Read Bawm Chin 1 Lal 20 Bible Online

1 Lal 20 - Bawm Chin bible

1 Lal 20

¹Siria lalchem Benhadad nih kawrsen zawzawng a pumh na le, lâirêltu dang sâwmthum panih nih rang leh kari tla hen an ṭangpi le, Samari ram an hual le, an nawr vima.

²Israel lalchem Ahab khuapi sungah mi sinah mi tla a fial le, “Lalchem Benhadad nih

³na tangka leh na ngûn, na nupi tla, na fa tla, an chak chem mi tla na pumpêk ding hen,” ti thu sim ding hen.

⁴Ahab nih a sâng le, “Ka lalpa, lalchem Benhadad sinah ka thilneih zawzawng chu a ting ding hen rem ka ti,” ti hen a simh.

⁵A nehnûnah Benhadad mifial dang thupêk dang put hen a hawng nawlh: “Ngûn tla, tangka tla leh na nunau tla leh na fa tla pêk ding hen thu ka nan chah le, pumpêk ding hen na tiam.

⁶Sikhawmsele tuah hotu ah ka siam mi tla, na lal in leh na rianṭuannâk in ah thilsung zeizawng lâk ding hen ka hawng fial na awt, chu chu thâituan tu tik dingah an hawng lai,” a ti.

⁷Lalchem Ahab nih ram lakah hotu zawzawng a kawh na le, an sinah, “Benhadad nih hawng kan râwk ding a duh le, ka nupi tla, ka fa tla leh ka ngûn leh tangka lâk ding hen thu hawng ka chah le, chu chu rem ka ti mi khawm nan theih asi,” a ti.

⁸Mi zapi ruitu tla nih an sâng le, “A thu rerêng ngâi piak lah; pêk khawm pêk lah,” an ti.

⁹Churawhchun lalchem Ahab nih Benhadad mifial tla chu a sâng na le, “Ka pu lalpa nih a hawng sim masa liau chun rem ka ti le, a veinihnâk lam chu rem ka ti kho lo rawh,” a ti. Mifial tla chu an kîr le,

¹⁰Benhadad nih thu dang a chah nawlh mi chu an hawngpi nawlh, “Na khuapi râwk ding hen minung tamtak tâwk rang hen ka hawng put lai le, an kut hen in saknâk ding lung tla an put hep lai, hi hi ka tilo mi asi chun pathian tla nih thi thlo hawng ka vuak seh! a ti,” ti hen an simh.

¹¹Lalchem Ahab nih a sâng le, “Kawrsen tak chu râltuk lîm nûnah â khâwng, tuk lânah silo hen, ti hen simh u,” a ti na.

¹²Ahab sângnâk chu Benhadad nih a minung tla leh lâirêlpitu tla hen puanin ah zû an din liau chirah a theih. Khuapi do ding hen a minung tla chu thu a pêk na le, churawhchun mah mun chiauah râl ṭang ding hen an kal rawh.

¹³Chu karah chun khuavâng pakhat lalchem Ahab sinah a kal le, a sinah, “Kawrsen rokual tak chu ṭih lah na le, tusûn ni ah nehtu sinâk ka nan pêk awt, churawhchun kei hi LALPA ka si ti na hawng ka theih lai. LALPA nih a ti,” ti hen a simh.

¹⁴Ahab nih, “Tuknâk ah âu nih a rui na lai?” a ti. Khuavâng nih a sâng le, “LALPA nih kawrsen tlangvâl bial khat ah lâirêltu tla nih a ho na ding asi,” a ti. Lalchem nih, “Murui lian chem tla chu âu nih a ho na lai rawh?” ti hen a deih. Khuavâng nih, “Chu lam chu nangmah na si,” ti hen a sâng.

¹⁵Churawhchun lalchem nih kawrsen tlangvâl tla bial khat tanglei mi chu a kawh na le, an ektê hen zanih leh sâwmthum panih an si. Churawhchun Israel kawrsen tla sâng sarih a kawh na.

¹⁶Râltuk chu Benhadad leh a mi tla sâwmthum leh panih an puanin ah zû an din liau chirah sûn ah an dawmh rawh.

¹⁷Ahab kawrsen tlangvâl tla an kal masa le, an do na. Benhadad nih zauh thlingthlâktu kawrsen tla a fial mi tla nih Samari thawk hen mi tla an hawng ti hen an simh.

¹⁸Benhadad nih, “Do ding hen ma an hawng ah, remnâk thu sim ding hen mawh an hawng ah, a nung hen hawng put na u,” ti hen thu a pêk na.

¹⁹Tlangvâl kawrsen tla nih tuknâk mâi an ruai le, Israel kawrsen tla nih an hawng zulh na.

²⁰Anmah do mi chiau an thah na. Israel tla nih an do na le, Siria mi tla chu an tek le, Benhadad chu rang kêng tlûnah â chuan le, a tek; rang tlûnah chuan mi tla dang zeimaw mi nih an zûl.

²¹Lalchem Ahab nih phâisen chu a lâk le, rang leh kari tla a lâk. Siria ram ah nehnâk fâk tak a um.

²²Churawhchun khuavâng chu lalchem Ahab sinah a kal le, a sinah, “Kîr le, na murui tla timhtuah le, thiamthih tak hen thilti le, Siria lal nih kum vei fûr a tlâk tikah an do nawlh awt,” a ti.

²³Lalchem Benhadad minung tla nih a sinah, “Israel Pathian tla chu tlâng pathian an si; churuangah hawng kan neh mi asi. Sikhawmsele phâi ah kan do na chun kan neh nget lai.

