Read Bawm Chin 2 SAMUEL 24 Bible Online

2 SAMUEL 24 - Bawm Chin bible

2 SAMUEL 24

¹LALPA thinrunhnâk chu Israel tla tlûnah a um fâwn, an lawksawng tir ding hen David chu a mang. LALPA nih a sinah, “Kal le, Israel leh Juda mipi rêl rawh,” a ti.

²Churawhchun kawrsen hotu Joab sinah thu a pêk le, “Na minung tla hen Israel phun zawzawng sinah ram dawnghnâk thawk hen khatlei dawngh tiang kal ule, rêl hep na u, zeizat minung an um theih ding ka duh,” a ti.

³Sikhawmsele, Joab nih a sâng le, “Bâwipa, na LALPA, Pathian nih Israel mipi tla chu tuah an um mi ngâk hen a leh zâ ngâk hen rêl chawklo rê hen pungtir seh, chu muh ding hen dam rawh,” a ti.

⁴Sikhawmsele, “Ka Bâwipa nih zeirangah hi hi ti ding a duh aw?” a ti. Sikhawmsele lalchem nih chun Joab leh a hâwi tla chu ti ding hen a awitir na le, amah muh hen Israel tla rêl ding hen an suak rawh.

⁵Churawhchun Jordan an kanh le, Gad ram sung Aroer simlei khuapi tivakuam lâi ah riakmun an khuar. Chu thawk hen mailei Jazer,

⁶Gilead leh Kades Hit ram tiang an kal. Churawhchun Dan ah an kal le, chu thawk hen Sidon thlanglei ah an kal rawh.

⁷Churawhchun saklei Tura khuapi kulhnei leh Hit mi leh Kanaan khuapi ah an kal, a dawnghnâk ah Juda simlei kângah Bersheba tiang an kal.

⁸Churawhchun thla kua leh ni kul ram zawzawng an ṭawl thluh nûn chun Jerusalem ah an hawng kîr rawh.

⁹Churawhchun Israel lakah kawrsen ah lâk kho mi zat chu 800,000, Juda lakah 500,000 an si ti hen lalchem sinah an pêk rawh.

¹⁰Sikhawmsele, hi minung a rêl nûnah hin David chu a thinlung thungâi a lawksawng le, LALPA sinah, “Hi hâwi ka ti mi lakah hin sual ṭihnungkâi tak ka ti asi, zângfahtê hen hawng ka ngaidam, â tak hen thil ka ti asi,” a ti.

¹¹LALPA nih David khuavâng Gad sinah, “David sinah kal le, thil pathum a thîm ding ka pêk asi, a thîm mi zawng ka ti lai,” a ti. A thâituan zînglei ah David a thawk rawh chun,

¹³Gad chu a sinah a va kal le, LALPA nih a sim hâwi hen a simh. “A zeitin mi na thîm awt ne? Na ram sungah kum thum pâmnâk, na mêlma thawk hen thla thum tek, asi lo leh, na ram sungah râi ni thum tlung ding?” ti hen a deih. “Tuah ngaihtuah set nik, zei hâwi sângnâk na ka pêk awt, LALPA sinah tlûnh nawlh ding mi chu,” a ti.

¹⁴David nih, “Dîrmun ṭhalo tak ah ka um rawh asi! Sikhawmsele minung rêp chu ka duh lo. Hawng ka rêp ding hen amah LALPA si dauh seh, anih chu khuaruat khotu asi ruangah,” a ti.

¹⁵Churawhchun Israel tla tlûnah râi a fial le, chu chu zîng thawk hen a thîm mi hun tiang a awh asi. Israel mi tla chu ram dawngnâk thawk hen a dang lei dawngh tiang minung sîng sarih an thi asi.

¹⁶LALPA vânmifial nih Jerusalem a râwk awt liauah leh a thah na liauah LALPA nih a thinlung a dangtir le, “Bâng rawh! Â tâwk rawh!” a ti. Vânmifial chu Jebus mi tla fâng chîlnâk mun Araunah mun ah a um.

¹⁷David nih vânmifial nih mipi a thah mi a muh le, LALPA sinah, “Keimah ka si a sual mi chu. Kei ka si thil diklo titu chu. Hi mipi ngâkṭah tak tla nih zei an sual? Kei leh ka dâwngsung tla rêp dauh na,” a ti.

¹⁸Chu ni ah chun Gad chu David sinah a kal le, a sinah “Araunah fâng chîlnâk mun ah kal le, chunah LALPA rangah mâichâm siam rawh,” a ti.

¹⁹David nih LALPA thupêk Gad nih a simh hâwi hen a ngâi.

²⁰Churawhchun Araunah chu â hawi le, David leh a mi tla amah lei an hawng mi a muh rawh. Chun, David mâika ah tual ah â lawnh tlak le,

²¹“Bâwipa, zeirangah hinah na hawng?” ti hen a deih. David nih, “Na fâng chîlnâk mun hi LALPA rangah mâichâm dirhnâk rangah kan châwk awt, râi a lêng mi a bâng kho ding hen,” ti hen a sâng.

²²Araunah nih, “Bâwipa, lâk ko, na duhzia zawng hen na LALPA sinah ap ko,” a ti. “Hinah mâichâm ah duah ding chawchal khawm a um, fâng chîlnâk thuamthil tih ding rangah a um,” ti hen.

²³Araunah nih lalchem rangah zeizawng a pêk rawh chun, “Na thil ap LALPA, na Pathian nih an pawmpiak seh,” a ti.

²⁴Sikhawmsele, Lalchem nih, “Silo, a man ka nan pêk lai. Zeikhawm a man tla lo mi hen LALPA sinah thil ka ap awt lo,” a ti. Churawhchun fâng chîlnâk mun leh chawchal chu tangka sâwmnga hen a châwk rawh.

²⁵Churawhchun LALPA rangah mâichâm a siam le, duahnâk thil ap leh kawmhnâk thil ap a pêk rawh. LALPA nih a thlachamnâk a sâng le, Israel ram ah râi chu a bâng rawh.