Read Bawm Chin 1 Lal 16 Bible Online

1 Lal 16 - Bawm Chin bible

1 Lal 16

¹LALPA nih khuavâng Hanani fapa Jehu sinah hi thu hi Baasha sinah va sim ding hen a simh:

²“Nang chu zeikhawm na silo, sikhawmsele Israel mi tla ruitu ah ka nan siam. Tuah Jeroboam hâwi hen na sual le, ka mi tla thilsual na tipi na. An sualnâk nih ka thin an thawktir le,

³Jeroboam tlûnah ka ti mi hâwi hen nang leh na dâwngsungkhur hen ka nan veih dep na awt.

⁴Na dâwngsungkhur khuapi sungah thi mi chu ui nih an ei lai le, mâng ah thi mi tla chu langdak nih an ei lai,’’ a ti.

⁵Baasha thilti zawzawng leh râlṭha tak hen thil a ti mi chu Israel lal thâwngthâng rînnak bu ah rîn asi.

⁶Baasha chu a thi le, Tirzah ah an vûi, a fapa Elah chu a ruangrûl ah a lal.

⁷Baasha leh a dâwngsung thu khuavâng Jehu nih a sim mi chu Baasha nih LALPA lakah a thilsual ti ruangah asi. LALPA thin a thawktir mi chu Jeroboam nih a lânah thilsual a ti mi hâwi hen a ti ruang lâwng khawm asi lo. Jeroboam dâwngsungkhur a thah hep ruang khawm asi.

⁸Juda lalchem Asa nih lâi a rêl mi a kum kul leh kum ruknâk ah Baasha fapa Elah chu Israel lalchem a hawng si le, Tirzah ah kum nih lâi a rêl.

⁹A hotu pakhat lal kari khingkhuai vêngtu Zimri nih a phiar. Ni khat chu Tirzah khua ah Elah nih Arza lal in vêngtu in ah zû a din.

¹⁰Zimri chu in sungah a va lût le, Elah chu a thah rawh, a ruangrûl ah a lal rawh. Hi hâwi hen thil a hawng um mi chu Asa nih lâirêlnâk a kum kul leh kum sarihnâk ah asi.

¹¹Zimri chu lal asi ka hen Baasha dâwngsungkhur a thah hep na. Anmah taksa tlâi leh mipa zawzawng a thah hep na.

¹²Zimri nih Baasha dâwngsungkhur a thah hep na mi chu LALPA nih khuavâng Jehu mang hen thu a sim mi tê kha asi.

¹³An ruk sawnhnâk leh Israel mi tla thilsual an tipi na ruangah Baasha leh a fapa Elah nih LALPA Israel Pathian thin an thawktir.

¹⁴Elah thilti zawzawng chu Israel lal thâwngthâng rînnâk bu ah an rîn asi.

¹⁵Lalchem Asa nih lâi a rêl mi kum kul leh kum sarihnâk ah Zimri nih, Israel tlûnah Tirzah khua ah ni sarih lâi a rêl. Israel kawrsen tla nih Philistia ram ah mi Gibethon khua an hual le,

¹⁶Zimri nih lal a phiar le, a thah mi thu an theih rawh chun Israel lalchem kawrsen hotu Omri chu Israel lalchem asi ti hen an phuang.

¹⁷Omri leh a kawrsen tla chu an kal le, Tirzah khua chu an hual.

¹⁸Churawhchun Zimri nih khua a lâk rawh ti a theih rawh chun lal in kulh sungah a lût le, mei hen a duah khumh le, a thi rawh.

¹⁹Hi hâwi thil a hawng um mi hi amah lânah Jeroboam nih a thilsual ti ruangah leh Israel mi tla thilsual a tipi na mi ruangah LALPA thin a runhtir mi hâwi hen anih khawm nih thilsual ti hen LALPA thin a runhtir bâk ruangah asi.

²⁰Zimri thilti zawzawng mi a phiarnâk tla chu Israel lal tla thâwngthâng rînnâk bu ah rîn asi.

²¹Israel tla lakah ṭhennâk a hawng um le, mi zeimaw mi nih Ginath fapa Tibni chu lal ah an duh, a dang nih Omri an duh.

²²A nehnûnah chun Omri duhtu lei mi nih an neh na rawh. Tibni chu a thi le, Omri chu a lal rawh.

²³Juda lalchem Asa nih lâi a rêl mi kum sâwmthum leh kum khat kum ah Omri chu Israel lalchem a hawng si; kum leinih lâi a rêl. A masa hen Tirzah ah kum ruk lâi a rêl.

²⁴Churawhchun Samari tlâng ram tangka sâng ruk hen mi pakhat Semer thawk hen a châwk. Omri nih tlâng ah kulh a siam le, chunah chun khuapi a siam. A lânah mi tlâng neitupa min put hen a min ah Samari a sak.

²⁵Omri chu amah lânah mi zawzawng tla ngâk hen LALPA lakah thilsual a ti dauh.

²⁶Amah lânah Jeroboam bang hen amah sualnâk lehruk sawnh hen Israel mi tla a sualpi na mi ruangah LALPA Israel Pathian thin a runhtir.

²⁷Omri thilti zawzawng leh a dang tla chu Israel lal thâwngthâng rînnâk bu ah rîn asi.

²⁸Omri chu a thi le, Samari ah an vûi le, a fapa Ahab chu a ruangrûl ah a lal.

²⁹Juda lalchem Asa nih lâi a rêl mi kum sâwmthum leh kum riatnâk kum ah Omri fapa Ahab chu Israel lal a hawng si le, Samaria ah kum kul leh kum nih lâi a rêl.

³⁰Amah lânah mi zawzawng ngâk hen LALPA lakah thilsual a ti mi a zual khun.

³¹Jeroboam hâwi hen thilsual a ti mi lâwng tâwk tilo hen Sidon lalchem Ethbaal fanu Jezebel a umpi le, Baal a sawnh sap rih.

³²Samaria ah Baal biakin a sak le, Baal mâichâm a siam le, biakin ah chun a siah.

³³Aserah pathiannu lem khawm a siah fâwn. Israel lalchem a lânah mi zawzawng ngâk hen LALPA Israel Pathian thin a runhtir khun.

³⁴A lal liauah Bethel ah mi Hiel nih Jeriko khua a tharh nawlh. LALPA nih Nun fapa Josua a simkanhtir rawh hâwi hen Hiel nih Jeriko lungphûm a dirh liauah a fapa upachem Abiram nih a thih tâk le, a kulh kawtkâ a siam liauah a fapa ngâksia chem mi Segub nih a thih tâk.