Read Bawm Chin 2 SAMUEL 4 Bible Online

2 SAMUEL 4 - Bawm Chin bible

2 SAMUEL 4

¹Saul fapa Isboseth nih Hebron ah Abner thah asi ti thu a theih le, thungâi a ṭih, Israel mi tla khawm an lâu.

²Saul fapa Isboseth nih râltuk hotu panih a nei, Baanah leh Rekab, Beeroth a mi Benjamin phun Rimmon fapa tla an si. (Beeroth chu Benjamin ram ah ram pakhat ah ngaih asi,

³chunah a tîrah an um mi tla chu Gittaim ah an tek le, tutiang hen chunah an um rawh.)

⁴Saul thlâk dang a um mi chu Jonathan fapa Mephiboseth asi le, Jonathan leh a pa Saul an thi liau khan kum nga mi asi. An thih thu Jezreel khuapi thawk hen thâwng an theih rawh chun, a umhtu nih a tekpi ving, â nam tuktarâi ruangah a thlâk le, a kê a khêng.

⁵Rekab leh Baanah chu Isboseth in ah an va kal le, nî sûn liau chirah sûn ah â dîn liauah an va tlung.

⁶Nunau inkhâr kiangah fâng a khei mi chu a it kartê ah Rekab leh Baanah chu in sungah Isboseth kardang sungah an va lût le,

⁷a ihmû a thâwt liau chirah an thah. A lû an tan le, an put le, khuadei ver hen Jordan vadung an zawh.

⁸Hebron a mi lalchem David sinah an va pêk le, a sinah, “Na mêlma thah ding hen an awttu Saul fapa Isboseth lû kan hawng put hi. Tusûn ni ah hin Saul leh a thlâk tla rangah lehrûl na samnâk ding LALPA nih a siang asi,” an ti.

⁹David nih a sâng na le, “Ṭihnungkâi lakah ruang hawng ka suahtu LALPA min hen thu ka tiam asi.

¹⁰Ziklak ah Saul thih thu hawng ka simhtu minung nih chun thâwngthâng ṭha tak sim hen a ruat. Ka tleih le, amah chu ka thah ving. Chu chu a rangah a thusim man ka pêk mi asi ko!

¹¹Mi sual neilo, a in sungah a it thlit liauah thahtu châng chu a sual fâk zia zei hâwi tluk asi awt! Tuah nan tlûnah a phû ka lam awt, tual ah mi ka nan veih ving na awt!” a ti.

¹²David nih a kawrsen tla chu thu a pêk le, “Rekab leh Baanah hi thah ule, an bân leh an kê tla tan na u,” a ti. Hebron mi tiva kiangah an thlâi. Isboseth lû lam chu Hebron a mi Abner thlân ah an vûi.