Read Bawm Chin 2 SAMUEL 18 Bible Online

2 SAMUEL 18 - Bawm Chin bible

2 SAMUEL 18

¹Lalchem David nih a mi le a pumh ver na le, a murui hen a ṭhen le, sâng murui, zâ murui, chu lakah a hotu siam hen.

²Churawhchun murui thum a fial le, a murui chiau hotu rangah Joab, Joab unaupa Abisai leh Ittai Gath ah mi a thîm. Churawhchun lalchem nih, “Keimah ngelchel khawm ka hawng bâk lai,” a ti.

³Annih nih, “Kan sinah na hawng lai loh, kan lakah mi tamtak tek hen mi khingkhuai chu thi khawmsele zeikhawm â theih lai loh; sikhawmsele nang chu mi sîng khat ngâk hen na sung dauh, khuapi ah um hen ṭangpinâk na kan pêk mi a ṭha dauh asi,” an ti.

⁴Lalchem nih, “ṭha nan ti zia zawng ka ti lai,” a ti. Churawhchun kulh kawtkâ kiangah a dîr le, a mi tla chu a sâng murui leh zâ murui hen an suak rawh.

⁵Lalchem nih chun Joab, Abisai leh Ittai rangah thu a pêk le, “Keimah ruangah Absalom rangah nganfâk tir lah u,” a ti. David nih hotu tla rangah hi thu a ruah mi hi kawrsen murui khawm nih an theih.

⁶David kawrsen tla chu ram lênglei ah an kal le, Efraim Tumun ah Israel tla chu an do na.

⁷Israel tla chu David mi le nih an neh na, nehnâk fak tak asi, chu ni chun mi sîng nih an thah na.

⁸Tuknâk chu ram pumpi ah a khat dil le, tuknâk ah thah mi ngâk hen tumun ah mi an thi tam dauh.

⁹Churawhchun Absalom nih lâkkhatko ah David minung le a tawng na. Absalom chu sanatung tlûnah â chuan le, oak thing tangah a tek liauah Absalomom chu thing têng karah â tenh le lû a tâng. Sanatung chu a tek rawh chun Absalom chu â thlâi ko rawh.

¹⁰David minung pakhat nih a muh le, Joab sinah, “Pu, oak thing pâr ah Absalom â thlâi mi ka muh,” a ti.

¹¹Joab nih, “Na muh mi chu zeirangah a mun ah na thah ko lo? Thah le chu tangka parâ leh tâisâwm kan pêk ding mi,” a ti.

¹²Sikhawmsele chu minung nih chun, “Tangka sâng khat hawng ka pêk khawm le, lal fapa tlûnah ka kut ka phawh awt loh,” ti hen a sâng. Lalchem nih nang, Abisai leh Ittai sinah a thupêk, “Ka fapa Absalom chu keimah ruangah nganfâk pêk lah u,” a ti mi kan theih ko khateh.

¹³Lalchem thupêk ngâilo, hen Absalom ka thah asi chun lalchem nih a theih asi chun, thu zeizawng a theih ver tâwn mi, na hawng ka sanh kho ding asi lo,” a ti.

¹⁴Joab nih, “Nang hen hun kan tlâitir lai lo,” a ti. Churawhchun Joab nih fei pathum a lâk le, Absalom chu oak thing ah â thlâi mi a dam ko liauah a ir lakah a khawh.

¹⁵Churawhchun Joab kawrsen parâ nih Absalom chu an va naih khet le, an thah rawh.

¹⁶Joab nih râltuk bângnâk ding hen tâwtawrâwt tum ding thu a pêk le, Israel tla ṭhâwltu a kawrsen tla chu an hawng kîr rawh.

¹⁷Absalom ruak chu an lâk le, tumun ah khursaduap thûk takah an lawnh le, lung pawng hen an khuh. Churawhchun Israel mi zawzawng chu anmah in leiah chiau an tek rawh.

¹⁸Absalom nih a dam liauah amah ruangrûl ah Lal Tivakuam ah lung a phun, a min thâwntu a neilo ruangah. Chu mi lung ah chun amah min a rîn le, tutiang hen Absalom Theihkumzanâk lung an ti.

