Read Bawm Chin 1 Lal 2 Bible Online

1 Lal 2 - Bawm Chin bible

1 Lal 2

¹David chu a thih a nâi rawh le, a fapa Solomon rangah a thu sîntirnâk madungchem a pêk.

²“Ka thihnâk ding a nâi rawh. Tumnâk leh lungumnâk,

³LALPA na Pathian nih ti ding thu a nan pêk mi lakah bir tak hen um rawh. Mosi Dân ah rîn mi a thupêk leh a dân thu zawzawng zûl le, chu tikah na kalnâk kipah thil zeizawng na ti mi kip chu tluang tak hen a um lai.

⁴Amah thu na zûl thlir mi asi chun LALPA nih thu a hawng ka pêk mi, na thlâk tla nih an thinlung leh an thlarau zawzawng hen ka thupêk tla an zûl mi asi chun an zûl kar vial chu Israel lakah lâirêlnâk chu tluang tak hen a kal vima lai ti a tiamh mi hâwi hen a ti ngelchel lai.

⁵“Thildang tla a um rih: Israel hotu panih, Ner fapa Abner, Jether fapa Amasa tla Joab nih a thah hen ka lakah thil a ti dân kha. Remnâk um liau chirah tuknâk ah thi rawh mi tla rangah phû a lam piak na mi kha theihkumza rawh. Thilsual tilo mi tla a thah na le, tuah kei nih chu thangsiat phurhnâk zawng chu ka ting hen ka tuar rawh.

⁶Hâwi thih dân ah thi lo ding hen a ti dân ding chu nangmah nih na theih ko.

⁷“Sikhawmsele, Gilead ram ah mi Barzilai fapa tla tlûnah chun na ṭhatnâk suah le, zauhkhenh na rawh. Na unaupa Absalom lakah ka tek liauah ka tlûnah vêl an nei ruangah.

⁸“Benjamin ram ah Bahurim khua mi Gera fapa Shimei khawm a um rih. Mahanaim ah ka kal liauah basiarthlâk hen hawlhsiat hawng ka barh. Sikhawmsele, Jordan Va ah hawng ka dawng le, LALPA min hen thah lo ding hen thu bir tak ka tiam rawh.

⁹Sikhawmsele, rêp lo hen chun siah lah. Ti ding dân chu nangmah nih na theih ko, thah ding asi leh silo nangmah nih na theih ko kha,” a ti.

¹⁰David chu a thi le, amah David khuapi ah an vûi.

¹¹Israel lakah kum sâwmli a lal, Hebron ah kum sarih lâi a rêl, Jerusalem ah kum sâwmthum leh kum thum lâi a rêl.

¹²Solomon chu a pa lalchem David mun a hawng luah le, a lal thiltikhonâk chu birhtir asi rawh.

¹³Churawhchun Haggith fapa Adonijah chu Solomon nu Bathsheba sinah a va kal le, Solomon nu nih chun, “Hâwi duh ngamh tlâk ruangah na hawng mi ma si?” a ti.

¹⁴Anih nih a sâng le, “Si ta a, thil zeimawh a nan deih ding ka nei,” a ti. Bathsheba nih, “Zei?” ti hen a deih.

¹⁵Adonijah nih, “Lalchem si ding hen kei hi Israel mi zawzawng nih an lungum ti na theih. Sikhawmsele dang tak hen thil a hawng um le, ka unaupa chu LALPA duhzia hen lalchem a hawng si rawh.

¹⁶Tuah thil ngiar ding pakhat ka nei; chu chu zângfahtê hen hawng ka êl piak rîlmâl lah,” a ti.

¹⁷Bathsheba nih, “Zei mesi?” a ti. Anih nih a sâng le, “Zângfahtê hen lalchem Solomon sinah Abishak, Shunem khua mi kha ka nupi rangah hawng ka deih piak, a êl ding hen ka ruat lo,” a ti.

¹⁸Anih nih a sâng le, “Ṭha ta a, lalchem chu ka nan sawnh piak lai ma chu,” a ti.

¹⁹Churawhchun, Bathsheba chu Adonijah ruangrûl ah lalchem sawnh ding hen a kal rawh. Lalchem Solomon chu a nu mâimûk ding hen a kûn. A laltophah lakah a to nawlh le, chun laltophah dang an hawng put le, chunah chun a nu a to.

²⁰A nu nih, “Thil metê pakhat na zângfahnâk ngiar ding ka nei, zângfahtê hen hawng ka êl piak lah,” a ti. Anih nih, “Zei me nu! ka êl lo ding mi chu?” ti hen a deih.

²¹Anih nih a sâng le, “Na unaupa Adonijah rangah Abishak hi umhpitir ko a nupi rangah,” a ti.

²²Lalchem nih, “Zeirangah Adonijah nupi rangah Abishak cho na hawng ka deih, laltophah khawm hi amah rangah deih sih ko me, chu lâwng khawm silo hen anih chu ka upa asi le, bâwlpu Abiathar leh Joab khawm amah lei ṭângṭawm an silo mazei?” a ti.

²³Churawhchun Solomon nih LALPA min hen thu bir tak a tiam, “Hi hi Adonijah nih hawng ka deih ruangah a nungnâk ka veih lo bâk chun Pathian nih hawng ka thah thlo seh!

