Read Bawm Chin 2 SAMUEL 15 Bible Online

2 SAMUEL 15 - Bawm Chin bible

2 SAMUEL 15

¹A nehnûn chun Absalom nih amah rangah kari leh rang tla leh vêngtu minung sâwmnga mâilei ah kaltu ding a timhtuah.

²Churawhchun Absalom chu zîngtê a thawk le, kulh kawtkâ lampi ah a va dîr. Lalchem sinah thunawk remh ding hen hawngtu zawng chu a kawh na le, zei thawk hen mi me an si a deih na tâwn. Mi tla nih zei phun an si ti leh an hawng nâk an simh rawh chun,

³Absalom nih chun, “Zauhnik dân nih na thu chu a ruat awt le, sikhawmsele na thunawk ngâipitu ding lalchem aiawhtu an um lo,” a ti tâwn.

⁴Absalom nih, “Âuzawng thunawk lanawk nei hen ka sinah hawng na sele, dik tak hen lâirêl piak ding hen lâirêltu si sele ka duh a,” a ti.

⁵Churawhchun a kiangah mi an hawng rawh chun, a kûn le, a tleih na le, a châwchawk na tâwn asi.

⁶Absalom nih Israel mi tla lalchem sinah lâirêl ding hen an hawngtu zawng chu hi hâwi hen a ti vima na le, an thinlung a neh rawh.

⁷Churawhchun, a kum linâk a tling nûn chun, Absalom nih David lalchem sinah, “Pu, Hebron ah LALPA sinah thutiamnâk zawh ding hen hawng ka kaltir.

⁸Siria ram ah Gesur ah ka um liauah LALPA nih Jerusalem ah hawng ka ruai nawlh asi chun Hebron ah ka sawnh lai ti hen ka tiamh ruangah,” a ti.

⁹Churawhchun lalchem nih, “Lungngam tak hen kal,” a ti. Absalom chu Hebron ah a kal rawh.

¹⁰Churawhchun Absalom nih, Israel phun zawzawng sinah, “Tâwtawrâwt rihâu nan theih rawh chun, “Absalom chu Hebron ah lalchem ah a to rawh!” ti hen, âu ding hen mi a fial na.

¹¹Absalom nih a sâwm na mi minung zanih tla khawm Jerusalem thawk hen a sinah an kal bâk. Abslom thiltum tla theihlo hen thinlung ṭha tak hen an kal.

¹²Absalom nih bâwlnâk a ap liauah, Gilo khua mi Ahithophel, David lâirêl pitu rangah a chah. Lalchem rangah an phiarnâk chu a zual dadauh le, Absalom murui chu an pung dadauh rawh.

¹³Mifial tla nih David sinah, “Israel tla chu Absalom leiah anna bek rawh,” ti an simh.

¹⁴Churawhchun David nih a rianṭuantu tla sinah, “Absalom thawk hen ruangsuak ding hen mawhsareh hen kan suak lai. A nam u! Chu hâwi asi lo chun khuapi mi zawng tla hi hawng kan neh hen hawng kan thah lai!” a ti.

¹⁵“Asi, Bâwipa,” ti hen an sâng. “Na sim mi zawng chu zûl ding kanna tîm asi,” an ti.

¹⁶Churawhchun lalchem dâwngsung leh a rianṭuantu tla vial chu an suak le, a nupisûn parâ tla lam chu lal in zauhkhenh ding hen an mâk na.

¹⁷Lalchem leh a minung tla nih khuapi chu an mâk rawh chun, in madungchem ah anna dîn.

¹⁸A rianṭuantu tla chu a kiangah an dîr le, a vêngtu tla chu a mâi ah an kal. Kawrsen zaruk Gath thawk hen zûltu tla khawm nih an hawng lanh le,

¹⁹Churawhchun lalchem nih hotu Ittai sinah, “Zeirangah kan sinah na hawng êu? Kîr le lal thar sinah va tel rawh. Nang chu ramdang mi na si, na ram thawk hen hawng tek mi na si.

