Read Bawm Chin 2 SAMUEL 11 Bible Online

2 SAMUEL 11 - Bawm Chin bible

2 SAMUEL 11

¹Kum a vei nûnah chun lal tla râltuk ding tik asi rawh chun David nih Joab a kawrsen hotu chu Israel kawrsen tla hen a fial na le; Rabah khua chu an hual le, Amon mi tla chu an neh na rawh. David lam chu Jerusalem ah a um.

²Nikhat chu sûnnilei zâu ah David chu a thawk le, a in tlûnah a va kâi, a kâi liau chun nunau tak â khawlh mi a muh, chu nunau chu thungâi a mêlṭha.

³Âu me asi ti theih ding hen mi a fial le, Bathseba Eliam fanu, Hit mi Uria nupi asi ti a theih.

⁴David nih a sinah hawngpi ding hen mi a fial le, a sinah an hawng put le, a ihpi, (a nunau râitâ a lîm kâtê asi) churawhchun a in leiah a lâwi nawlh.

⁵Chu hâwi hen pum lâwng lo hen â theih rawh chun David sinah mi a fial.

⁶David nih Joab sinah thu a chah le, “Hit mi Uria kha ka sinah hawng tlungtir,” a ti. Churawhchun Joab nih Uria chu David sinah a kaltir.

⁷Uria chu David sinah a va tleng rawh chun, David nih, “Joab leh a kawrsen tla leh râltuk thâwng zei hâwi asi,” ti a deih.

⁸Churawhchun Uria sinah, “In leiah va lâwi le, va a dîn rih,” a ti. Uria chu a suak le, David nih Uria in leiah lâwmman thil a kuat.

⁹Sikhawmsele Uria chu a in leiah a kal lo, lal in kawtkâ vêngtu tla sinah a riak ving.

¹⁰Uria a in leiah a lâwi lo ti David nih a theih rawh chun, a sinah, “Hun sâwt tak râu hen na hawng tlung mi, zeirangah in leiah na kal lo zia?” a ti.

¹¹Uria nih a sâng le, “Juda leh Israel mi tla an kal hep, Pathian Thudântuk Bâwm khawm an sinah a um ving, ka hotupa Joab leh hotu dang khawm riakmun ah an um hep. Zeitin kei mah ê hen in leiah ka kal lai le, ka din ka rî hen ka nupi sinah ka it zia lai? Chubang tla ruang chun chu hâwi thil chu ka ti rêng lai lo ti ka tiam asi!” a ti.

¹²Churawhchun David nih, “Tusûn ni khat chu hinah a dîn le, thâizîng lam chun kan kaltir lai rawh,” a ti. Churawhchun Uria chu chu ni ah chun Jerusalem ah a um.

¹³A thâizîng ah chun David nih buh ei ding a sâwm le, uain tla a dintir, sikhawmsele chu zân khawm Uria chu a in leiah a kal le, vêngnâk kardang sungah puan â aih le, a it ving.

¹⁴Thâizîng rawh chun David nih Joab rangah lasui a rîn le, Uria sinah a kuat.

¹⁵Chun, lasui lakah chun: “Uria chu râl sangtu tlar ah siah le, râltuknâk a zual chemnâk mun ah siah, a thi khonâk ding hen,” a ti.

¹⁶Khuapi an hawng kulh rawh chun Joab nih Uria chu râl zual chemnâk ah a fial.

¹⁷Khuapi mi an mêlma tla chu an hawng suak le, Joab murui chu an hawng do na, David nih hotu ah a siah na mi chu an thi le, Uria khawm an thah sih rawh.

¹⁸Churawhchun Joab nih David sinah an râltuk thu chu a va thanh le,

¹⁹a mifial rangah khawm thu a chah, “Râltuk thâwngthâng lalchem rangah na simh hen,

²⁰a thinthawk hen, anmah va do na ding hen zeirangah khuapi naih tuk ah nan va kal? Kulh thawk hen chanhtiang hen an kah na awt ti nan theih ko lo ma?

²¹Gideon fapa Abimelek thihnâk tla kha nan theih ko lo ma? Thebez ah nunau pakhat nih rialnâk lung kulh tlûn thawk hen a thlâk nawh le, a thi mi kha. Zeirangah kha tluk tluk hen kulh hen nan va naih? ti hen lalchem nih an deih na chun, na minung Uria khawm an thah bâk, ti hen simh,” a ti.

²²Churawhchun mifial chu David sinah a va kal le, Joab nih thu a thanh mi hâwitê a va simh.

²³David sinah, “Kan mêlma tla chu kanmah ngâk hen an chak dauh le, kulh sungah mi chu hawng kan do ding hen an hawng suak le, sikhawmsele kulh kawtkâ dêng khet hen kan khirh nawlh na.

²⁴Churawhchun annih nih kulh tlûn thawk hen chanhtiang hen hawng kan kah le, na milian tla zeimaw mi thah hen an um, hotu ah na siah mi Uria khawm a thi bâk,” a ti.

²⁵David nih mifial sinah, “Joab rangah hi hâwi hen simh. Râlṭha tak hen um seh, râltuknâk ah âu a thi lai ti nan sim kho lo, khuapi chelh ri hen do na sele lâk na seh,” a ti.

²⁶Churawhchun Bethseba nih a pasal Uria a thi mi a theih rawh chun a pasal zûn a ulh.

²⁷A mithi ulh a lîm rawh chun, David nih a in ah hawngpi ding hen mi a fial le, a nupi ah a umpi le, fapa a ring piak. Sikhawmsele David thilti lakah Pathian a lungsi lo.