Read Bawm Chin 1 Lal 18 Bible Online

1 Lal 18 - Bawm Chin bible

1 Lal 18

¹Chu nehnûnah ni khuakheu a kum thumnâk ah LALPA nih Elija sinah, “Lalchem Ahab sinah kal le, va a langh, ruah ka hawng sûrtir awt rawh,” a ti.

²Churawhchun Elija chu â thawh rawh. Samari ram ah pâmnâk chu a zual liau chir asi.

³Ahab nih Obadiah lal in ah hotu chu a kawh. (Obadiah chu LALPA sawnhtu sunhsak mi tak asi le,

⁴Jezebel nih LALPA khuavâng tla a thah na liauah Obadiah nih khuavâng zâ a kalpi na le, pûk ah sâwmnga hen murui nih a suah na le, pûk ah a thuh na; an ei ding buh leh tî a ruat piak na.)

⁵Ahab nih Obadiah sinah, “Ram lakah tî umnâk leh tinungva kan va hâwl lai, rang tla leh sanatung tla nungnâk rangah belh kan tawng kho lai mawh; chu tikah kan ran tla hi kan hum kho lai,” a ti.

⁶Ram an kalnâk chu anna ṭhen le, mah kalnâk chiauah mun dang dang ah an va hâwl.

⁷Obadiah chu lampi ah a kal liauah Elija hen anna tawng thap. Obadiah nih chun a theih kher le, a mâika ah a kûn le, “Nangmah mu Pu?” a ti.

⁸Elija nih a sâng le, “Mah ta a, Elija ka si. Kal le, na pu bâwipa chu hinah ka um mi hi va simh,” a ti.

⁹Obadiah nih a sâng le, “Zei thil me ka ti, chu hâwi hen lalchem Ahab nih thah ding hen ṭihnungkâinâk ah na ka siah awt zia?

¹⁰LALPA, na Pathian min sal hen ka sim asi, lal nih ram pumpi ah nangmah hâwltu a siah asi. Zeiliau zawngah ram lakah lâirêltu nih a um lo ti hen lal sinah an sim chun Ahab nih chu lâirêltu tla rangah an muh lo tak ma siat a sirhtir vima na.

¹¹Tuah nang hinah na um mi hi va simh ding hen na ka duh mu?

¹²Ka kal karah LALPA thlarau nih theihlonâk mun ah an put ving chun tene? Khinah a um ko ti hen Ahab ka simh mi lakah an tawng kho lo chun hawng ka thah ding ko rawh. Kei chu ka mêttê thawk hen Pathian sawnh leikângah sunhsak mi ka si ti hawng ka theih.

¹³Jezebel nih khuavâng tla a thah na liauah khuavâng zâ pûk lakah sâwmnga hen murui nih ka suah na le, buh leh tî ka pêk na mi kha na theih lo na maw?

¹⁴Churuangah zeitin hinah na um mi hi lal va simh ding hen na ka fial kho zia? Anih nih hawng ka thah ding nget!” a ti.

¹⁵Elija nih a sâng le, “LALPA zeizawng tikho, a rian ka ṭuan mi min sal hen ka sim asi, tusûn chu lal mâika ah ka langh awt,” a ti.

¹⁶Churawhchun Obadiah chu lalchem Ahab sinah a va kal le, a va simh; lal Ahab chu Elija hen a tawng ding hen a kal rawh.

¹⁷Ahab nih a muh rawh chun a sinah, “Israel nawktirtu, na um ko mu!” a ti.

¹⁸Elija nih a sâng le, “Kei chu nawktirtu ka silo, nang leh na pa nan si. LALPA thupêk zûl lo hen Baal ruk na sawnh.

¹⁹Tuah Israel mi zawzawng tla Karmel Tlâng ah keimah hen a tawng ding simh na. Baal khuavâng zali leh sâwmnga leh lalnu Jezebel nih a ṭangpi na mi Aserah pathiannu khuavâng zali hawng put na,” a ti.

²⁰Churawhchun Ahab nih chun Israel mi zawzawng leh Baal khuavâng tla chu Karmel Tlâng ah a kawh na.

²¹Elija chu mi zapi tla sinah a va kâi le, an sinah, “Zei tiang riamruam me nan thinlung remh lo hen nan um awt? LALPA chu Pathian asi chun amah chu sawnh u; sikhawmsele Baal chu pathian asi chun amah chu sawnh ko u!” a ti. Sikhawmsele, zapi tla chu an dâisip.

²²Churawhchun Elija nih, “LALPA khuavâng um lem mi chu keimah lâwng ka si; sikhawmsele Baal khuavâng lam chu mi zali leh sâwmnga an um.

²³Chawchal panih hawng put u: Baal bâwlpu tla nih pakhat lâk na sele, thah hen a sa chan dip na sele, thing tlûnah siah na sele; sikhawmsele mei tih lah na seh. Kei khawm nih chawchal dang pakhat hen chu hâwitê hen ka ti lai.

²⁴Baal khuavâng tla nih an pathian sinah thlacham na seh; kei khawm LALPA sinah thla ka cham bâk lai le; kan thlachamnâk sâng hen mei hawng tirtu chu Pathian tak asi lai,” a ti. Chun, mi zapi nih chun asi ngâk ti hen an âu.

