Read Bawm Chin 1 Lal 8 Bible Online

1 Lal 8 - Bawm Chin bible

1 Lal 8

¹Lalchem Solomon nih chun Israel phun lakah ruitu tla chu Jerusalem, David khuapi Zion ah mi LALPA Thudântuk Bâwm Biakin ah kalpi ding hen a kawh na.

²Ethanim thla Basâ Kût sung chun an ektê hen anna pûm hep.

³Ruitu tla zawzawng an ektê hen anna pûm hep rawh chun bâwlpu tla nih chun Thudântuk Bâwm chu an châwi le,

⁴Biakin leiah an zawnh rawh. Levi tla leh bâwlpu tla nih chun LALPA umnâk Puanin leh a thilthuam zawzawng chu Biakin ah an ṭhinh rawh.

⁵Lalchem Solomon leh Israel mipi zawzawng tla chu LALPA Thudântuk Bâwm mâika ah anna pûm le, ran tla leh dawrâ tla tamtak hen anna bâwl; a tam zia chu rêl châwk asi lo.

⁶Bâwlpu tla nih Thudântuk Bâwm chu Biakin ah an lûtpi le, Mun Thenhlimh Chem thilnung thla tangah an siah.

⁷An thla an zâr mi nih Thudântuk Bâwm leh zawnhnâk fung khawm a khuh dep.

⁸Mun Thenhlimh Chem mâika zâwnah zauh chun a zawnhnâk fung pâr chu muh kho asi; sikhawmsele mun dang thawk hen chun a lang lo. (Chu zawnhnâk fung chu tutiang a um ko.)

⁹Chu Thudântuk Bâwm sungah chun Mosi nih Sinai Tlâng ah Israel tla Aigupta ram thawk hen an hawng kal liauah LALPA nih thudântuk a pêk na mi rînnâk lungtlêp panih cho lo chu a sungah thil dang zeikhawm a um lo.

¹⁰Bâwlpu tla nih Biakin chu an hawng suaktâk rawh chun mawhsareh hen LALPA umnâk chu

¹¹chêu mit ser rê hen leh sûm hen a hawng khat chawlh; bâwlpu tla chu an rianṭuan ding hen an va lût nawlh kho lo rawh.

¹²Churawhchun Solomon nih thla a cham le: “LALPA, nang vân ah mi ni siamtu, sûm leh mûi lakah um na thîm.

¹³Tuhin na Pathian Biakin na rangah ka nan sak piak rawh, chu chu na rangah zungzâl umnâk si ding hen,” a ti.

¹⁴Mi zapi tla an hawng dîr pung rawh chun Lalchem Solomon chu anmah leiah â hawi le, an rangah Pathian sinah malsâwmnâk a deih piak na.

¹⁵Anih nih chun, “LALPA, Israel Pathian chu sawr hen um seh! Pathian nih ka pa David sinah a thutiam

¹⁶‘Aigupta ram ah mi ka suakpi na mi thawk hen Israel ram pumpi ah zei khuapi khawm an hawng ka sawnhnâk ding hen ka thîm lo. Sikhawmsele nang David lam chu ka mi tla lâirêl ding hen ka nan thîm asi,’” a ti.

¹⁷Solomon nih thu a sim vima le, “Ka pa David nih LALPA Israel Pathian sawnhnâk dingah Biakin sak a tum le,

¹⁸sikhawmsele, LALPA nih a sinah, ‘Ka rangah Biakin sak na duh mi hi na ti dik asi.

¹⁹Sikhawmsele, nang lam nih chun na sak lai loh. Nangmah sungsuak na fapa tak nih ka Biakin chu a sak lai,” a ti.

²⁰“Tuah LALPA nih a thutiam chu theihkumza hen ka pa ruangrûl ah Israel lalchem ka hawng si le, LALPA Israel Pathian sawnhnâk ding hen Biakin chu ka sak rawh.

²¹Chunah chun Thudântuk Bâwm, a sungah lungtlêp panih Aigupta ram thawk hen an hawng suak liauah hawng kan thlâktu tla sinah thudântuk a siam piak na mi rînnâk siahnâk mun chu ka ruat rawh,” a ti.

²²Mi zapi mâika ah Solomon chu a va kal le, mâichâm mâika ah a va dîr le, a bân a phar le, thla a cham:

²³“Israel LALPA leh Pathian, tlûnlei mi vân ah leh tanglei mi tual ah nang hâwi hi pathian dang âukhawm an um lo! An thinlung zawzawng hen na lakah ê-aw ngâi tak hen an um liauah chun thu na tiamh na mi hâwi hen an lakah na dâwtnâk na langh tâwn.

