh mi hâwi hen na unaupa thisen nih a chinh.

¹²Tual ah thlâi chîng ding tum khawm le, tual nih zeikhawm a nan suah piak lai loh. Tual ah umnâk neilo hen mi rawkrawl na si lai,” a ti.

¹³Churawhchun Kain nih LALPA sinah, “Hi rêpnâk hi tuar ding hen ka rangah a fâk tuktarâi.

¹⁴Hi ram leh na mâika mi hi na hawng ka nar ving chun tual ah hin in neilo hen mi rawkrawl ka hawng si lai le, an hawng ka muhtu zawng nih an hawng ka thah lai,” a ti.

¹⁵LALPA nih a sâng le, “Thah lai le a! Âutal nih a nan thah chun a leh sarih hen phû lam asi lai,” a ti. Churawhchun LALPA nih a muhtu zawng nih thah lo ding hen Kain a singsiah rawh.

¹⁶Chun Kain chu LALPA mâika ah mi chu a kal le, “Vâinâk” ram an ti mi mun ah a um rawh, chu chu Eden saklei asi.

¹⁷Kain leh a nupi nih fa an nei le, a min ah Enok an sak. Chun, Kain nih khuapi a siam le, a fapa ti san hen min a phuah.

¹⁸Enok nih fapa Irad a nei, Irad nih fapa Mehujael a nei, chun Mehujael nih fapa Methusael a nei; Methusael nih fapa Lamek a nei.

¹⁹Lamek nih nupi panih a nei le, Adah leh Zillah an si.

²⁰Adah nih Jabal a ring, anih chu puanin ah umtu leh ran vulhtu tla thlâktu asi.

²¹A unaupa min chu Jubal asi le, anih chu tumphung leikâng ṭingṭang leh theikhang tumtu thlâktu asi.

²²Zillah nih Tubal Kain a ring le, anih chu dâr leh thîr ruakhâu chi kip siamtu tla thlâktu asi. Tubal Kain farnu chu Naamah asi.

²³Lamek nih a nupi tla sinah, “Adah leh Zillah, ka thusim ngâi u; tlangvâl pakhat nih hawng ka vuak le, ka thah.

²⁴Kain thah ruangah lehrûl a lehsarih hen sam asi chun kei hawng ka thahtu chu a leh vei sâwmsarih pasarih hen sam asi lai,” a ti

²⁵Adam leh a nupi nih fapa dang an nei. Evi nih, “Kain nih a thah mi ruangrûl ah Pathian nih fapa hawng ka pêk,” a ti. Churawhchun a min ah Seth[2] ti hen a sak.

²⁶Seth nih fapa a nei le, a min ah Enos a sak. Chu thawk chun mi tla nih sawnhnâk ah LALPA min thenhlimh lam anna dawmh rawh.