Read Bawm Chin 2 SAMUEL 1 Bible Online

2 SAMUEL 1 - Bawm Chin bible

2 SAMUEL 1

¹Saul thih nûnah David chu Amelek mi tla a va neh na mi chu a hawng kîr le, Ziklak ah ni nih a um.

²A thâituan ah minung pakhat Saul umnâk ah mi a hawng tleng; a ngâihsia ti theihnâk ah a puan tla a thlêk, valeidip a lû ah a phulh le, David sinah a va kal le, zah tak hen mâi a mûk.

³David nih, “Zei thawk hen hawng mi me na si?” ti hen a deih. Anih nih a sâng le, “Israel riakmun thawk hen hawng suak mi ka si,” a ti.

⁴David nih a sinah, “Zei hâwi hen thil a hawng um? Hawng ka simh,” a ti. Anih nih, “Tuknâk ah mi kan kawrsen tla an tek hep le, kan minung tla cherkhet thah hen an um, Saul leh Jonathan khawm an thah na,” a ti.

⁵David nih, “Saul leh Jonathan an thi mi, zei hâwi hen na theih?” ti hen adeih.

⁶Anih nih a sâng le, “Gilboah tlâng ah ka va um liauah Saul chu a fei lakah dirh kalh hen a um mi ka muh le, a mêlma kari leh rang tla khawm nih an hawng naih khet rawh.

⁷Â hawi le, hawng ka muh le, hawng ka kawh, kei nih ka sâng le, “Zei me pu,” ka ti.

⁸Anih nih âu me ka si ti a ka deih le, kei nih Amalek mi ka si ti ka simh.

⁹Churawhchun anih nih ka sinah, “Hawng le hawng ka thah! An hawng ka liamh zia a fâk thlo, thi ding mi ka si ko rawh,” a ti.

¹⁰Churawhchun ka fûk le, ka thah dâidua, sâwtlotê ah a thi ding ka theih ruangah. Churawhchun a lû ah mi lallukhuh leh a zaksiar ka lâk le, na sinah ka hawng put hi pu,” a ti.

¹¹David chu a ngaihsia tukah a puan a thlêk le, a mi tla khawm nih chu hâwi hen an thlêk bâk.

¹²An ngaih a sia tuk le, nî tlâk hen buh an ei lo, Saul leh Jonathan leh Israel LALPA minung tla râltuknâk ah tamtak thah hen an um ruangah.

¹³David nih thâwngthâng tlunhtu tlangvâl sinah chun, “Zei lei mi minung me na si?” ti hen a deih. Anih nih a sâng le, “Amalek mi, na ram sungah um mi ka si,” a ti.

¹⁴David nih, “Pathian thîm mi lal zeitin na thah ngam?” a ti.

¹⁵David nih a minung pakhat a kawh le a sinah, “Hi minung hi thah” a ti, churawhchun Amalek mi chu a thah le,

¹⁶David nih Amalek mi rangah, “Hi thu hi nangmah nih na hawng tlunh le, LALPA thîm mi lal na thah ruangah nangmah nih nangmah mawh na siam mi asi,” a ti.

¹⁷David nih hi la Saul leh Jonathan sûnnâk hi a sak.

¹⁸Chu la chu Juda mi tla sîntir na ding hen thu a pêk. (Jasar lasuibu ah rîn asi.)

¹⁹“Israel tlâng ah Kan hotu tla chu an thi rawh! Kan kawrsen râlṭha chem chu an tlû rawh.

²⁰Gath leh Askelon khua lei tlângah phuang lah u. Chu lo chun Philistia nunau lunglo mi tla anna lâwm sual lai.

²¹“Gilboa tlângah chun ruah sûr lah sele, Dâmtî khawm tlâ lah sele, a phâisen tla khawm nih rah suah lah seh! Chunah chun mi râlṭha phaw mualpho tak hen a um ruangah, Saul phaw chu sariak hen chulh asi lai lo rawh.

²²Jonathan chanhtiang chu thihnâk asi. Saul nâmsâu nih khua a ruat lo, mi chak leh mêlma tla a thah na.

²³“Saul leh Jonathan chu duhrim an kâi hen an chê, an nung leh an thihnâk khawm â rual, mupi ngâk hen an khulrang, chakeibaknei ngâk khawm an chak.

²⁴“Israel nu tla, Saul rangah ulh u! Puan sen dawh tak cherkhet an aih na, ngûn leh lungsung hen a nan thuamh na.

²⁵“Kawrsen râlṭha tla chu an tlû le, râltuknâk ah thah hen an um. Jonathan khawm tlâng ah a thi bâk.

²⁶“Ka unaupa Jonathan, nangmah ruangah ka ngaihsia; ka rangah duh na kâi chiam e! Na hawng ka dâwt zia khawm a chê le, nunau tla dâwtnâk ngâk hen a fâk dauh.

²⁷“Kawrsen râlṭha tla an tlû rawh. An râlthuam tla khawm mâk leh mang tlâklo hen a um rawh,” a ti.