Read Bawm Chin 1 Lal 10 Bible Online

1 Lal 10 - Bawm Chin bible

1 Lal 10

¹Seba lalnu nih Solomon minthang zia a theih le, thu har tatak nik ding leh deih ding hen Solomon sinah Jerusalem leiah a va kal.

²Amah chu minung tamtak nih an zûl le, rimthâw tla, lungmantam leh ngûn tla tamtak sangâwngsâu tla a puttir. Solomon hen an va a tawng rawh chun a thinlung ah a ruat mi deih ding mi zawng chu a deih rawh.

³Solomon nih a sâng hep, anih rangah simhfiang ding hen thu har rerêng a um lo.

⁴Seba lalnu nih Solomon finghnâk leh a lal in sak tla chu a theih hen a muh rawh.

⁵A dawhkân lakah tî-râwl an timhtuah mi tla, a rianṭuantu tla umnâk, a lal in ah rianṭuantu tla leh anna thuam dân, a puai einâk ah a to-aw amah ngâktu tla, Biakin ah bâwlnâk a ap mi tla chu a muh le, chê a ti tuk le, a ngaihdân a theih lo rê.

⁶Lalchem Solomon sinah, “Ka umnâk ram thawk hen na thâwng ka theih mi chu a dik ngâk mahi!

⁷Sikhawmsele keimah ngelchel hawng hen ka muh ver lân lo chu ka lung lo thlo. Sikhawmsele a khingkhuai khawm ka theih lo mahi! Mi nih an hawng ka simh le, ka theih mi ngâk hen na finghnâk leh neihnâk leh na rokual zia chu a fâk dauh mahi!

⁸Na nupi tla chu an vân a ṭha a! Na to-aw tla na mâika ah um kumza hen na finghnâk thusim theih tâwntu tla chu an vân a ṭha chiam e!

⁹LALPA na Pathian chu sawr hen um seh! Israel lalchem ah a nan siamtu chu na sinah um hen na tlûnah â lâwm. Israel tla rangah a zângfahnâk chu zungzâl si hen, a dân thu tla leh lâirêlnâk chu zulh kho ding hen a nan siam ruangah,” a ti.

¹⁰Lalchem Solomon rangah lâwmman a hawng put mi chu a pêk le, ngûn vial kilogramme sâng li leh rimthâw tamtak leh lungmantam tla a pêk. Rimthâw a pêk mi tam dân chu ni dangah a tawng tâwn mi ngâk hen a tam chem mi asi.

¹¹(Hiram lawngrual nih Ophir ah mi ngûn tla, junipar thing tla leh lungmantam tamtak a hawng put.

¹²Solomon nih chubang thing tla chu a lal in leh Biakin kulhnâk ah a mang; ṭingṭang leh khuang tumphung tumtu rangah a siam. Israel ram ah lûtpi mi thing lakah chun junipar thing a ṭha chem asi, chu hâwi chu zeiliau khawm muh asi lo rawh.)

¹³Lalchem Solomon nih Seba lalnu rangah a deih mi thil zawzawng a pêk le, chu lo khawm a deih lo mi thil tamtak a pêk. Churawhchun amah zûltu tla hen Seba ram leiah an tlung rawh.

¹⁴Solomon nih kum siar hen ngûn a tawng zat chu kilogramme sîng nih leh sâng thum.

¹⁵Sawlehtu tla nih anna lâwk mi pêk mi, Arabia ram lal tla leh Israel hotu tla bial ah mi nih siah an pêk mi siarlo hen.

¹⁶Solomon nih phaw lian tak zanih a siam le, a lênglei ah ngûn kilogramme sarih tling dêng a luanh vevê.

¹⁷Chu ngâk hen a mê dauh mi phaw zathum a siam nawlh le, ngûn kilogramme nih chiau a luanh. Hi bang phaw a nei mi tla hi Lebanon Tumun ah mi a lal in ah a siah na.

¹⁸Laltophah lian tak siam mi khawm a nei, sâihâ telh hen siam mi asi le, ngûn a ṭha chem mi hen a luanh.

¹⁹Laltophah nih kâinâk bak paruk a nei, chu bak kip a dawng vevê ah chakeibaknei ruk an tuah, a ektê hen chakeibaknei ruk leinih asi. Laltophah dunglei kângah chawchal lû an siam, laltophah bân panih chu chakeibaknei ruk vevê an siam.

²¹Solomon tî dinnâk hâi zawzawng chu ngûn hep asi, Lebanon Tumun ah lal in mi khêng leh bêl tla chu ngûn karo hen hep asi; tangkasa rerêng chu mang asi lo. Solomon san liauah chun tangkasa chu thil sung ah ngaih asi lo.

²²Tisumsumriat ah lawngrual Hiram lawngrual hen an kal mi tla a nei. Kum thum dan ah a lawngrual tla nih an kîr leiah ngûn, tangkasa, sâihâ, huho tla, zâwng tla an hawng put.

²³Lalchem Solomon chu lal dang zawzawng ngâk hen a nei hen a fing dauh.

²⁴Pathian nih a pêk mi finghnâk ngâi ding hen laikulh minung zawzawng nih hawng ding an duh.

²⁵A hawngtu kip nih thilpêk tla, tangka, ngûn, kawrfual, râlthuam, rimthâw, rang tla leh sanatung tla an hawng pêk; chubang tla chu kum siar hâwi asi.

²⁶Solomon nih rang kari sâng khat leh zali leh minung chuanhnâk rang sîng khat leh sâng nih a nei. A zeimaw zat chu Jerusalem ah a siah le, a dang tla chu khuapi dang dang ah a siah na.

²⁷Solomon nih lâi a rêl liau chun tangkasa tla chu lung leh sidar thing tla chu theipi thing hâwi cho Jerusalem ah ngaih asi.

²⁸Lalchem sawlehtu tla nih Musri leh Kilikia leiah zuar ding mi tla

²⁹leh Aigupta ram thawk hen rang zuar ding mi tla lakah thu an nei. Hit mi lal leh Suria lal sinah rang leh kari an zuar mi chu kari pakhat lakah tangka zaruk vima, rang pakhat lakah tangka zâ leh sâwmnga vima asi.