²⁵Churawhchun Elija nih Baal khuavâng tla sinah, “Nannih chu nan tam thlo ruangah chawchal hi timhtuah masa u; nan pathian sinah thlacham ule, thing chu mei hen duah lah u,” a ti.

²⁶Chawchal an pêk na mi chu an lâk le, an timhtuah le, Baal sinah nî sûn tiang hen thla an cham, “Baal, hawng kan sâng rawh!” ti hen an âu le, lâm bû hen mâichâm an hêl. Sikhawmsele sângnâk rêng a tleng lo.

²⁷Nî a sûn rawh chun Elija nih a tluktlak na rawh: pathian asi mi chu fâk dauh hen thlacham u! Sûnlâivâr ah pâwng a kal mi mawh â dîn mi mawh asi kho, a um lo hen mawh a dêng ah, khualtlâwng ah a va kal ving mi mawh asi ah, a it thlit mawh asi ah ṭhangh u!” a ti na.

²⁸Churawhchun khuavâng tla chu fâk dauh hen an âu le, an dân hâwi hen anmah leh anmah thî suak rê hen nâmtê hen anna ât le, anna rawi.

²⁹Sûnnilei nî phei khet tiang a mal hen an âu le, an tlawk chur; sikhawmsele zei sângnâk khawm a um lo, zei hâu khawm â thei lo.

³⁰Churawhchun Elija nih mipi tla sinah, “Hawng ka naih dauh u,” a ti le, an ektê hen a kiangah an va a pûm. Mâichâm a râwk chia kha a tharh nawlh.

³¹Pathian nih a min ah Israel ti hen a sak mi Jakob fapa tla phun leinih min hen lung leinih a sar, phun khat rangah pakhat vima ding hen.

³²Chubang lung tla hen LALPA mâichâm sawnhnâk ding hen a siam nawlh, a kiang hêl dak hen tî litre leili tlum ding tâwk hen a chawh.

³³Chu mâichâm tlûnah thing a pawng le, chawchal chu a chan dip le, a tlûnah a siah. “Bêl pali khat phak hen tî than ule, chaw sâ leh thing tlûnah tawih u” a ti na le, chu hâwi hen an ti.

³⁴“Tawih nawlh u,” a ti na le, an tawih nawlh. “Veikhat tawih nawlh u rih,” a ti na le, an tawih nawlh.

³⁵Tî chu mâichâm kiangah khur chawh chu a khat le, a liam rê.

³⁶Sunnilei bâwlnâk hun ah khuavâng Elija chu mâichâm leiah thlacham ding hen a va kal le, “LALPA, Abraham Pathian, Isak leh Jakob Pathian, nang Israel Pathian na si mi leh kei na to-aw ka si ti theihnâk ding hen hi bang zawzawng hi nangmah nih thupêk hen hawng ti rawh.

³⁷LALPA, hawng ka sâng rawh, LALPA hawng ka sâng rawh. Hi bang minung tla nih hin nang chu LALPA Pathian na si zia leh nangmah leikângah na kawh na nawlh ti an theih khonâk ding hen,” a ti.

³⁸LAI PA nih mei a hawng thlâk le, bâwlnâk chu thing tla, lung tla a kâng hep le, tualchâr fêk hen a kâng hep le, a kiangkam ah chawh mi lakah tî khawm a kâng hep.

³⁹Chubang chu mi zapi minung nih an muh rawh chun tual ah anna lawnh ro le, “LALPA chu Pathian asi, amah cho chu Pathian asi!” ti hen an âu.

⁴⁰Elija nih, “Baal khuavâng tla kha tleih na ule, pakhat khawm suah lah na u, a ti na. Mi zapi tla nih an tleih hep na le, Elija nih Kison tiva ah a kalpi na le, a thah hep na.

⁴¹Churawhchun Elija nih lalchem Ahab sinah, “Tuah kal le, buh ei rawh. Ruah a hawng mi hâu ka theih,” a ti.

⁴²Ahab buh a ei karah Elija chu Karmel Tlâng ah a va kâi le, chunah chun bawkbukhup hen a khûp karah tual leiah a lû buk bû hen

⁴³a to-awpa rangah, “Kal le, tipi leikâng khi va zauhnik,” a ti. A to-aw chu a va kal le, a hawng kîr nawlh le, “Zeikhawm ka muh lo,” a ti. Chu hâwi va zauh ding hen Elija nih vei sarih a fial.

⁴⁴A vei sarihnâk ah a hawng kîr le, “Vândâwm kuttum tia hen tipi thawk hen vân leiah a kâi mi ka muh,” a ti. Chun, Elija nih a to-aw sinah, “Lalchem Ahab sinah va kal le, ruah nih a kham lânah a kari sungah lût sele, kîr ding hen simh,” a ti.

⁴⁵Sâwtlotê ah vân chu sûm nih thim chuar hen a khuh le, thlilêng a hawng a dawmh rawh le, ruah tukpi a hawng sûr rawh. Ahab chu a kari sungah a lût le, Jezreel leiah kîr ding â thawh rawh.

⁴⁶LALPA thiltikhonâk chu Elija sinah a hawng tlung le, a tâi mi puan chu a sawmh le, Ahab mâilei ah Jezreel lampi tluan hen a tek.