²⁴Ka pa David sinah na thutiam tla khawm na kil kumza; chubang thu zawzawng chu tusûn ni ah hin rangtlingtir asi rawh.

²⁵Tuhin, LALPA, Israel Pathian, ka pa David sinah, ‘Na thlâk tla nih ka lakah ê-aw an ngâi hen thiamthih tak hen ka thu an ngâi mi asi chun Israel tla lakah lalchem an si kumza lai’ ti hen na tiamh mi thu dang tla khawm theihkumza rawh.

²⁶Aw! Israel Pathian, tuah, ka pa David, na to-aw sinah thu na tiamh mi chu thil zeizawng hawng dik tatak ngâk seh.

²⁷“Pathian, sikhawmsele nang chu tual tlûnah hin na um tatak kho awt mazei? Vân zawzawng khawm khi nang rang chun a bî tuk, kei sak mi Biakin châng chu nang rangah zeitin a kâu tâwk kho lai?

²⁸LALPA, ka Pathian, kei chu na to-aw ka si. Ka thlachamnâk hi hawng ka ngâi piak le, tusûn ni ah thil ka nan ngiar mi hi hawng ka sâng piak rawh.

²⁹Hi sawnhnâk ding mun na thîm mi hi a sûn a zân hen zauhkhenh rawh. Hi lei hawi hen thla ka cham zâwnah hawng ka ngâi piak rawh.

³⁰Kei leh na mi tla nih hi mun lei hawi hen thla kan cham chun hawng kan ngâi piak. Na umnâk vân in thawk hen hawng kan ngâi le, hawng kan ngaihdam.

³¹“Mi âuzawng sual lo na hen thilsual titu ah an puh hen na Biakin ah siattleih ding hen an hawngpi chun,

³²LALPA, nangnih vân thawk hen hawng ngâi le, na to-aw tla lâi hawng rêl piak na. Misual chu a thilti hâwi hen rêp le, thilsual ti lotu chu âwltir rawh.

³³“Na mi Israel tla chu thilsual an ti ruangah mêlma tla nih an neh na hen, nangmah leiah an hawng hawi hen hi na Biakin ah an thinlung nâu tak hen na ngaihdamnâk an ngiar chun

³⁴vân thawk hen nangnih ngâi piak na rawh. Na mi tla sual chu ngaihdam na le, an thlâk tla, na pêk na mi ram ah hawng kîrpi nawlh na.

³⁵“Na mi tla nih na lakah thil an sual ruangah ruah na sûrtir lo hen, annih nih rim hen hi Biakin lei hawi hen thla an hawng cham tikah chun vân thawk hen ngâi piak na.

³⁶Lalchem leh Israel mi tla sualnâk tla chu ngaihdam na, thil dik ti ding hen sîntir na. Churawhchun LALPA, hi ram, na mi tla tâ si kumza ding hen na pêk mi ah hin ruah sûrtir rawh.

³⁷“Ram lakah pâm a tlung hen, râi a lêng hen mawh, mîm-le-fâng â râwk hen mawh, khâubawk a tlung hen mawh, an mêlma tla nih an do na hen mawh, nganfâk râi a tlung hen mawh, an lakah damlo mawh an tawng chun an thlachamnâk ngâi piak na.

³⁸Na mi Israel tla lakah thinlung fâk taknâk nei hen hi Biakin lei hawi hen bân phar hen thla an hawng cham chun,

³⁹vân ah mi na in thawk hen ngâi piak na le, ngaihdam na le, ṭangpi na. Nang cho nih minung thinlung dawnnâk na theih. An thilti hâwi vima hen rêl piak na le,

⁴⁰chu tikah hawng kan thlâktu tla sinah na pêk na mi ram ah an um kar vial chu na mi tla nih na thu an ngâi khonâk ding hen.

⁴¹“Ramdang mi minung, ram lât takah um mi minung nih na minthang zia leh na mi tla rangah thil rokual na ti mi an theih hen nangmah sawnh ding hen hi Biakin ah an hawng chun,

⁴²

⁴³an thlachamnâk chu ngâi piak na. Na mi Israel tla nih an ti mi hâwi hen zei se ti piak ding hen a nan deih, na umnâk vân thawk hen ngâi piak na, laikulh mi zawzawng nih na thu an ngâi khonâk ding hen; chu tikah hi Biakin ka sak mi hi nangmah sawnhnâk in asi ti an theih lai.

⁴⁴“Na mi tla râldo ding hen na fial tikah, an umnâk zei mun zawngah hi na thîm mi khuapi leh na rangah ka sak mi Biakin leiah thla an cham chun an thlachamnâk chu

⁴⁵vân thawk hen ngâi piak na le, nehnâk pêk na.

