Read Bawm Chin 1 Lal 19 Bible Online

1 Lal 19 - Bawm Chin bible

1 Lal 19

¹Lalchem Ahab nih a nupi Jezebel sinah, Elija thilti zawzawng leh Baal khuavâng zawzawng a thah mi thu tla a simh.

²Elija sinah Jezebel nih thu a thanh, “Thâituan tu tik dingah khuavâng tla tlûnah na ti mi hâwi hen ka nan tilo mi asi chun pathian tla nih thi thlo hen hawng ka vuak seh,” a ti.

³Elija chu a ningṭih le, a nungnâk him ding hen a to-aw a kalpi le, Juda ram ah mi Bersheba ah a kal rawh. Chunah chun a to-aw a mâk thlap le,

⁴ramkaro ah nî tlâk a kal. Chunah chun thing dâidul ah â din le, thih a hauh le, “LALPA a ti tuktarâi rawh, ka nungnâk hi lâk ko rawh, ka thi ko lai rawh!” ti hen thla a cham.

⁵Thing tangah a zâu le, a it rawh. Vânmifial nih lâkkhatko ah a hawng tawngh le, a sinah, “Thawk le, buh ei rawh,” a ti.

⁶A kiangkam a zauh le, sang tlang leh tî dûr lakah mi tî a muh. A ei hen a din le, a it nawlh fâwn.

⁷LALPA vânmifial nih a veihnihnâk ah a hawng kîr nawlh le, a thawh nawlh, “Thawk le, buh ei, na kalnâk ding lampi na rangah a lât tuk,” a ti.

⁸Elija chu a thawk le, a ei le, a din. A buh ei nih chun Sinai Tlâng thenhlimh leiah ni sâwmli kal khonâk ding hen chaknâk a pêk.

⁹Chunah mi pûk ah a lût le, zân ah a it. Lâkkhatko ah LALPA nih a sinah thu a hawng sim le, “Elija, hinah zei me na ti?” a ti.

¹⁰Anih nih a sâng le, “LALPA, Pathian zeizawng tikho, nangmah nâwl cho ka nan zulh. Sikhawmsele na mi Israel tla nih an sinah thudân na tuk mi an buar le, na mâichâm tla an siat, na khuavâng zawzawng an thah, keimah lâwng ka âwl, kei khawm thah an ka tum!” a ti.

¹¹LALPA nih a sinah, “Suak le, tlâng tlûnah ka mâika ah dîr,” a ti. Churawhchun LALPA chu a kiang ah a hawng lan le, thli chawp tatak a hawng rângtir le, tlâng tla â seu le, lungpi tla â khuai; sikhawmsele LALPA chu thli lakah a um lo. Thli a râng mi chu a bâng le, lî a hawng a nîn. Sikhawmsele lî â nîn mi lakah LALPA a um lo.

¹²Lî â nîn thluh rawh chun mei a hawng suak, sikhawmsele mei lakah LALPA chu a um lo. Mei nûnah chun hâu nêm dîk hen a hawng suak.

¹³Elija nih a theih rawh chun a kawrfual hen a mêl a huh le, a va suak le, pûk kâ ah a dîr. Hâu nih a sinah, “Elija, hinah hin zei na ti?” a ti.

¹⁴Anih nih a sâng le, “LALPA Pathian, zeizawng tikho, nangmah nâwl lâwng ka nan zulh kumza le, Israel lam nih chun an sinah thudân na tuk mi an buar le, na mâichâm tla an râwk le, na khuavâng tla an thah hep, keimah lâwng ka âwl le, kei khawm thah ding an ka awt,” a ti.

¹⁵LALPA nih, “Damaska kiangah mi ramkaro ah kîr le, khuapi ah va lût le, Siria lal rangah Hazael sariak va thuh le,

¹⁶Israel lalchem rang dingah Nimsi fapa Jehu sariak va thuh. Nangmah ruangrûl ah khuavâng si ding hen Abel Meholah khua mi Saphat fapa Elisa sariak va thuh.

¹⁷Hazael nih a thah awt mi ruang a suak mi zawng chu Jehu nih a thah lai. Jehu nih a thah awt mi lakah ruangsuaktu zawng chu Elisa nih a thah lai.

¹⁸Israel ram ah Baal mâika ah kûn lo mi leh a lem châwchawk lo mi ka lakah mi zumhkâi tla mi sâng sarih an dam rih,” a ti.

¹⁹Elija chu a suak le, Elisa nih chawchal rualpi hen phâisen an nâwn mi a muh na; a mâilei ah bawp leikhat an um, anih chu a madungchem mi nâwntu pakhat asi bâk. Elija nih a kawrfual a lît le, Elisa rangah a ruktir.

²⁰Elisa nih a chawchal a mâk thlap le, Elija rangah a ṭhâwl, “Ka nu leh ka pa rangah hawng ka châwchawktir tâ rih, chibai ka buk tâ na lai le, chu tikah na sinah ka hawng lai,” a ti. Elija nih a sâng le, “Si ta a, kîr ko, ka nan thloh loh!” a ti.

²¹Churawhchun Elisa chu a phâisen nâwnnâk chawchal leiah a kal le, a thah na le, a sâ a suang le, a nâwnnâk chu tih ding thing rangah a mang. Chu sâ tla chu mipi rangah a pêk na le, an ei. Churawhchun Elija rangah ṭangpitu ding hen a zûl rawh.