Read Bawm Chin GENESIS 44 Bible Online

GENESIS 44 - Bawm Chin bible

GENESIS 44

¹Josef nih a in sung hotu to-aw sinah, “Hi minung tla hi an vûitun lakah fâng an phurh kho rirî hen râwn piak na le, an vûitun chiauah an tangka kha a tlûnah sanh piak na.

²Chun, ka tangka hâi kha a ngâksia chem mi vûitun tlûnah sanh piak le, a fâng man tangka khawm munkhat hen sanh piak,” ti hen thu a pêk le, chu hâwitê hen a to-aw nih a ti rawh.

³A thâizîng zîngtê ah an sanatung tla hen an tlung rawh.

⁴Chun, khuapi thawk hen lâtpi an kal lânah, Josef nih a to-aw sinah, “Tuah kha minung tla kha va ṭhâwl na le, na phanh na rawh chun, ‘Zeirangah ṭhatnâk chu siatnâk hen nan rulh?

⁵Zeirangah ka hotupa tangka hâi nan fîr? Chu chu ka pu uain dinnâk leh chamchawhnâk ah a mang mi asi lo ma? Thilsual fâk tak nan ti asi va ti,” a ti.

⁶To-aw chu an sinah a va tleng rawh chun, chu thu lîlâ chu a va sim nawlh.

⁷Annih nih, “Pu, hi hâwi thu hi zeitin na sim zia? Chu hâwi thil kan ti lo zia chu siat khawm kan tleih ngam.

⁸Kan vûitun lakah tangka kan tawng mi khawm Kanaan ram thawk hen kan hawng kîrpi ti na theih ko khateh; zeitin na hotupa in ah mi tangka mawh ngûn chu kan lâk zia lai?

⁹Kan lakah âu sin tal ah tawng asi chun thah si seh, kannih tla khawm na sal si ver ko seh,” an ti.

¹⁰Anih nih, “Asi, hâi ka tawngnâk cho ka sal asi lai le, a dang tla lam chu zeikhawm nan pawi lai loh,” a ti.

¹¹Mawhsareh hen an vûitun chu an ṭhumh rang le, mikip nih mah vûitun chiau an awng.

¹²Josef to-awpa nih thiamthih tak hen a hâwl le, upachem mi thawk hen a dawmh le, a ngâksia chem mi tâ lakah a dawngh. Hâi chu Benjamin vûitun lakah a tawng rawh.

¹³An unau rual hen an ngaihsia tuk le, an puan tla an thlêk, an sanatung tla chu thil an phurhtir le, khuapi leiah an kîr nawlh rawh.

¹⁴Juda leh a unau tla chu Josef in ah an va kal le, Josef khawm a in ah a um ko rih, a mâika ah an kûn le, mâi an mûk.

¹⁵Josef nih, “Zei thil me nan ti mi a um? Hi ka mun ah mi pa nih hin chamchawh hen a nan theih kho na ti nan theih lo ma?” a ti.

¹⁶Juda nih “Pu, na sinah zei thu me kan sim kho lai rawh? Zeitin kan âwl kho lai? Zeitin kanna lît kho lai rawh? Pathian nih kan sualnâk a langh rawh ma hi, hâi nan tawngnâk minung cho silo hen kan ektê hen na sal kan si hep rawh,” a ti.

¹⁷Josef nih, “Silo, chu hâwi hen ka ti dah loh; hâi tawngnâk cho ka sal asi lai le, a dang vial chu him tak leh dam tak hen nan pa sinah nan kîr kho lai,” a ti.

¹⁸Juda chu Josef sinah a va kal le, “Pu, zângfahtê hen na sinah thusim ding hawng ka pêk, ka lakah thinrun lah le; nang chu lalchem tluk na si.

¹⁹‘Pu, pa nan nei ma? Unau dang nan nei ma?’ ti hen na kan deih.

²⁰Kannih nih, ‘Pa tar tak kan nei, kan nau pakhat a tar nûnah a ring mi a um. Chu unaupa chu a thi lak, nu pakhat fa lakah a dam mi chu amah pakhat cho asi; kan pa nih amah chu thungâi a dâwt,’ kan ti.

²¹‘Pu, hinah muh ding na duh ruangah na kan chah le,

²²kan pa nih a siang lai lo kan ti le, chu hâwi asi chun kan pa chu a thih phah ding ko rawh,’ ti hen kan sâng.

²³Churawhchun nangnih, ‘Nan nau a tlum chem mi nan hawngpi lo chun, ka mâika ah nan hawng lang kho lai loh na kan ti.’

²⁴“Kan pa sinah kan tlung rawh chun na sim mi hâwitê hen kan simh.

²⁵Churawhchun, kal nawlh hen fâng tâwm va châwk ding hen hawng kan fial. Kannih nih, ‘Kan nau a tlum chem mi kan kalpi lo chun a mâika ah kan va lang kho ding asi lo,’ kan ti.

²⁶‘Kan nau a tlum chem mi a hawng tik cho ah kan kal kho lai,’ ti hen kan sâng.

²⁷Kan pa nih, ‘Ka nupi Rakel nih fapa panih cho hawng ka ring piak mi nan theih.

²⁸Chu lakah pakhat nih a hawng ka tlâu tâk rawh. Anih chu ram sa nih a sâm ver asi lai, chu thawk hen chun ka muh lo rawh.

²⁹Hi pakhat tê hi tuah nan kalpi asi chun a lakah vânduainâk hawng tawng sual sele, ka tar nûnah lungfâk bû hen nan hawng ka thihtir awt, a hawng kan ti.

³⁰Juda nih a thusim chu a pehpar vima rih le, “Pu, tuhin, hi kan naupa lo hen ka pa sinah ka kîr mi asi chun ka sinah a tlung bâk lo mi a muh kâ hen a thi chawlh ding ko rawh. A nungnâk chu chu ngâksia nungnâk hen â tlâi mi asi le, a tar tuktarâi ruangah kan ngaihsiat tirnâk nih a thah lai.

³²Chu cho khawm asi lo, hi ka nau ruang hin ka pa sinah ka lû ka pêk mi rawh. Hi ka nau hi ka kîrpi lo bâk chun ka damsung zawngah mawh chu keimah lakah um seh ti hen ka pa sinah ka tiam.

³³Pu, tuhin, hi ka nau ruangrûl ah hinah na sal ah ka um lai, a unau tla hen anih chu kîrtir ko.

³⁴Hi ka nau lo hen zeitin ka pa sinah kei ka kîr kho zia lai? Ka pa tlûnah siatnâk a hawng tlung ding mi muh ding ka tuar kho awt lo,” a ti.