Read Bawm Chin 1 Lal 12 Bible Online

1 Lal 12 - Bawm Chin bible

1 Lal 12

¹Rehoboam chu marlei mi Israel tla mah lal ah siam ding hen anna pûmnâk khua Sekem ah a va kal.

²Nebat fapa Jeroboam, Solomon sinah thawk hen Aigupta ah a tek mi nih chu thu chu a theih le, Aigupta thawk hen a hawng kîr.

³Marlei mi phun tla nih a sinah mi an fial le, an ektê hen Rehoboam sinah an va kal le,

⁴“Na pa Solomon chu kan lakah a ṭha lo thlo, thungâi hawng kan hamhtir; chu hâwi hamhtir lo rawh hen ngandam dauh hen na kan umtir chun na rangah ti-leh-khua zahkâi tak kan si lai,” an ti.

⁵Anih nih a sâng le, “Ni thum nûnah hawng ule, a sângnâk ka nan pêk na lai,” a ti na. Churawhchun an kal rawh.

⁶A pa Solomon krai pêktu upa tla sinah krai a va khâi. “Hi bang minung tla hi zei hâwi ka sâng na lai,” ti hen a deih na.

⁷Annih nih, “Hi minung tla hi kilkâwi na duh asi chun sunhsak tak hen na sâng na ding asi, na lakah zumhkâi tak hen an um kumza lai,” an ti.

⁸Sikhawmsele, upa tla krai pêk chu a ngâi duh lo le, ngâi ding ngangâk hen a sinah tlangvâl um mi tla sinah lam a va kal.

⁹Tlangvâl tla sinah, “Nannih teh zei hâwi krai nan hawng ka pêk awt? Zapi minung nih an ngandam dauh ding a siam na ding hen an hawng ka deih mi chu zei hâwi hen ka sâng na lai?” ti hen a deih na.

¹⁰Annih nih, “Na simh na ding mi chu hi hâwi asi: ‘Ka ngetê hi ka pa tâi ngâk hen a lian dauh!

¹¹Ka pa nih nan tlûnah thilrit an phurhtir na mi ngâk hen rit dauh hen kan phurhtir na awt. Ka pa nih vuakfung hen a nan vuak na le, kei lam nih chun rang vuaknâk hen ka nan vuak na awt, ti na,” an ti.

¹²Ni thum a tling rawh chun Jeroboam leh mipi tla chu amah nih a simh na mi hâwi hen lalchem Rehoboam sinah an va kal.

¹³Upa tla nih krai an pêk mi chu a ngâi duh lo le, tlangvâl tla nih krai an pêk mi hâwi hen a ro hen mipi sinah thu a sim:

¹⁴“Ka pa nih thilrit an phurhtir na mi ngâk hen rit dauh hen kei nih chun kan phurhtir na awt; anih nih vuakfung hen a nan vuak na le, kei nih chun rang vuaknâk hen ka nan vuak na awt!” a ti na.

¹⁵Chu hâwi thil a hawng um mi chu Siloh khua mi khuavâng Ahijah mang hen LALPA nih Nebat fapa Jeroboam sinah thu a sim mi a hawng tlung mi asi. Churuangah asi, lalchem nih zapi thu tla a ngâi piak duh na lo mi chu.

¹⁶Mi zapi tla nih chun lalchem nih an thu a ngâi piak duh na lo ti an theih rawh chun, “David leh a dâwngsungkhur tla chu niamh hen um seh! Kan rangah zei thil me an ti mi a um? Israel mi tla, kan tlung lai rawh! Rehoboam chu amah leh amah a zauhkhenh seh!” an ti. Churawhchun Israel mipi tla chu an hel le,

¹⁷Juda ram ah um mi vial tla tlûnah cho lal ding hen Rehoboam chu an kaltâk rawh.

¹⁸Chun, lalchem Rehoboam nih rianṭuantu murui lakah hotu Adoniram chu Israel tla sinah a fial le, sikhawmsele lung hen thi thlo an seh. Churawhchun Rehoboam chu mawhsareh hen a kari ah â chuan le, Jerusalem leiah a tek ving.

¹⁹Chu liau thawk hen chun Israel marlei kângah mi lalram chu David dâwngsung tlûnah an hel rawh.

²⁰Israel mi tla nih Jeroboam Aigupta ah mi a hawng kîr nawlh rawh ti an theih le, zapi minung pûmnâk an sâwm le, Israel lal rangah an toh rawh. Juda thlâk tla cho lo chu âukhawm David dâwngsung lakah an um lo rawh.

²¹Rehoboam chu Jerusalem ah a hawng tlung rawh chun Juda leh Benjamin phun lakah mi kawrsen ṭha chem mi karo 180,000 a pumh na. Marlei ah Israel tla tlûnah thunei nawlh ding hen do na ding a tum.

²²Sikhawmsele, Pathian nih khuavâng Shemaiah sinah

²³hi thâwngthâng hi Rehoboam, Juda leh Benjamin phun tla sinah simh na ding hen a simh:

²⁴“Nan unau Israel mi tla rangah do na lah u. Nan in leiah tlung ver u, thil a hawng tlung mi tla hi keimah ruat mi ver asi, ti hi,” a ti. LALPA thupêk chu an ngâi le, an ektê hen in leiah an kîr hep.

²⁵Jeroboam nih Efraim tlâng ram Sekem khua ah kulh a siam le, chunah zeimaw tiang a um. Chu chu a mâk le, Penuel khua kulh a siam fâwn.

²⁶A thinlung hen, “Tuah thil umdân hâwi nget hen asi chun ka mi tla Jerusalem Biakin ah bâwlnâk an va ap lai le, Juda lalchem Rehoboam leiah anna ṭângṭawm lai le, an hawng ka thah lai,” ti a ruat.

²⁸Chu hâwi hen a ruat thluh rawh chun, ngûn hen chawchal lem a siam le, a mi tla sinah, “Jerusalem ah Pathian sawnh hen nan kal ding khawm a lât thlo; Israel mi tla, hi hi Aigupta thawk hen an suakpi natu pathian tla an si!” a ti.

²⁹Pakhat chu Bethel ah a siah, pakhat chu Dan ah a siah.

³⁰Chu hâwi hen Bethel leh Dan ah pathian tla sawnh ding hen an kal mi ruangah zapi tla nih thilsual an ti rawh.

³¹Jeroboam khawm nih tlâng tlûnah sawnhnâk mun a siam le, Levi phun silo mi dâwngsungkhur ah mi bâwlpu rangah a thîm.

³²Juda ram ah kût hâwi hen Jeroboam nih thla riatnâk ni leinga ni chu kût ni si ding hen a dirhpi na. Bethel mâichâm ah chun amah siam mi ngûn chawchal ruk sinah bâwlnâk a ap. Bethel ah chun a lal in ah sawnhnâk mun a siam mi lakah bâwlpu a siah.

³³A thla riatnâk ni leinga ni ah amah ngelchel chu Bethel ah mâichâm ah bâwl ding hen a va kal le, chu kût ni ah chun mâichâm ah bâwlnâk a va ap. Israe tla rangah kût mang ding dân a simh na mi hâwi hen.