²⁴LALPA nih chun ka pa laltophah ah bir tak hen hawng ka toh le, a thutiam chu zulh hen kei leh ka thlâk tla rangah lalram chu hawng ka pêk rawh. LALPA a nung mi min sal hen ka tiam, tusûn ni ngelchel ah Adonijah chu a thi ding asi,” a ti.

²⁵Churawhchun lalchem Solomon chu Benaiah chu thu a pêk le, anih chu a va kal le, Adonijah chu a thah rawh.

²⁶Churawhchun lalchem Solomon nih bâwlpu Abiathar sinah, “Na ram leiah Anathoth khua mi na in leiah va kal, thi tlâk na si le, sikhawmsele tu chun kan thah awt lo, ka pa David sinah na um liauah LALPA Thudântuk Bâwm kilkâwitu na si ruangah leh a lawksawngnâk ah lawksawngpitu na si ruangah,” a ti.

²⁷Churawhchun lalchem Solomon nih Abiathar bâwlpu sinâk chu a bângtir rawh. Eli dâwngsung leh a thlâk tla Siloh khua mi LALPA nih a sim hâwi hen a hawng tlung rawh.

²⁸Joab nih chu hâwi hen thil a hawng um mi tla chu a theih. (Anih chu Absalom ṭangpi lo hen Adonijah ṭangpitu asi.) Churawhchun LALPA Puanin leiah tek hen mâichâm ki chu a va tleih.

²⁹Lalchem Solomon nih Joab chu a tek le, Puanin ah mi mâichâm kiangah a um mi thu a theih rawh chun, Joab sinah zeirangah mâichâm leiah a va tek ti thu deih ding hen mi a fial. Joab nih, “Lalchem Solomon ka ṭih ruangah,” ti hen a sâng. Churawhchun lalchem Solomon nih Joab thah ding hen Benaiah a fial.

³⁰Benaiah chu LALPA Puanin leiah a va kal le, Joab sinah, “Lalchem nih hawng suak seh a nan ti,” a ti. Joab nih a sâng le, “Ka suak awt lo, hinah ka thi awt,” a ti. Benaiah chu Joab thusim simh ding hen lalchem sinah a kîr nawlh.

³¹Solomon nih, “Amah nih a sim ziatê hen ti ko, thah le vûi. Chu tikah kei leh ka pa David thlâk dang tla âukhawm nih Joab nih sual lo thlo hen a thah na mi ruangah mawhnâk chu kanna lît lai rawh.

³²Joab nih chubang tla chu ka pa David theihlo hen a thah na ruangah rêpnâk a tawng mi asi. Joab nih amah ngâk a ṭha dauh mi minung panih Abner Israel kawrsen hotu leh Juda kawrsen hotu Amasa a thah na.

³³Chubang tla a thah na mi ruangah rêpnâk chu, Joab leh a thlâk tla tlûnah kumleza hen a tlung lai. Sikhawmsele LALPA nih chun David thlâk tla, a laltophah ah to mi tla dingchangnâk a pêk kumza na lai,” a ti.

³⁴Churawhchun Benaiah nih LALPA Puanin ah a um mi Joab chu a thah le, a umnâk leiah mâng ah an vûi rawh.

³⁵Lalchem nih Benaiah chu Joab ruangrûl ah kawrsen hotu ah a siam rawh, Zadok bâwlpu chu Abiathar mun ah a siah rawh.

³⁶Lalchem nih Shimei sinah mi a fial le, a sinah, “Hinah Jerusalem ah na rangah in sak le, chunah chun um le, a dangah kal lah.

³⁷Na suak hen Kidron Tiva lanh leiah na kal chun na thi ngelchel lai le, na thang a duai lai,” a ti.

³⁸Shimei nih a sâng le, “Bâwipa, a ṭha asi, na sim mi hâwi hen ka ti lai,” ti hen a sâng. Churawhchun Jerusalem ah sâwt ual a um.

³⁹Kum thum a vei nûnah Shimei to-aw panih chu Gath lal Maakah fapa Akis sinah an tek.

⁴⁰Shimei nih a to-aw panih chu Gath ah an um ti a theih le, a sanatung a timhtuah le, Gath ah mi Akis lal sinah va hâwl ding hen a kal rawh. Chunah chun a va tawng na le, in leiah a tlungpi na.

⁴¹Solomon nih Shimei thilti chu a theih le,

⁴²mi a fial le, a sinah, “LALPA min hen Jerusalem suaktâk lo ding hen thu kan tiamtir. Na suaktâk ni ni ah na thi lai ti ka nan simh, ka sim mi kha zûl ding na duh lo mu?

⁴³Chu hâwi mi lakah zeirangah na thutiam na buar hen ka thupêk na ngâilo zia?

⁴⁴Ka pa David lakah thilsual na ti mi zawzawng na theih ko asi. Chu na thilti ruangah LALPA nih a nan rêp awt.

⁴⁵Sikhawmsele, LALPA nih kei lam chu mal hawng ka sâwm lai le, David lalram chu zungzâl a birhtir kumza lai,” a ti.

⁴⁶Churawhchun lalchem nih Shimei thah ding hen Benaiah chu thu a pêk le, a thah rawh. Churawhchun Solomon chu thuneihnâk rangtling hen a um rawh.