²⁴Tuah lâirêltu sâwmthum leh panih tla hi thupêktu an sinâk phelh na le, ram pumpi ah thupêktu tla an rûlah siah na.

²⁵Kawrsen tla a lânah mi zat, kari leh rang tla zat cho hen pumh na, Israel tla chu phâi ah kan do na lai le, chu tikah kan neh nget na lai rawh,” an ti. Lal Benhadad nih rem a ti le, an simh hâwi hen a ti rawh.

²⁶A kum nawlh ah tifûr a tlâk rawh chun a kawrsen tla a pumh na le, Israel tla do ding hen Aphek khuapi ah an kal.

²⁷Israel tla chu anna kawh le, anna timhtuah rawh; an suak le, Siria tla lei hawi hen murui nih ah anna suah le, an hual na rawh. Siria tla ram lakah anna dar mi ruat chun Israel tla chu kêl rual nih tâwmtê hâwi cho an si.

²⁸Khuavâng pakhat lalchem Ahab sinah a va kal le, “Hi hi LALPA thusim chu asi: ‘Siria tla nih kei chu phâi pathian silo hen tlâng pathian ah an ka ruat, an kawrsen rualpi nehtu ah ka nan siam awt, nang leh na mi tla nih LALPA ka si ti an theih lai,’” a ti.

²⁹Ni sarih kar chu khatlei khatlei emhtawnh hen an riakmun ah an um ko. A ni sarih ni chun tuknâk an dawmh le, Israel tla nih Siria tla chu nuaikhat an thah.

³⁰An thah bang chu Aphek khuapi ah an tek le, khuapi kulh a chim mi nih sîng nih leh sâng sarih a denh na. Benhadad chu a tek le, khuapi sungah in kardang sungah â thup.

³¹A rianṭuantu an va kal le, a sinah, “Israel lalchem tla chu thungâi mi an zângfah ti kan theih. Israel lal sinah hawng kan kaltir le, kan tâi salâpuan hen a sâwm hen kan ngâwng ah rirual kanna awih lai le, na nungnâk hi zuah asi lai mawh,” an ti.

³²Churawhchun salâ hen an tâi an sâwm le, an ngâwng ah rirual anna awih le, lalchem Ahab sinah an va kal le, a sinah, “Na to-aw Benhadad nih nungnâk zuah ding hen a nan ngiar asi,” an ti. Ahab nih a sâng le, “A dam ko rih mu? A ṭha asi, kei rangah chun unau asi!” a ti.

³³Benhadad rianṭuantu tla nih, Ahab nih a sângnâk ding chu an ngâi châng ko le, Ahab nih, “Ka unaupa” a ti rawh chun, ti tatak ding hen an ruat sawm le, “Na sim hâwitê hen na unaupa asi ngâk ma chu!” an ti. Ahab nih, “Ka sinah hawngpi u,” ti hen thu a pêk. Benhadad a hawng rawh chun a sinah kari lakah a chuantir.

³⁴Benhadad nih a sinah, “Kapa nih na pa sin thawk hen a lâk mi tla ka nan pêk nawlh lai le, ka pa nih Samari ram ah a ti mi hâwi hen Damaska ah na rangah sawhlehnâk munlai chem ah na siam kho lâi,” a ti. Ahab nih a sâng le, “Tuhin ka nan suah lai,” a ti. Remnâk an siam le, a kaltir rawh.

³⁵LALPA thupêk hen khuavâng rual lakah a hâwi khuavâng pakhat sinah, “Hawng ka vuak,” a ti.

³⁶Sikhawmsele, a duh lo le, a sinah, “LALPA thupêk na ngâi lo ruangah na ka kaltâk kâ hen chakeibaknei nih a nan seh lai,” a ti. A kaltâk kâ hen chakeibaknei a hawng le, a seh rawh.

³⁷Chu khuavâng ber chu midang sinah a va kal le, a sinah, “Hawng ka vuak,” a ti. Chu minung nih chun a fâk kho ri hen a vuak le, a ngawrtir thlo.

³⁸Chu khuavâng chu puan hen a mêl a tuam le, mêl dang tak put hen a tuah le, Israel lalchem kalnâk dingah a va dîr.

³⁹Lalchem a hawng hen a kiangah a kal liauah khuavâng nih a kawh le, a sinah, “Bâwipa, râldo hen ka um le, kawrsen pakhat nih mêlma tleih mi ka sinah a hawngpi le, ‘Hi minung hi vêng; a suak ving chun a ruangrûl ah na nungnâk pêk ding asi lai, asi lo leh tangka sâng thum na châwi ding asi,’ a ti.

⁴⁰Sikhawmsele thil dang dang lakah ka nawk ruangah chu minung chu a suak ving,” a ti. Lalchem nih a sâng le, “Nangmah rêpnâk thu na sim mi ma kha, rêp hen na um ding asi,” a ti.

⁴¹Khuavâng nih a mêl puan khuh chu a awng le, lalchem nih khuavâng asi ti a theih sawm.

⁴²Khuavâng nih lal sinah, “Hi hi LALPA thu asi, ‘Thah ding hen thu ka nan pêk mi minung na suah ruangah a ruangrûl ah na nungnâk na pêk ding asi, a kawrsen tla an suah na ruangah na kawrsen tla khawm veih asi lai,” a ti.

⁴³Lalchem chu Samaria leiah ngaihsia leh zûr bû hen a kîr rawh.