⁴⁶“Na mi tla nih thilsual an ti hen pakhat khawm âk lo hen an sual chun, nangnih na thinthawk ruangah an mêlma nih neh hen, ram dang lât takah na tângtir na khawmah,

⁴⁷na mi tla thlachamnâk ngâi piak na rawh. Sal ah kalpi hen an umnâk ram ah an sual tla an phuang hen an rim chun an thlachamnâk ngâi piak na rawh LALPA.

⁴⁸Chu ram ah chun, dik tak leh zumhkâi tak hen an rim hen, hi ram, hawng kan thlâktu rangah na pêk na mi, hi khuapi na thîm mi leh hi Biakin na rangah ka nan sak piak mi leikâng hawi hen na sinah thla an cham chun,

⁴⁹an thlachamnâk ngâi piak na rawh. Na umnâk vân in thawk hen ngâi piak na le, an lakah khuaruat rawh.

⁵⁰Na tlûnah hel hen an sualnâk zawzawng chu ngaihdam na le, an mêlma tla chu an lakah vêlnei tak hen siam na.

⁵¹Nangmah mi tak, Aigupta ram mei humpi lakah na lâk na mi an si.

⁵²“LALPA rokual, Israel mi leh an lalchem chu sunhsak tak hen zauhkhenh le, zeiliau zawngah ṭangpi deih hen an auh chun an deihnâk chu sâng piak na.

⁵³Na to-aw Mosi mang hen hawng kan thlâktu tla Aigupta ram ah mi na suakpi na liauah na simh na mi hâwi hen mi zawzawng lakah mi nangmah tâ ê si ding hen na thîm na mi an si,” a ti.

⁵⁴Solomon nih LALPA sinah thlacham â lîm rawh chun, mâichâm kiangah a bân phar hen a siksidîrnâk mun ah chun a dîr rawh.

⁵⁵Hâu fâk tak hen chunah mipi anna pûm mi rangah malsâwmnâk Pathian sinah a deih piak na. Anih nih chun,

⁵⁶“LALPA nih thu a tiamh mi hâwi hen a mi tla rangah thlangamnâk a pêk ruangah amah chu sawr hen um seh. A to-aw Mosi mang hen a thutiam tamtak tla chu a theihkumza.

⁵⁷Hawng kan thlâktu tla sinah a um hâwi hen LALPA kan Pathian chu kan sinah um seh; hawng kan nawng hen hawng kan kaltâk lah seh.

⁵⁸Amah ê-aw ngâi ding hen hawng kan siam seh. Chu tikah amah nih hawng kan duhzia hen kan um kumza lai le, hawng kan thlâktu sinah dân leh thupêk hawng kan pêk mi chu kan zûl kumza lai rawh.

⁵⁹Zeiliau zawngah LALPA kan Pathian nih hi bang ka thlachamnâk leh a sinah ka deih mi tla hi theihkumza seh. An nisiar thil herh hâwi hen Israel leh an lalchem tlûnah khuaruat kumza seh.

⁶⁰Churawhchun laikulh phun zawzawng nih LALPA Pathian cho lo chu a dang âukhawm an um lo ti an theih lai.

⁶¹Nannih a mi tla, LALPA kan Pathian lakah zumhkâi hen um kumza ule, tusûn ni ah nan ti hâwi hen a dân leh a thupêk chu zûl kumza u,” a ti.

⁶²Churawhchun lalchem Solomon leh mi zapi zawzawng nih LALPA sinah bâwlnâk an ap rawh.

⁶³Kawmhnâk bâwlnâk rangah chawchal 22,000, dawrâ 120,000 an ap. Chu hâwi hen lalchem leh zapi zawzawng nih Biakin chu an ap rawh.

⁶⁴Chu ni ah chun a kulh sung tualmâi kiangkam khawm Solomon nih Pathian sinah a ap le, a ektê hen duahnâk bâwlnâk sangvut ap mi tla, remnâk thil ap rang dingah ran thâu tla a ap. Hi thil ap zawzawng rang dingah dâr mâichâm chu a mê tuk ruangah hi hi a ti mi asi.

⁶⁵Chu Biakin ah chun Solomon leh Israel mi zapi tla nih chun Basâ Kût puai chu ni sarih an mang. Chunah chun minung thungâi an tam le, marlei kângah chun Hamat Liamnâk ram thawk hen a hawng mi leh simlei kângah chun Aigupta ramri thawk hen hawng mi an si.

⁶⁶A ni riat ni ah chun Solomon nih mi zapi tla chu in leiah a tlungtir na rawh. LALPA nih a to-aw David leh Israel mi tla rangah mal a sâwm na ruangah Solomon rangah an ektê hen an sawr le, in leiah lâwm tak hen an tlung rawh.