Read Bawm Chin GENESIS 9 Bible Online

GENESIS 9 - Bawm Chin bible

GENESIS 9

¹Pathian nih Noa leh a fa tla chu mal a sâwm na le, “Fa tamtak nei ule, nan thlâk tla nih tual tlûn zawzawng khat hen luah na seh.

²Ran zawzawng, vâ tla, ngâ tla nangmah ṭih hen um na seh. Na thuneihnâk tangah siah hep an si.

³Tu chu thlâi hâwi hen na ei kho na lai; na buh rangah a ektê hen ka nan pêk.

⁴Na ei lo ding mi pakhat chu sa a thî telh mi asi. Nungnâk chu thisen thawk hen mi asi ruangah na ei ding asi lo.

⁵Âuzawng nih mi a thah chun rêp asi lai. Ram sa zeital nih minung a thah chun thihnâk hen kei khawm nih ka rêp lai.

⁶Minung chu Pathian hâwi hen siam mi asi le, churuang chun âuzawng minung a thah chun amah hâwi minung lîlâ nih a thah bâk lai.

⁷“Fa tamtak na nei ding asi, churawhchun na thlâk tla tual tlûn zawzawng ah an um lai.”

⁸Pathian nih Noa leh a fa tla sinah,

⁹“Tu chun nangmah leh na thlâk tla sinah thudân ka tuk rawh le,

¹⁰thil nung zawzawng vâ tla, ram sa tla, na sinah lawng thawk hen an suak mi zawzawng tla hen.

¹¹Hi thu hen na sinah thudân ka tuk asi: Buanso nih thil nung zawzawng chu a veih rerêng lai lo rawh; buanso nih tual a râwk rêng lai lo rawh.

¹²Nang leh thil nung zawzawng tla sinah thudân ka tuk mi hi zungzâl singsiahnâk ding asi lai.

¹³Sûm lakah ka chumchâ ka siah asi. Chu chu laikulh ah ka thudântuk singsiahnâk asi lai.

¹⁴Zeiliau zawngah vân khi sûm hen ka khattir hen chumchâ a hawng lang chun,

¹⁵nang leh ram sa zawzawng sinah thu ka tiamh mi chu thil nung zawzawng veih an si awt lo rawh ti ka theihkumza lai.

¹⁶Sûm lakah chumchâ a hawng lang chun kei leh thil nung zawng karah zungzâl thudântuk asi ti ka muh hen ka theihkumza lai.

¹⁷Chu chu thil nung zawzawng sinah thu ka tiam mi singsiahnâk asi,” a ti.

¹⁸Noa fapa tla lawng thawk hen an suak mi tla chu Sem, Ham leh Japhet an si. (Ham chu Kanaan pa asi.)

¹⁹Hi Noa fapa pathum tla hi tual tlûnah mi zawzawng thlâktu an si.

²⁰Noa, phâisen nâwntu chu grep phuntu masachem asi.

²¹Uain a din le a rî, a nipuan tla a lît le, a puanin ah takkaro hen a it.

²²Kanaan pa Ham nih a pa takkaro hen a um mi a muh le, a suak le, a unau panih a va simh na.

²³Chun, Sem leh Japhet nih puan an lâk le, an liang ah an tleih. Dunglei sît hen an kal le, puanin sungah mi an pa chu an va vurh. An pa takkaro hen um mi chu muh lo ding hen an mêl chu khatlei kângah anna her ving.

²⁴Noa chu uain a rî mi a hawng fîm rawh chun a fapa a niang chem mi nih a lakah a thilti chu a theih le,

²⁵“Kanaan chu siatbarh hen um seh! A unau tla sinah sal ah a um lai.

²⁶LALPA, Sem Pathian chu sawr hen um seh! Kanaan chu Sem sal asi lai.

²⁷Japhet chu Pathian nih pungtir seh! Sem mi le tla sinah a thlâk tla chu um na seh! Kanaan chu Japhet sal si seh!” a ti.

²⁸Noa chu buanso a tlung nûnah kum 350 a dam le,

²⁹kum 950 asi ah a thi.