Read Bawm Chin GENESIS 5 Bible Online

GENESIS 5 - Bawm Chin bible

GENESIS 5

¹Hi hi Adam thlâk tla chu asi: Pathian nih minung a siam liauah amah bang cho hen a siam.

²Mipa leh Nunau a siam na le, mal a sâwm na le, “minung” ti hen min a sak na.

³Adam chu kum 130 a tling hen amah bang lek hen fapa a nei le, a min ah Seth a sak.

⁴Chu nûnah chun Adam chu kum 800 a dam nawlh. Fa dang tla a nei le,

⁵chun kum 930 a tling ah a thi rawh.

⁶Seth chu kum 105 a tling liauah fapa Enos a nei le,

⁷chun kum 807 dang a dam nawlh. Fa dang tla a nei le,

⁸kum 912 asi liauah a thi.

⁹Enos kum 90 a tling hen fapa Kenan a nei.

¹⁰Chu nûnah kum 815 dang a dam. Fa dang tla a nei le,

¹¹chun kum 905 asi liauah a thi rawh.

¹²Kenan nih kum 70 a tling ah fapa pakhat Mahalalel a nei.

¹³Chun, kum 840 dang a dam nawlh. Fa dang tla a nei le,

¹⁴chun kum 910 a tling ah a thi rawh.

¹⁵Mahalalel chu kum 65 asi ah fapa pakhat Jared a nei le,

¹⁶kum 830 dang a dam nawlh. Fa dang tla a nei le,

¹⁷kum 895 asi ah a thi rawh.

¹⁸Jared chu kum 162 a si ah fapa Enok a nei le,

¹⁹chun kum 800 dang a dam nawlh. Fa dang tla a nei le,

²⁰kum 962 asi ah a thi rawh.

²¹Enok chu Kum 65 asi ah fapa pakhat Methusel a ring.

²²Chu nûnah chun Enok chu kum 300 ding Pathian hen anna kâwm le, fa dang tla a nei.

²³Kum 365 tiang a dam.

²⁴A dam kar chu Pathian hen kawmhnâk ah a mang, churawhchun Pathian nih a lâk ving ruangah muh kho asi lo rawh.

²⁵Methusel chu kum 187 asi ah Lamek a nei,

²⁶Chu nûnah kum 782 dang a dam nawlh. Fa dang tla a nei le,

²⁷Kum 969 asi ah a thi.

²⁸Lamek chu kum 182 asi liauah fapa a nei,

²⁹“Hi fa nih hin Pathian siatbarh tual lakah hamh tak hen rian kan ṭuan mi chu thawsuaknâk hawng kan pêk lai rawh,” a ti le, churawhchun a min ah Noa a sak.

³⁰Lamek chu kum 595 dang a dam nawlh le, fa dang tla a nei le,

³¹Kum 777 asi ah a thi rawh.

³²Noa kum 500 a tling nûnah fapa pathum a nei le, Sem, Ham leh Japhet.