Read Bawm Chin 1 Lal 11 Bible Online

1 Lal 11 - Bawm Chin bible

1 Lal 11

¹Solomon nih ramdang nunau a mêldi na. Aigupta lalchem fanu nûnah Hit mi nunau, Moab mi nunau, Amon, Edom, Sidon ah mi nunau khawm a umpi na.

²LALPA nih Israel tla chu chubang ramdang nunau chu umpi lo ding hen thu a pêk mi lakah nupi rangah a lâk na. Chubang mi tla nih chun Israel tla chu pathian dang leiah an hertâk tir na tâwn ruangah.

³Solomon nih lal fanu zasarih leh nupisûn zathum a umpi na. Chu tla nih chun Pathian thawk hen kâng dang leiah an hertir le,

⁴a tar nûnah ramdang pathian an sawnhtir rawh. A pa David hâwi hen Pathian lakah zumhkâi hen a um lo.

⁵Sidon pathiannu Astarte leh Amon pathian ṭihnungkâi tak Milkom a sawnh.

⁶A pa David hâwi hen zumhkâi hen a um lo le, LALPA lakah thilsual a ti rawh.

⁷Jerusalem saklei tlâng tlûnah Kemos Moab pathian fihnungkâi sawnhnâk leh Amon pathian fihnungkâi Milkom sawnhnâk mun a siam.

⁸Ramdang mi a nupi tla nih an pathian sinah anna bâwlnâk leh rimthâw an duahnâk ding mun a siam piak na.

⁹Chu hâwi si menza khawmsele LALPA Israel Pathian chu Solomon sinah veinih â lângh le, ramdang pathian tla sawnh lo ding hen thu a pêk. Solomon nih LALPA thu chu ngâilo hen kâng dang leiah a hertâk rawh. Churawhchun LALPA chu Solomon tlûnah a thin a run le, a sinah,

¹¹“Ka sinah na thutiam chu na râwk le, ka thusim tla na ngâi lo ruangah na sinah mi lalram chu ka lâk lai le, na rianṭuantu pakhat sinah ka pêk awt.

¹²Sikhawmsele, na pa David ruangah na dam karah chun chu chu ka ti lai loh, na fapa a lal tikah asi lai.

¹³Ram pumpi lam chu ka suh lai lo le, ka to-aw David ruangah leh Jerusalem ka thîm mi ruangah phun khat lam chu na fapa ka pêk lai.

¹⁴LALPA nih Edom lal thlâk lakah mi Hadad chu Solomon dotu ah a siam.

¹⁵A lânah David nih Edom ram a lâk liauah a kawrsen hotu Joab chu a thi mi tla vûi ding hen a kal. A hâwi tla hen Edom ram ah thla ruk an um le, chu liauah chun mipa fa vial chu an thah hep na.

¹⁷Hadad leh a pa to-aw Edom mi tla Aigupta ram ah an tek mi cho an dam; (Chu liauah chun Hadad chu ngâksiatê asi.)

¹⁸Midian ram chu an kaltâk le, Paran ah an va kal le, chunah chun midang tla hen an va a fawnh. Churawhchun Aigupta lalchem sinah an va kal le, anih nih Hadad rangah ram leh in leh tî-le-râwl tla a pêk.

¹⁹Hadad chu bâwi hâwikawmh asi le, lal nih a nupi naunu Tahpenes hen a umhtir na.

²⁰Tahpenes nih fapa Genubath a ring piak. Lalnu nih lal in ah a châwm piak le, lal fapa tla hen Genubath chu munkhat hen an um.

²¹Hadad nih David leh a kawrsen hotu Joab a thi mi thâwngthâng chu Aigupta ram ah a theih le, lalchem sinah, “Ka ram leiah hawng ka kîrtir nawlh rawh,” a ti.

²²Lalchem nih, “Zeirangah chun, thil ka nan pêk lo mi ma a um; churuangah ma in leiah kîr ding na duh?” a ti. Hadad nih a sâng le, “Hawng ka kaltir ko râu rawh,” a ti. Churawhchun a ram leiah a tlung rawh. Edom lal hâwi ber hen Hadad chu Israel mêlma leh sual tak asi.

