Read Bawm Chin 2 SAMUEL 8 Bible Online

2 SAMUEL 8 - Bawm Chin bible

2 SAMUEL 8

¹Zeimaw zâwn ah lalchem David nih Philistia tla a do tâwn le, a neh na tâwn le, ram lakah an lâirêlnâk chu a dawnghtir tâwn.

²Churawhchun Moab murui tla khawm a neh na. Rêngtlâ chu tual ah a zâutir na le, pathum lakah panih vima a thah na. Churawhchun Moab mi tla chu amah minung an si le, a sinah siah an châwi.

³Zobah ram ah mi Siria lal, Rehob fapa Hadadezer khawm a neh. Tlûnlei mi Eufretis tiva hen ram chu luah nawlh ding hen Hadadezer nih â tîm ruangah.

⁴David nih rang tlûnah â chuan mi minung sâng khat leh zasarih leh kê hen a kal mi sîng nih a tleih piak na. A lei mi kari nûktu rang khawm zâ a nei tâwk, a dang vial chu a khêngtir ver na.

⁵Damaska mi Siria mi tla nih lalchem Hadadezer ṭangpi ding hen a kawrsen tla an fial le, David nih a do na le, sîng nih leh sâng nih a thah na.

⁶An ram ah kawrsen mun a dirh le, amah minung an hawng si le, a sinah siah an châwi. LALPA nih mun kipah nehtu ah a siam.

⁷David nih Hadadezer tla nih an put mi ngûn phaw a lâk le, Jerusalem ah a kalpi.

⁸Hadadezer nih lâi a rêlnâk khua Betah leh Berothai khua mi dâr tamtak a lâk.

⁹Hamat lalchem Toi nih David nih Hadadezer kawrsen tla a neh hep ti a theih rawh.

¹⁰Churawhchun a fapa Joram chu David mâimûk ding leh Hadadezer a neh mi ruangah lawmhpi ding hen a fial, chu lalchem Toi chu vei tamtak Hadadezer hen anna do mi rawh an si. Joram nih ngûn, tangka, dâr lâwmman rangah a put piak.

¹¹David nih Pathian sawnhnâk ah mang ding hen a ap le, phun dang a neh na mi thawk hen a tawng mi ngûn leh tangka tla khawm a ap.

¹²Edom, Moab, Amon, Philistia leh Amalek thawk hen a tawng mi leh Hadadezer thawk hen a tawng mi tla hen.

¹³David chu Chite Va ah Edom mi tla sîng khat sâng riat thah hen a hawng kîr le, churawhchun a min a thang khun rawh.

¹⁴Edom ram zawzawng ah kawrsen mun a dirh le, chu ram ah um mi tla chu a mi le an hawng si rawh. David chu LALPA nih mun kipah nehnâk a pêk.

¹⁵David nih Israel tla tlûnah lâi a rêl le, rep tak leh ṭha tak hen a mi tla a zauhkhenh kumza na.

¹⁶Joab, a nu chu Zeruiah chu kawrsen lakah hotu asi. Jehosaphat Ahilud fapa chu lâirêlnâk rîn mi kiltu asi.

¹⁷Ahitub fapa Zadok leh Abiathar fapa Ahimelek chu bâwlpu an si; Seraiah chu zung lasui rîntu asi.

¹⁸Jehoiada fapa Benaiah chu David vêngtu hotu asi, David fapa tla chu bâwlpu an si.