Read Bawm Chin 1 Lal 6 Bible Online

1 Lal 6 - Bawm Chin bible

1 Lal 6

¹Israel mi tla nih Aigupta ram an suaktâknâk thawk hen kum zali leh sâwmriat nûnah Solomon nih Israel lâirêlnâk a kum linâk a thla nihnâk ah Ziv thla ah Solomon nih Pathian Biakin sak a dawmh.

²A in sung dung feet 90 a vâng feet 30 a sânglei feet 45 asi.

³A tualmâi kulh sung chu feet 15 thûk asi le, a vâng lei chu feet 30 mun thenhlimh hen a kauh lei â tia cho.

⁴Biakin vâm chu awng chia hen a um, a sung lei ngâk hen a lênglei a bî dauh.

⁵Biakin sîrlei leh dunglei ah Biakin lakah peh hen chuanh nei hen in pathum an sak. Chuanh mi in chu feet 7.5 tluk sâng hen sak asi.

⁶A tanglei chuanh ah kardang sung kip tla chu feet 7.5 kâu chiau asi, a lâiva chuanh chu feet 9 tluk kâu asi, a tlûn mi chuanh chu feet 10.5 kâu asi. Biakin tangphah tlûnah vâm chu a tang dauh mi vâm ngâk hen a pan dauh, a kân lo hen kardang chu a vâm lakah tleihtir kho ding hen.

⁷Biakin saknâk lung tla chu a chawhnâk mun ah siam chia ver asi, an sak kar zawng chu tukboh, reitlung leh thildang thîr ruakhâu sak hâu rerêng a um lo.

⁸A tanglei chem mi chuanh nei peh mi tualmâi chu Biakin simlei kângah a um. Chuanh nihnâk leh chuanh thumnâk kâinâk khawm chu leikângah a um.

⁹Churawhchun Lalchem Solomon nih Biakin chu a sak dih rawh le, a in tlûn tang chuanh leh a kân tla chu sidar thing phel ver asi.

¹⁰Peh mi in chuanh nei pathum tla chu, a chuanh sunglei kâng chu feet 7.5 chiau a sâng asi, chu chu Biakin vâm lênglei ah sak asi, sidar thing kân hen peh an si.

¹¹LALPA nih Solomon sinah,

¹²“Ka dân thu leh ka thupêk na zûl chun na pa David sinah thu ka tiamh mi zawzawng na rangah ka ti lai.

¹³Hi na sak mi Biakin ah hin ka mi Israel tla kan kaltâk na lai lo,” a ti.

¹⁴Churawhchun Solomon nih Biakin sak chu a lîm rawh.

¹⁵Vâm sunglei chu sidar thing phel hen khuh asi, a ṭuang lam chu far thing asi.

¹⁶Kardang sung chu Mun Thenhlimh Chem ti asi, chu chu Biakin sung mun ken chem asi. A dung feet 30 asi le, a kardangnâk chu sidar thing phel hen ṭuang thawk hen in tlûn tang chuanh tiang an sawng.

¹⁷Mun Thenhlimh Chem sangtu kardang chu feet 60 hen kâu asi.

¹⁸Sidar thing phel lakah ker hen chawmpâr leh a kukulul siam asi. A sunglei zawzawng chu sidar thing phel hep hen khuh asi, churuangah chun a vâm lung hen siam mi chu a lang kho lo.

¹⁹Biakin sung a ken leiah kardang an siam le, chunah chun LALPA Thudântuk Bâwm chu siah ding hen.

²⁰Chu kardang sung chu a dung a vâng kauhlei feet 30 asi, chu zawzawng chu ngûn karo hen luanh mi asi. Chu mâichâm chu sidar thing phel hen khuh asi.

²¹Biakin sunglei chu ngûn hen luanh mi asi, tualmâi leikâng kardang sungah ngûn chikchîn tla a khang hen zam asi, chu chu ngûn hen luanh mi asi.

²²Biakin sunglei zawng chu ngûn hen luanh asi, Mun Thenhlimh Chem ah mi mâichâm khawm ngûn hen luanh mi asi.

²³Thilsiam tla thla panih chu oliv thing hen siam mi asi, chu chu Mun Thenhlimh Chem ah an siah, a sânglei feet 15 vevê asi.

²⁴An lian lei leh an mêl â bang cho. Thla panih an nei vevê, an thlâ chu feet 7.5 tluk hen a sâu vevê asi, churuang chun anna lât dân chu feet 15 tluk a lât mi chu an thla â tawng thap.

²⁷Mun Thenhlimh Chem ah khatlei sîr mâitawnh hen an siah na, an thlâ an hawng zâr vevê mi nih a kardang sung a lâi ram zâwnah a tawngh thap kho ding hen. Chun an thla panih dang nih vâm a tawngh.

²⁸Chu thilsiam an thla panih chu ngûn hen luanh mi asi.

²⁹Kardangpi vâm tla leh a kardang sung zawzawng chu thilsiam thla lem, tûm thing lem, chawmpâr tla lem ker hen thuamh mi asi.

³⁰A ṭuang tangphah khawm ngûn hen luanh mi asi.

³¹Mun Thenhlimh Chem kawtkâ chu oliv thing thuang nih hen siam mi asi, kawtkâ tlûnlei chu ker mi asi.

³²A inkhâr lakah chun thilsiam thla lem tla ker mi leh siam mi tûm thing leh chawmpâr tla chu ngûn hen luanh asi.

³³Chu kardangpi inkhâr chu oliv thing kil li hen siam mi asi.

³⁴Inkhâr panih thlep mi chu far thing hen siam mi asi.

³⁵Thilsiam thla lem ker mi leh tûm thing leh chawmpâr lem tla khawm chu ngûn hen luanh mi asi.

³⁶Biakin tualmâi leiah chun kulh an siam le, vâm hen an kulh le, sidar thing kân pakhat nih a thângnâk lung pathum vima a nei.

³⁷Solomon nih lâi a rêlnâk thawk hen a kum linâk, thla nihnâk Ziv thla ah Biakin lungphûm chu dawmh asi.

³⁸A thla riatnâk Bul thla Solomon lâirêl a kum leikhatnâk ah ruat mi hâwitê hen Biakin chu dih ver asi rawh. Solomon nih a sak kum sarih â tâwk.