Read Bawm Chin 2 SAMUEL 22 Bible Online

2 SAMUEL 22 - Bawm Chin bible

2 SAMUEL 22

¹LALPA nih David chu Saul leh a mêlma thawk hen a hum ruangah hi la hi LALPA sinah a sak asi:

²LALPA chu hawng ka vêngtu asi, amah chu ka kulhpi asi.

³Ka Pathian chu ka himnâk, amah lakah ka him. Phaw hâwi hen a ka vêng le, him tak hen hawng ka kil. Amah chu ka ruangsuahtu asi, tuknâk ah hawng ka vêng hen hawng ka hum.

⁴LALPA ka auh le, anih nih ka mêlma lakah mi hawng ka hum. LALPA chu sawr hen um seh.

⁵Thihnâk tî tlingtlawk nih hawng ka hual le, siatnâk tî tlingtlawk nih hawng ka vurh.

⁶Thihnâk ṭihnungkâi nih hawng ka kulh le, thlân nih ka rangah thang a tunh.

⁷Ka lawksawngnâk ah LALPA ka auh le, Pathian sinah ṭangpi ka deih. A biakin ah ka hâu a theih le, ṭangpi deihnâk aw-hâu chu a ngâi.

⁸Churawhchun tual chu a thir le â nîn, vân ngauhnâk lungphûm khawm â ṭhial le, â nîn.

⁹A nârkua thawk hen meikhu a suak. A kâ thawk hen zawrtirnâk meialh leh meihawl kâng mi a suak.

¹⁰Vân â ṭhen le, a kê tangah sûm dum hen a hawng ṭum.

¹¹Vân kari hen rang tak hen a zuang, thli thla hen â zî.

¹²Mûi hen â khuh le, sûm sah tak tî a khat dil mi nih a kulh.

¹³A mâika ah mîmthlalek thawk hen meihawl kâng mi alh a suak.

¹⁴Churawhchun vân thawk hen khua a rîtir. Churawhchun Pathian zeizawng tikhotu aw chu theih asi.

¹⁵A lîthal a kah le, a mêlma tla a ṭhêk hep. Mîmthlalek chêu hen a ṭhêktir hep na.

¹⁶Tisumsumriat tawdeng chu a karo hen a siah. Churawhchun tual lungphûm chu awng asi. LALPA nih a mêlma a fâi hen thinthawk hen a rûm nawh na.

¹⁷LALPA chu tlûnlei thawk hen a ṭum le, hawng ka tleih. Tî thûk tak thawk hen hawng ka thuak.

¹⁸Mêlma chak tak thawk hen hawng ka sanh, hawng ka huatu tla leh ka ngâk hen chak thlo mi tla lakah khawm annih chu ka rangah an chak tuk.

¹⁹Lawksawng hen ka um liauah an hawng ka hual le, sikhawmsele LALPA nih hawng ka vêng.

²⁰Ṭihnungkâi thawk hen hawng ka sanh suak le, ka tlûnah â lâwm ruangah hawng ka hum.

²¹A dik mi ka ti ruangah LALPA nih lâwmman hawng ka pêk. Ka palh lo ruangah mal hawng ka sawm.

²²LALPA dân ka zâwt le, Ka Pathian chu ka hawitâk lo.

²³A dân zawzawng chu ka kil le, a thupêk chu zûl lo hen ka um lo.

²⁴Ka palh lo ti a theih le, thil diklo ti lakah kâ vêng.

²⁵Thil dik ka ti ruangah lâwmman hawng ka pêk, Ka palh lo ti a theih ruangah.

²⁶Aw LALPA, nangmah lakah zumh an kâi mi sinah chun zumh na kâi, mi ṭha tla sinah na ṭha rangtling asi.

²⁷Anna thenhlimh mi sinah chun na thenhlimh le, Sikhawmsele an sual mi sinah chun mêlma hâwi na si.

²⁸Anna nâutir mi chu na hum na, sikhawmsele anna zûm mi chu na nâutir.

²⁹Nang, LALPA chu ka chêu na si, ka mûinâk na tlâutir.

³⁰Ka mêlma do ding hen chaknâk na hawng ka pêk le, anmah tla neh ding hen chaknâk na hawng ka pêk.

³¹Hi Pathian hi a thilti a rangtling a! A thu chu ngauhsanh a tlâk a! Amah chu phaw hâwi asi, a vênghimnâk hâwltu zawng rangah.

³²LALPA cho Pathian asi. Pathian cho kan himnâk asi.

³³Hi Pathian hi ka thupnâk rokual asi. Ka lampi himnâk hen a siam.

³⁴Sakhi hâwi hen ka kê chu bir tak hen a siam, tlâng tlûnah khawm him tak hen hawng ka kil.

³⁵Râltuk ding hen hawng ka sîntir le, sâi khauh chem ka mang khonâk ding hen.

³⁶Aw, LALPA, na ka vêng le, na ka hum. Na ṭangpinâk nih thungâi hawng ka rokualtir.

³⁷Tleih ding ka si mi lak khawm na ka vêng. Churuangah ka tlû dah loh.

³⁸Ka mêlma ka ṭhâwl le, Ka neh na; Ka râwk na lân lo chu ka dîn lo.

³⁹Ka vuak na le, an thawk kho lo rawh. An tlû le, ka mâika ah neh hen an um.

⁴⁰Râltuk ding hen chaknâk na hawng ka pêk, ka mêlma nehnâk hen.

⁴¹Ka mêlma chu ka sinah thawk hen na tek tir. An hawng ka huatu chu ka râwk na.

⁴²Ṭangpinâk an hâwl le, âukhawm nih a hum na lo. LALPA an auh le, khawmsele a sâng na lo.

⁴³Ka dêng na le, vûisadip hâwi an hawng si. Khua lâiah valei nêng hâwi hen ka lamh na.

⁴⁴Mi zapi hel mi lakah ka um, Phun tlûnah ṭha tak hen lâi ka rêl. Mi zapi ka theih loh mi tla chu ka khua leh ti an si.

⁴⁵Ramdang mi tla ka mâika ah an kûn, ka thu an theih hen zûl.

⁴⁶Râlṭhatnâk an thlâu le, an kulh thawk hen thir bû hen an hawng.

⁴⁷LALPA chu a nung! Hawng ka vêngtu chu sawr hen um seh! Pathian hawng ka humtu chaknâk

⁴⁸Ka mêlma lakah nehnâk hawng ka pêk le, phun tla chu ka tangah an tlâwm.

⁴⁹Ka mêlma lakah hawng ka hum. Aw LALPA, ka mêlma nehnâk hawng ka pêk le, rian tleihtu tla lakah mi hawng ka vêng.

⁵⁰Phun zawzawng nâwngah ka nan sawr, Sawrnâk la na sinah ka sak.

⁵¹Pathian nih a lal rangah nehnâk rokual a pêk. A thîm mi sinah dâwtnâk a langhtir, David leh a thlah tla zungzâl hen.