²³Eliada fapa Rezon khawm chu Pathian nih Solomon dotu ah a siam. Rezon chu a hotupa lalchem Hadadezer, Zobah mi thawk hen a tek le,

²⁴dân buartu murui hotu ah a um. (Hi hi Hadadezer rangah David nih a neh le, Siria minung tla a thah na nûnah a hawng um mi asi.) Rezon chu a minung tla hen Damaska ah an kal le, chunah amah minung tla nih Siria lal ah an siam.

²⁵Solomon dam sung zawzawng chu Israel tla mêlma asi.

²⁶Efraim ram ah Zeredah khua mi Nebat fapa Jeroboam, amah rianṭuantu pakhat chu lalchem Solomon tlûnah a hel. A nu chu numei asi le, a min chu Zeruah asi.

²⁷Hi hi helnâk thu chu asi: Solomon nih Jerusalem saklei ram ah mi khuapi tla a tharh nawlh.

²⁸Jeroboam chu tlangvâl chak tak, thiltikho tak asi le, Solomon nih ṭha tak hen rian a ṭuan mi a theih le, Manaseh leh Efraim phun umnâk ram ah rianṭuantu tla zawzawng hotu ah a siam.

²⁹Ni khat chu amah lâwng hen Jerusalem thawk hen khualtlâwng a kal liauah Siloh khua mi khuavâng Ahijah hen ram ah lampi ah anna tawng.

³⁰Ahijah nih kawrfual â ruk mi a lît le, sêu leinih ah a thlêk le,

³¹Jeroboam sinah, “Sêu râ hi nangmah rangah a lâk le, LALPA Israel Pathian nih na sinah, ‘Solomon sinah mi lalram chu ka lâk lai le, phun râ chu nangmah rangah ka nan pêk awt.

³²Ka to-aw David ruangah leh Israel ram pumpi ah ka tâ rang dingah Jerusalem ka thîm mi ruangah phun khat chu Solomon nih a ting bâk seh.

³³Solomon nih hawng ka nawng le, ramdang pathian tla: Astarte, Sidon pathiannu, Kemos Moab pathian, Milkom Amon pathian a sawnh ruangah chu hâwi hen ka ti awt mi asi. A pa David nih a ti hâwi hen ka thu ngâilo hen thilsual a ti le, ka thupêk leh ka dân thu tla khawm a zûl lo.

³⁴Sikhawmsele, a ram pumpi lam chu ka lâk piak lai lo, a damsung zawzawng chu ka thiltikhonâk hen ka hum lai. Hi ka ti awt mi hi ka to-aw David ka thîm mi, ka dân thu leh ka thupêk a ngâi ruangah asi.

³⁵Solomon fapa lakah mi ram chu ka lâk lai le, phun râ ka nan pêk lai.

³⁶Solomon fapa rangah phun khat ka tingtir lai; ka to-aw David thlâk tla nih keimah an hawng ka sawnhnâk rang dingah ka thîm mi Jerusalem ah lâi a rêl kumza ding hen.

³⁷Jeroboam, Israel lal ah ka nan siam lai le, na duh duh hen ram pumpi ah lâi na rêl lai.

³⁸Ka thu zawzawng na ngâi hen ka dân tla na zûl hen ka to-aw David hâwi hen thu ka nan pêk zia hâwi hen na um chun na sinah ka um kumza lai. Israel lakah lal ah ka nan siam lai le, David rangah ka ti mi hâwi hen na nehnûn khawmah na thlâk tla lâirêltu ah ka siam vima lai.

³⁹Solomon sualnâk ruangah David thlâk tla chu ka rêp na awt; sikhawmsele a tlâitluan lam chu asi lai loh,” a ti.

⁴⁰Churawhchun Solomon nih Jeroboam chu thah ding a awt rawh. Sikhawmsele Aigupta lalchem Sisak in ah a tek le, Solomon thih tiang hen chunah a um ko.

⁴¹Solomon nih thil zawzawng a ṭuan mi leh a khalh dân leh a finghnâk zawzawng chu Solomon thâwngthâng rînnâk bu ah singsiah asi.

⁴²Jerusalem ah Israel tla tlûnah kum sâwmli a lal.

⁴³A thi le, David khuapi ah an vûi. A fapa Rehoboam chu a ruangrûl ah a lal.