Read Bawm Chin GENESIS 45 Bible Online

GENESIS 45 - Bawm Chin bible

GENESIS 45

¹Josef chu a to-aw tla mâika ah â sûm kho lo rawh le, an ektê hen pindan ah mi suak ding hen thu a pêk na. A sinah âukhawm an um lo liauah a unau tla sinah Josef nih âu asi ti â phuang rawh.

²Hâu suah hen a ṭap le, Aigupta mi tla nih an theih le, a thâwngthâng chu lal umnâk ah an va sim.

³Josef nih a unau tla sinah, “Kei hi Josef ka si, ka pa chu a dam ko rih bei ne?” a ti. Sikhawmsele, a unau tla chu an lâu tuktarâi le, an sâng kho lo.

⁴Churawhchun, Josef nih an sinah, “Hawng ka naih dauh u,” a ti. An va naih le, an sinah, “Kei chu nan unaupa Josef, Aigupta ram ah nan zuar mi kha ka si.

⁵Tuah nanmah lehlam nan ka zuar ruangah a phurung lah ule, nanmah lânah Pathian nih mipi nungnâk tla hum ding hen hawng ka fial mi asi hi.

⁶Tu hin pâm chu ram lakah kum nih cho asi rih, mâilei ah kum nga a um rih; chu karah chun fângât leh phâisen nâwn khawm a um lai loh.

⁷Pathian nih nanmah leh nan thlâk tla thibang rangah humtu leh lampi chê siamtu ding hen hawng ka fial masa asi.

⁸Churuangah hinah hawng ka fialtu hi nanmah nan si lo le, Pathian asi. Lalchem nih a rianṭuantu sâng chem ah hawng ka siah. A ram pumpi ah thuneihnâk hawng ka pêk le, Aigupta ram pumpi ah lâirêltu ka si.

⁹“Tuah mawhsareh hen ka pa sinah va tlung ule, ‘Na fapa Josef chu Aigupta ram lâirêltu ah Pathian nih a ruat rawh; sâwtlotê ah ka sinah hawng tuan seh a nan ti, ti hen simh u,’ a ti.

¹⁰Gosen ram ah nan um lai le, keimah naih ah, nang, na fa tla, na dawrâ tla, na kêl tla, na ranrual leh nan thilneih zawzawng hen.

¹¹Gosen ram ah nan um chun kan zauhkhenh kho na lai, pâm chu kum nga a um awt rih, nan dâwngsung leh nan neih tla an sungvâng lonâk ding hen” a ti.

¹²Josef ber nih, “Tuah nan ektê hen, nang Benjamin khawm nih Josef tak ka si ti nan ka theih rawh.

¹³Hinah Aigupta ram ah ka thiltikhonâk a sâng zia leh thil zeizawng nan muh mi tla ka pa rangah simh u. Amah khawm khulrang hen hinah hawngpi u’ a ti.

¹⁴Chun, a naupa Benjamin chu a kuah le a ṭap rawh; a hawng kuah rawh chun Benjamin khawm a ṭap bâk.

¹⁵Chun ṭap bû hen a unau tla khawm a kuah na le a châwkchawk na rawh. Chu nûnah chun a unau tla hen thu an ruat.

¹⁶Josef unau tla an hawng ti lalchem nih a theih rawh chun a to-aw tla hen thungâi anna lâwm rawh.

¹⁷Lalchem nih Josef sinah, “Na unau tla chu an ran timhtuah sele Kanaan ram ah kîrtir na rawh.

¹⁸An pa leh an dâwngsung tla va dawng na sele, hinah hawng kîr na seh. Aigupta ram sungah mun ṭha chem ka pêk na lai le, an duh nûnah a lei khawm umnâk an tawng lai.

¹⁹An nupi le, an fa tla, an pa leh a sinah um mi putnâk ding hen Aigupta ram ah kari tla hi put ding hen simh na.

²⁰An dunglei ah an thil an ri an mâk mi tla ruangah lungfâk lah na seh; Aigupta ram zawzawng ah thil ṭha chem chu an tâ asi lai,” a ti.

²¹Jakob fa le nih chun an simh na mi hâwi hen an ti rawh. Josef nih lalchem thupêk hâwi hen kari tla chu a pêk na le, lampi ah an ei ding tla khawm a pêk na.

²²Nipuan thleng khawm a pêk chiau na, sikhawmsele, Benjamin lam chu tangka zathum leh nipuan thleng panga a pêk.

²³Josef nih a pa rangah Aigupta thil ṭha chem mi sanatung parâ phurh leh fâng sanatung parâ phurh, lampi ah an ei ding sang leh buh tla hen a kuat.

²⁴A unau tla chu a fial na le, anna thawh awt liauah an sinah, “Lampi ah zeikhawm a êl lah u,” a ti na.

²⁵Aigupta ram chu an kaltâk rawh le, Kanaan ram ah an pa sinah an va tlung rawh.

²⁶An pa sinah, “Josef chu a dam ko rih! Aigupta ram lâirêltu asi!” ti hen an simh. Jakob chu a â thlo, a lung rerêng na lo.

²⁷Josef nih an sinah thu a chah na mi an simh mi zawzawng leh Aigupta ram ah amah chuannâk ding kari tla a hawng kuat mi chu a muh le, a thinlung a fiang pup rawh.

²⁸Jakob nih, “Ka fapa Josef chu a dam ko rih ngâk ma chu,” a ti. “Tuah ka ti ding chem chu ka thih lânah amah chu va muh ding chu asi ko rawh,” a ti.