Read Bawm Chin 1 Lal 21 Bible Online

1 Lal 21 - Bawm Chin bible

1 Lal 21

¹Jezreel ah mi Ahab in kiangah Naboth grep dûm a um le,

²ni khat chu Ahab nih Naboth sinah, “Ka in hen a naih thlo ruangah na grep dûm hawng ka pêk, thlâi zeizawng chîngnâk dingah ka duh; a ruangrûl ah grep dûm ṭha dauh ka nan pêk lai, asi lo leh a man na ti chun a tlâk zat ka nan pêk lai,” a ti.

³Naboth nih a sâng le, “Hi grep dûm hi hawng ka thlâktu ro ka ting mi asi; a nan pêk ding hen LALPA nih rem a ti lo!” a ti.

⁴Ahab chu Naboth thusim ruangah thinthawk leh lungsilo hen in leiah a lâwi. A ihkhun ah vân lei hawi hen a it le, buh khawm a ei lo.

⁵A nupi Jezebel chu a sinah a va kal le, a sinah, “Zeirangah ti ti lawksawng hen buh na ei lo?” ti hen a deih.

⁶Anih nih a sâng le, “Ka sinah Naboth thusim ruangah asi, a grep dûm châwk ding hen ka deih le, na duh mi asi chun a ruangrûl ah grep dûm mun dang khawm ka nan pêk lai ka ti le, na ting kho lai lo a hawng ka ti,” a ti.

⁷Jezebel nih, “Asi, Lalchem na si lo ma? Ihkhun ah mi thawk, lâwm tak hen um le, buh ei; Naboth dûm chu kan tawng piak lai ma hi a!” a ti.

⁸Jezebel nih lasuikuat a rîn le, Ahab min a deh le, Jezebel khua mi ruitu leh lal rianṭuantu tla sinah a kuat na.

⁹Chu lasuikuat lakah chun, “Zapi tla pumh na ule, buh ngei thu phuang u, chun Naboth kha mun zahkâi tingtir u.

¹⁰Mirualo nupa Pathian leh lal siatbarhtu ti hen mawhtir ding hen. Khuapi lênglei ah suah ule, lung hen thi thlo hen seh u, ti hen a rîn.

¹¹Jezreel khua ah ruitu tla leh lal rianṭuantu tla nih Jezebel thupêk hâwi hen an ti rawh.

¹²Buh ngei ding thu an phuang le, mi zapi an pumh na le, Naboth rangah chawnglawmhnâk mun an pêk.

¹³Chu mirualo panih chu zatlâng theih hen Pathian leh lal simsâwitu asi ti hen an phiar. Churuangah khuapi lênglei ah an suah le, lung hen thi thlo hen an seh.

¹⁴Chu thâwngthâng chu Jezebel an simh le, “Naboth chu thah asi rawh,” ti hen.

¹⁵Jezebel nih chu thu chu a theih kâ hen Ahab sinah, “Naboth chu a thi rawh, tuah na sinah zuar ding a siang lo mi grep dûm chu kal le, va a ting rawh,” a ti.

¹⁶Ahab chu mawhsareh hen ting ding hen a va kal rawh.

¹⁷Churawhchun LALPA nih Tishbe khua mi khuavâng Elija sinah,

¹⁸“Samari ram lalchem Ahab sinah va kal le, Naboth grep dûm â ting mi na muh lai.

¹⁹Kei LALPA nih a sinah ka simh asi, ‘Minung thah hen a neih na ting mu?’ ti hen. Hi thu ka sim mi va simh, ‘Ui tla nih Naboth thî an liaknâk mun lîlâ ah nang thî khawm an liak bâk lai!’” ti hen.

²⁰Ahab nih Elija a muh kâ hen a sinah, “Ka mêlmapa ka sinah na hawng mu?” a ti. Elija nih a sâng le, “Asi, ka hawng mahi! LALPA mitmuh hen thilsual ti ding hen na pumpêk ual ma kha!

²¹Churuangah hi hâwi hen LALPA nih a nan ti, ‘Na tlûnah siatnâk ka hawng tlungtir awt, na dâwngsung lakah mipa fa zawzawng ka veih phin lai, a upa ngâksia hen.

²²Ka thin na thawktir ruangah leh Israel tla thilsual na tipi na ruangah na dawngsungkhur tla chu Nebat fapa lalchem Jeroboam dâwngsungkhur hâwi hen leh Ahijah fapa lalchem Baasha dâwngsungkhur hâwi hen an um lai,’” a ti.

²³Jezebel thu chu LALPA nih hi hâwi hen a sim, “Ui tla nih Jezreel khua sungah a ruak an ei lai.

²⁴Na rualsia khua sungah thi mi zawzawng khawm ui tla nih an ei na lai le, ram lakah an thi mi chu langdâk tla nih an ei lai,” a ti.

²⁵(Ahab hâwi hen sualnâk lakah pumpêk tlaktu âukhawm an um lo; chu zawng fawrhtu chu a nupi Jezebel asi.

²⁶Israel mi tla an kalnâk kipah LALPA nih a nar na mi Amor tla nih an sawnh mi milem hen sual ningzakkâi a ti.)

²⁷Elija nih thu a sim thluh rawh chun Ahab nih a puan a thlêk le, a lawnh ving le, salâpuan â aih; buh khawm ei lo hen salâpuan aih hen a it le, lawksawng leh zûr hen â sawk mang.

²⁸LALPA nih khuavâng Elija sinah,

²⁹“Ka mâika ah Ahab â nâutir zia khi na muh ma? Hi hâwi hen a um rawh ruangah a tlûnah a dam kar vial chu siatnâk ka tlungtir awt lo, a fapa san ah a thlâk tla sinah ka tlungtir lai,” a ti.