Read Bawm Chin 1 Lal 13 Bible Online

1 Lal 13 - Bawm Chin bible

1 Lal 13

¹Juda ram thawk hen khuavâng pakhat LALPA thupêk hen Bethel ah Jeroboam nih bâwlnâk ap ding hen mâichâm kiangah a dîr liau chirah a va tleng.

²LALPA thupêk zûl hen khuavâng nih mâichâm thu a sim: “Mâichâm, mâichâm! Hi hi Pathian thusim asi: Ngâksia a min Josia chu David dâwngsungkhur ah a hawng suak awt. Anih nih chun lunglotu tla mâichâm ah rianṭuantu tla bâwlpu, bâwlnâk ap tâwntu tla chu a thah na lai le, an ruh tla chu na tlûnah hin a duah lai,” a ti.

³Khuavâng nih a sim vima le, “Hi mâichâm hi a tlû hen â râwk lai le, a tlûnah vachâm tla hi â thektham ver lai. Chu tikah keimah mang hen Pathian nih thu a sim mi hi na theih lai,” a ti.

⁴Lalchem Jeroboam nih chu chu a theih rawh chun khuavâng chu a khît le, thu a pêk na, “Khi minung khi tleih u,” a ti ka hen lal kut chu a khêng ving le, a bân chu a tum kho lo rawh.

⁵Mâichâm chu a tlû le, â râwk chawlh, vachâm khawm tual ah a tlê hep. Khuavâng nih LALPA min hen a simkan ziatê hen a hawng um taktê rawh.

⁶Lalchem Jeroboam nih khuavâng sinah, “Zângfahtê hen LALPA na Pathian sinah thlacham le, ka bân a dam khonâk ding hen hawng ka ngiar piak râu rawh,” a ti. Khuavâng nih LALPA sinah thla a cham piak le, lal kut chu a dam rawh.

⁷Churawhchun lalchem nih khuavâng sinah, “Ka in ah hawng le, zeimawh ei ding ka nan pêk lai; na thilti ruangah lâwmman khawm ka nan pêk lai,” a ti.

⁸Khuavâng nih a sâng le, “Na neih khingkhuai hawng ka pêk menza khawm le, na sinah din ding leh ei ding hen ka hawng ding asi lo.

⁹LALPA nih zeikhawm na din hen na ei ding asi lo, chun na kalnâk lampi hen in leiah na tlung ding asi lo hawng ka ti,” a ti.

¹⁰Churawhchun a kalnâk lampi leiah kal lo hen lam dang lei hen a kîr.

¹¹Chu liauah chun Bethel ah khuavâng tar pakhat a um. A fapa tla an hawng le, Juda ram thawk hen a hawng mi khuavâng nih thil a ti mi leh chu liauah lalchem Jeroboam sinah thu a sim mi tla chu an simh.

¹²An pa khuavâng tar nih, “A tlung liauah zei lampi ah a tlung?” ti hen a deih na.

¹³A kalnâk lampi chu an simh le, “Ka rangah sanatung hawng ka timhtuah piak u,” a ti na.

¹⁴Annih nih an timhtuah piak le, Juda ram mi khuavâng dunglei ah a va kal le, oak thing tangah a to liauah an va tawng. “Juda ram mi khuavâng ma na si?” ti hen a deih. Anih nih, “Si ta a,” ti hen a sâng.

¹⁵“Ka in leiah hawng le, buh hawng ei,” a ti.

¹⁶Sikhawmsele, Juda ram mi khuavâng nih a sâng le, “Na ka sâwm mi hâwi hen na in ah ka hawng kho lai loh. LALPA nih,

¹⁷‘Zeikhawm na ei hen na din ding asi lo, na kalnâk lampitê hen khawm na hawng kîr ding asi lo, a ti ruangah,” a ti.

¹⁸Churawhchun Bethel mi khuavâng tarpa nih a sinah, “Kei khawm nangmah hâwi hen khuavâng ka si bâk, LALPA thupêk hen vânmifial nih ka in ah kalpi ding leh sunhsaknâk an pêk ding hen hawng ka simh asi, “a ti. Sikhawmsele, chu khuavâng tarpa nih âwkrâwl thu a sim mi asi.

¹⁹Churawhchun Juda ram mi khuavâng chu khuavâng tarpa in ah a va kal le, a sinah buh a ei rawh.

²⁰Buh an ei le, an to liau chirah chun LALPA thu chu khuavâng tarpa sinah a hawng tlung le,

²¹Juda ram mi khuavâng sinah thu a sim, “LALPA nih hi hâwi hen thu a sim: “Thu ka nan pêk mi ngâi lo hen na kîr le, din leh ei lo ding mi ngâi lo hen na ei le;

²²churuangah thah hen na um lai le, na dâwngsung tla thlân lakah vûi na si lai loh,” ti hen a simh.

²³Buh ei anna lîm rawh chun khuavâng tarpa nih Juda ram mi khuavâng rangah sanatung a timhtuah piak le, a kal rawh.

²⁴Lampi ah chakeibaknei hen anna tawng le, a seh ving. A ruak chu lampi ah a ril ko, sanatung leh chakeibaknei khawm a kiangah an dîr ko.

²⁵Mivel paltu tla nih lampi ah mi ruak leh a kiangah chakeibaknei a dîr mi chu an muh. Bethel khua ah an va kal le, an thilmuh tla chu an va sim.

²⁶Khuavâng tarpa nih chu thu chu a theih le, anih nih chun “LALPA thupêk ngâilotu khuavâng ma chu a! LALPA nih a thupêk hâwi a ti lo chun chakeibaknei a hawng fial lai le, a ti mi hâwi hen a ti taktê ma chu,” a ti.

²⁷Churawhchun, a fapa tla sinah, “Ka sanatung hawng ka timhtuah piak u,” a ti na le, an timhtuah piak.

²⁸Churawhchun lampi ah mi khuavâng ruak leh chakeibaknei leh sanatung a dîr mi chu a va muh. Chakeibaknei nih ruak chu a ei lo, sanatung khawm chu a seh lo.

²⁹Khuavâng tarpa nih a ruak chu a lâk le, sanatung tlûnah a thâng le, Bethel ah sûn ding hen a kalpi.

³⁰Amah dâwngsungkhur thlân ah a vûi le, amah leh a fapa tla nih an sûn le, “Ka unaupa, unaupa!” a ti,

³¹An vûi thluh rawh chun khuavâng tarpa nih a fa tla sinah, “Ka thih tikah hi thlân ah hin hawng ka vûi bâk ule, a thihnâk kiangah hawng ka vûi bâk u.

³²LALPA thupêk hen Bethel ah mi mâichâm leh Samari ram khuapi ah sawnhnâk mun zawzawng thu a sim mi kha a hawng tlung ngelchel lai,” a ti.

³³Israel Lalchem nih chun a thilsual ti a rim duh rerêng loh, a mâichâm siam lakah rianṭuantu ding hen mi salam bâwlpu a thîm nget rih. Âuzawng a duhtu chu bâwlpu ah a siam vima na.

³⁴Hi sualnâk a ti mi nih hin a lal thlâk rangah siat leh râwknâk lian tak a tlungtir.