Read Bawm Chin GENESIS 46 Bible Online

GENESIS 46 - Bawm Chin bible

GENESIS 46

¹Jakob chu a thil a ri zawzawng a timh le, a pa Isak Pathian sinah â bâwlnâk mun Bersheba ah a kal rawh.

²Pathian chu zân ah a sinah â langh le, “Jakob, Jokob!” ti hen a auh. “Hinah ka um,” ti hen a sâng.

³A sinah, “Kei na pa Pathian ka si,” a ti. “Aigupta ah kal ding ṭih lah; chunah chun na thlâk tla chu phun rokual tak ah ka siam lai.

⁴Na sinah Aigupta ah ka hawng bâk lai le, na thlâk tla chu hi ram ah ka hawng kîrpi nawlh lai, na thih tik khawmah Josef na sinah a um lai,” a ti.

⁵Jakob chu Bersheba ah mi â thawh le, Aigupta ram lalchem nih a hawng kuat mi kari lakah amah leh an fa tla, an nupi tla an chuantir na;

⁶An neih leh an ranrual Kanaan ah an thilneih zawzawng tla Aigupta ah an kalpi rawh. Jakob nih a thlâk zawzawng tla chu amah sinah a put hep na.

⁷Chubang tla chu, a fapa tla, a tupa tla, a fanu tla leh a tunu tla an si.

⁸Aigupta ram ah Jakob dâwngsung an kal mi tla lakah a fapa upachem chu Reuben asi.

⁹Reuben fapa tla chu Hanok, Pallu, Hezron leh Karmi.

¹⁰Simeon leh a fapa tla chu: Jemuel, Jamin, Ohad, Jakin, Zohar, leh Shaul, Kanaan nunau hen an ring mi.

¹¹Levi leh a fapa tla: Gerson, Kohat, Merari tla an si.

¹²Juda leh a fapa tla: Selah, Perez leh Zerah an si. (Juda fapa dang tla Er leh Onan chu Kanaan ah an thi.) Perez fapa tla chu Hezron leh Hamul an si.

¹³Isakar leh a fapa tla chu: Tola, Puah, Jashub leh Simron an si.

¹⁴Zebulun leh a fapa tla chu: Sered, Elon, leh Jahleel tla an si.

¹⁵Hi bang tla hi Leah nih Jakob rangah Mesopotamia ram ah a ring piak mi fapa tla an si, a fanu Dinah nih a ring mi rêlsih lo hen. Leah hen an ring mi zawzawng chu sâwmthum leh pathum an si.

¹⁶Gad leh a fapa tla: Zephon, Hagi, Suni, Ezbon, Eri, Arod leh Areli tla an si.

¹⁷Aser leh a fapa tla chu: Imnah, Isvah, Beriah leh an farnu Serah. Chun, Beriah fapa tla chu Heber leh Malkiel an si.

¹⁸Hi leiruk tla hi chu to-awnu Zilpah Laban nih a fanu Leah a pêk mi lakah Jakob nih a ring na mi an si.

¹⁹Jakob nupi Rakel nih fapa panih Josef leh Benjamin a ring.

²⁰Josef nih Aigupta ah fapa panih a nei, Manaseh leh Efraim, chu chu Heliopoli ah bâwlpu Potiphera fanu Asenat hen an ring mi asi.

²¹Benjamin fa tla chu: Bela, Beker, Asbel, Gera, Naaman, Ehi, Ros, Mupim, Hupim leh Ard tla an si.

²²Hi leili tla hi Jakob nih Rakel hen an ring na mi thlâk tla an si.

²³Dan fapa chu Husim asi.

²⁴Naphtali fapa tla chu: Jahzeel, Guni, Jezer, leh Sillem tla an si.

²⁵Hi pasarih tla hi Jokob thlâk tla Bilhah, Laban nih a fanu Rakel rangah a to-awnu ah a pêk mi hen an ring mi thlâk tla an si.

²⁶A mo tla rêlsih lo hen Jakob thlâk tatak vial Aigupta ah an lût mi chu sâwmruk leh paruk an si.

²⁷Aigupta ah Josef nih fapa panih a nei. Jakob dâwngsung zawzawng Aigupta ah an kal mi chu sâwmsarih an si.

²⁸Jakob nih Juda chu Gosen ram ah anmah tla hen a tawng ding hen an mâilei ah Josef sinah a fial.

²⁹Josef chu kari tlûnah â chuan le, a pa hen va a tawng ding hen Gosen ram ah a kal rawh. Anna tawng kâ hen Josef nih a pa a kuah le, sawt tak anna tawng lo mi asi ruangah a ṭap.

³⁰Jakob nih Josef sinah, “Tuah ka thih awt bâiah ka nan muh le, na dam ko rih ti ka theih le, tu chun thi khawmsele pawi ka ti lo rawh,” a ti.

³¹Josef nih a unau tla leh a pa dâwngsung zawng sinah, “Lalchem sinah ka kal lai le, ka unau tla leh ka pa dâwngsung zawzawng Kanaan ram ah an um mi chu ka sinah an hawng tleng rawh ka va ti lai.

³²Nannih hi dawrâ vulhtu leh ranrual vulhtu nan si zia tla, nan ranrual leh nan neih zawzawng nan hawng put hep mi tla khawm ka va simh lai.

³³Lalchem nih, Nan rianṭuan chem zei me si?’ ti hen an deih na chun,

³⁴hi hâwi hen ti u, ‘Ran vulh hen nan nung mi nan si zia tla, nan pu san liau thawk hen chu hâwi hen rianṭuan nan si mi tla nan simh ding asi.’ Churawhchun Gosen ram ah an umtir na lai,” a ti. Josef nih hi a tinâk san chu, dawrâ vulhtu tla chu Aigupta mi nih zeikhawm ah an siar na lo ruangah asi.