Read Bawm Chin GENESIS 50 Bible Online

GENESIS 50 - Bawm Chin bible

GENESIS 50

¹Josef nih a pa chu a bawk nawh le, a biang ah a châwchawk.

²Josef nih a pa ruak chu thu kholo a siam ding hen thu a suah.

³A ruak chu thu kholo hen siamnâk nih ni sâwmli an râu. Aigupta mi tla nih ni sâwmsarih an ulh.

⁴Ulh ni tla â lim rawh chun, Josef nih lalchem rianṭuantu tla sinah, “Zângfahtê hen hi thu hi lalchem sinah va simh u;

⁵‘Ka pa nih a thi awt liauah, thu hawng ka chah le, Kanaan ram ah amah nih a timhtuah mi thlân lakah hawng ka vûi,’ a ti. Churuangah zângfahtê hen ka pa vûi ding hen hawng ka kaltir sele, ka vûi thluh chun ka hawng kîr nawlh lai,’” a ti.

⁶Lalchem nih a sâng le, “Kal le, na pa chu na tiamh mi hâwi hen va vûi rawh,” a ti.

⁷Churawhchun Josef chu a pa vûi ding hen a kal rawh. Lalchem rianṭuantu tla zawzawng lal in ah mi lungfiang dadauh, Aigupta ram ruitu dauh vial Josef sinah an kal bâk.

⁸A dâwngsung tla, a unau tla, a pa dâwngsungkhur zawzawng khawm a sinah an kal bâk. Gosen ram ah an fa tetê leh an dawrâ tla, kêl tla ranrual vial an um.

⁹Kari tlûnah leh rang kêng tlûnah a chuan mi tla khawm a sinah an kal bâk; zapi rokual tak an si.

¹⁰Chun, Jordan saklei Atad ah fâng chîlnâk an va tlung rawh chun, sâwt ual an ṭappi, Josef nih chu ulhnâk chu ni sarih a ruat.

¹¹Kanaan mi tla nih Atad ah mithi an ulh mi tla an muh le, “Aigupta ram mi tla nih mithi an ṭappi mi a fâk tak mahi,” an ti. Churuang chun asi, chu mun chu a min ah Abel Mizraim[35] an sak.

¹²Chun, Jakob fa tla nih a simh na mi hâwi hen an ti le;

¹³a ruak chu Kanaan ram ah an kalpi le, Abraham nih vûinâk dingah Hit mi Ephron sin thawk hen a châwk mi Mamre saklei ah phâisen ah mi Makpela pûk ah an vûi rawh.

¹⁴Josef chu a pa a vûi thluh rawh chun, a unau tla leh ruak vûi ah a sinah kal mi zawng tla hen Aigupta ramah an kîr nawlh rawh.

¹⁵Josef unau tla nih an pa thih nûnah chunah chun a unau le nih, “Josef rangah nganfâk kan pêk mi ruangah hawng kan hua lai le lawhbâ hawng kan sam lai dahmawh,” an ti,

¹⁶Churawhchun, Josef sinah thu an thanh le: “Kan pa a thih lânah,

¹⁷thu hawng kan simh le, ‘Zângfahtê hen na unau tla nih na tlûnah thil diklo kan ti mi kha lehrûl hawng kan sam lo ding hen nangmah rangah ngiar u hawng kan ti. ‘Tuah zângfahtê hen na pa Pathian to-aw tla nih thilsual kan ti mi chu hawng kan ngaihdam râu rawh,” an ti. Chu an thu thanh chu Josef nih a theih rawh chun a ṭap.

¹⁸A unau tla khawm chu an hawng le, an kûn le mâi an mûk, “Hinah na mâika ah na sal hâwi hen kan um ko lai,” an ti.

¹⁹Sikhawmsele Josef nih an sinah, “Lâu lah u; Pathian ka si lo a!

²⁰Ka lakah thil diklo ti nan tum le, sikhawmsele Pathian nih thil ṭha hen an rulh na. Tûliau ah pâm a hawng tlung mi lakah hin a dam mi tla rangah kan nung khonâk ding hen.

²¹Zeikhawm ṭih ding a um lo, nanmah leh nan fa tla hen kan zauhkhenh na lai,” a ti na. Churawhchun, hawlh kâ ṭha hen a simhfiang na mi nih chun thungâi an thinlung a purh.

²²Josef chu a pa dâwngsungkhur tla hen Aigupta ram ah an um vima le, a thih liau chun kum zâ leh kum râ mi asi.

²³Josef nih chun Efraim fa tla leh a tusîn tla a muh na. Manaseh fapa Makir fa le tla khawm a muh.

²⁴A unau tla sinah, “Ka thih a nâi rawh, Pathian nih ka pu Abraham, Isak leh ka pa Jakob sinah a tiamh thlir mi ram leiah hi mun thawk hen an kalpi na lai,” a ti.

²⁵Josef nih a mi tla chu thutiamnâk a neitir na, “Chu ram ah Pathian nih an kalpi na tikah ka ruak hi nan sinah put bâk ding hen thutiamnâk nei u,” a ti.

²⁶Josef chu Aigupta ram ah kum zâ leh kum râ mi si hen a thi. A ruak chu thu kholo ding hen kuang lakah an siah.