²⁰Hinah na umnâk chu hun sâwt asi lo rih, zeirangah kan sinah na hawng êu? Zeiah ka kal awt ti khawm ka theih loh. Kîr le, na ram minung tla put na, na tlûnah LALPA chu zumhkâi hen vêlnei seh,” a ti.

²¹Sikhawmsele, Ittai nih, “Bâwipa, LALPA min sâl hen ka tiam, thihnâk mun sikhawmsele na kalnâk zawngah kan hawng awt bâk,” a ti.

²²David nih, “A ṭha ma chu, kal u,” a ti. Churawhchun a minung leh amah lakah ngauhtu tla chu a sinah an kal rawh.

²³David leh a hâwi tla an kal ruangah mipi tla chu hâu fâk tak hen an ṭap. Churawhchun lalchem nih Kidron Va a kanh le, a minung tla nih an zûl le, ramkaro tiang hen an kal.

²⁴Bâwlpu Zadok leh Levi murui khawm Thudântuk Bâwm zawnh hen an kal le, mipi nih khuapi an kal tâk lân lo chu an toh. Bâwlpu Abiathar khawm chunah a um bâk.

²⁵Churawhchun lalchem nih Zadok sinah “Thudântuk Bâwm hi khuapi ah kîrpi nawlh. LALPA nih rem a ti chun zeitik mawh hi â dînnâk ah hin hawng ka ruai nawlh lai le, a umnâk mun ah ka muh nawlh lai.

²⁶Sikhawmsele, a duhzia lo asi chun, a duhzia zawng ka tlûnah tlungtir ko seh,” a ti.

²⁷Churawhchun Zadok sinah, “Zauhnik, na fapa Abimaaz leh Abiathar fapa Jonathan kalpi le, khuapi leiah lungngam tak hen kîrpi nawlh.

²⁸Chu kar zawng nangmah thawk hen thâwngthâng ka theih lân lo chu ramkaro lei kâinâk tiva ah kan ngâk lai,” a ti.

²⁹Churawhchun Zadok leh Abiathar nih Thudântuk Bâwm chu Jerusalem leiah an kîrpi le, chunah chun an um ko.

³⁰David chu kê karo leh ngaihsia zauhtirnâk lû khuh bû leh ṭap bû hen Oliv Tlâng chu a kâi. A zûltu tla khawm lukhuh hep leh ṭap bû hen an zûl.

³¹Ahithophel chu Absalom helnâk ah â tel rawh ti David rangah theihtir asi rawh chun, “Zângfahtê hen LALPA, Ahithophel krai hi zeikhawm silo ding hen ka nan ngiar asi,” ti hen thla a cham.

³²David chu tlâng sîp a tleng rawh chun, chu sawnhnâk mun ah chun a hâwipa Husai Arkit mi nih a puan a thlêk mi leh a lû ah valei a phulh mi a muh.

³³Churawhchun David nih a sinah, “Ka sinah na hawng mi hi ka rangah zeikhawm a ṭha vak lai lo,

³⁴sikhawmsele, khuapi ah kîr hen Absalom rian zumhkâi tak ṭuan hen a pa sinah nan ṭuan hâwitê hen nan va ṭuan mi hi ka rangah ṭangpitu asi lai. Ahithophel nih krai a pêk mi zawng na do kho ri na do ding hen.

³⁵Bâwlpu Zadok leh Abiathar khawm chunah chun an um lai le, lal in ah an sim mi nan theih mi zawng simh na.

³⁶An fapa tla Ahimaaz leh Jonathan khawm an sinah an um kha, thu nan theih mi zawng chu ka sinah hawng sim ding hen nan hawng fial kho,” a ti.

³⁷Churawhchun David kâwipa Husai chu khuapi leiah a kîr rawh, chu liau chun Absalom khawm a hawng tlung bâk.