¹⁹Churawhchun Zadok fapa Ahimaz nih Joab sinah, “LALPA nih mêlma lakah mi ruang a suah mi thâwngthâng lawmhkâi lalchem va simh ding hen hawng ka kaltir me,” a ti.

²⁰Joab nih, “Silo, tusûn ah thâwngthâng ṭha zeikhawm tlunh ding asi lo. Ni dang ah lam chun â tawng lai, tusûn chu â tawng lo, lalchem fapa a thi lak,” a ti.

²¹Churawhchun Sudan mi a sal sinah, “Kal le, na muh mi chu lalchem va simh rawh,” a ti. Chun, to-aw chu a kûn le, a kal rawh.

²²Ahimaz nih, “Zeital tlung seh a pawi loh, thâwngthâng sim ding hen hawng ka kaltir ko,” ti hen a ngiar eu. Joab nih, “Ka fapa, zeirangah ti ding na duh êu le? Lâwmman na tawng ding khawm asi lo,” a ti.

²³Ahimaz nih, “Zeital tlung seh, kal ding ka duh,” a ti fâwn. Churawhchun Joab nih, “Kal ko ne,” a ti. Churawhchun Ahimaz chu Jordan Vakuam lampi leiah a tek le, a to-awpa a lanh ving.

²⁴David chu kulh kawtkâ sunglei leh lênglei karah a to. Avêngtu chu vâm tlûnlei ah a kâi le, in tlûnah a dîr le, a van zauh le, mi pakhat a hawng tek mi a muh.

²⁵Chun, râl vêngtu nih lalchem a simh le, lalchem nih chun, “Amah lâwng asi chun, thâwngthâng ṭha a hawng put mi ma chu,” a ti. A hawng tek mi pa chu a nâi dadauh.

²⁶Churawhchun râlvêngtu nih mi pakhat a hawng tek mi a muh fâwn le, kawtkâ vêngtu a simh le, “Zauhnik, midang a hawng tek fâwn mi khi,” a ti. Lalchem nih chun, “Hi khawm hi thâwngthâng ṭha tlunhtu asi lai,’ “a ti.

²⁷Râlvêngtu nih, “A tek masa mi chu Ahimaz si hen ka muh,” a ti. Lalchem nih chun, “Anih chu mi ṭha tak asi, thâwngthâng ṭha a put lai” a ti.

²⁸Ahimaz chu tual lei kûn hen lalchem rangah chibai a bûk le, “LALPA, na Pathian, nangmah lakah heltu tla tlûnah nehnâk a nan pêktu chu sawr hen um seh!” a ti.

²⁹Lalchem nih, “Tlangvâl Absalom kha a dam ma?” a ti. Ahimaz nih, “Pu, Joab na kawrsen hotu nih hawng ka fial liauah nawknâk fâk tak a um le, sikhawmsele zei hâwi asi rawh ka sim kho lo,” a ti.

³⁰Lalchem nih chun, “Khinah hawng dîr,” a ti le, a va kal le, a dîr rawh.

³¹Churawhchun Sudan mi to-aw a hawng tleng le, “Lalchem sinah thâwngthâng ṭha ka hawng tlunh! Tusûn ah nangmah lakah heltu zawzawng tlûnah LALPA nih nehnâk a nan pêk rawh,” a ti.

³²Lalchem nih, “Tlangvâl Absalom kha a dam ma?” a ti. To-aw nih, “Pu, amah tlûnah a tlung mi hâwitê hen nangmah tlûnah heltu tla na mêlma tlûnah khawm tlung bâk seh,” a ti.

³³Lalchem chu thungâi a ngaihsia le, kulh kawtkâ tlûnah in kardang ah a lût le, a ṭap rawh. A kal pah hen, “Ka fapa! Ka fapa Absalom! Absalom, ka fapa ti hen a ṭap. Na ruangrûl lam kei thi sele, ka fapa Absalom, ka fapa,” ti hen a ṭap.