Read Bawm Chin 1 Lal 9 Bible Online

1 Lal 9 - Bawm Chin bible

1 Lal 9

¹Lalchem Solomon nih Pathian Biakin leh a lal in leh thil zeizawng sak ding a duh mi a lîm rawh nûnah chun,

²Gibeon sinah â langh mi hâwi hen LALPA chu a sinah â langh nawlh.

³LALPA nih a sinah, “Na thlachamnâk chu ka theih asi. Hi Biakin hawng ka sawnh kumzanâk ding mun rangah na sak mi chu ka thenhlimhtir rawh. Zeiliau zawngah ka kil hen ka hum lai.

⁴Na pa David nih a ti mi hâwi hen ka nâwl na zulh chun thu ka nan pêk mi zawzawng leh ka dân thu tla khawm na zûl chun,

⁵Israel tla lakah na thlâk tla nih lâi an rêlnâk chu a um kumza lai ti hen na pa David sinah ka thutiam chu ka theihkumza lai.

⁶Sikhawmsele nangmah mawh na thlâk tla nih an ka zûl duhlo hen ka thupêk leh ka dân thu an ngâilo hen pathian dang tla nan sawnh chun,

⁷Israel mi tla rangah ram ka pêk na mi thawk hen ka nar na awt. Keimah sawnhnâk dingah hi Biakin ka thenhlimhtir mi khawm hi ka kaltâk lai. Mun kip mi nih Israel tla chu siarlo tak hen an zauhnawmh na lai.

⁸Hi Biakin khawm hi siat leh râwk hen a um lai le, a paltu zawng nih lâu khit hen chê an ti lai. ‘Zeirangah hi ram leh Biakin tla hi hâwi hen a ti zia,’ ti hen anna ruah lai.

⁹Midang nih anna thawh lai le, Aigupta ram thawk hen anmah suahtu an kaltâk le, pathian dang tla tlâinâk nei hen an sawnh na ruangah asi: LALPA nih siatnâk leh râwknâk a tlungtir mi hi,’” an ti lai.

¹⁰Solomon nih Biakin leh a lal in a sak sung zawzawng kum kul â tâwk.

¹¹Tura lalchem Hiram nih chubang rang dingah a herh mi zawng sidar leh far thing tla, ngûn tla lalchem Solomon rangah a pêk. Zeizawng a lîm rawh chun Solomon nih Hiram rangah Galili ram ah mi khuapi kul a pêk.

¹²Hiram chu va zauh ding hen a kal le, khawmsele a duh lo.

¹³Churawhchun Solomon sinah, “Unaupa, hi bang tla hi bei khua na ka pêk mi chu?” a ti. Churuangah chu ram chu Kabul an ti kumza.

¹⁴Hiram nih Solomon rangah ngûn a dang kilogramme sâng li ngâk a tam a pêk.

¹⁵Lalchem Solomon nih a thuneihnâk hen rianṭuantu tla chu a Biakin leh lal in tla sak ding hen khuapi sak leikâng tla, khuapi kulh tla a siam tir na. Razor, Megido, leh Gezer khuapi tla sak thar nawlh ding hen a mang na.

¹⁶(Aigupta lalchem nih Gezer chu a do le, a lâk, a sungah mi tla chu a thah na le, khuapi chu a duah hep; a fanu Solomon nih a umpi mi rangah lâwmman a pêk le,

¹⁷Chu chu Solomon nih a sak thar nawlh mi asi.) Solomon nih rianṭuantu ah a mang na mi tla rangah Beth Horon Tanglei,

¹⁸Baalat, Judai ramkaro mi Tamar,

¹⁹a thil siahnâk khuapi tla, a rang siahnâk khuapi tla, a kari siahnâk tla, leh thil dang zeizawng Jerusalem ah Lebanon ah sak ding a duh mi zawzawng tla leh a ram sung mun kipah a duhnâk mun kipah a saktir na.

²⁰Lalchem Solomon nih rianṭuantu rang dingah a siam na mi chu Kanaan mi thlâk tla, Israel tla nih an ram an lâk liauah an thah na lo mi tla an si. Chubang tla lakah chun Amor, Hit mi, Periz mi, Hiv mi leh Jebus mi tutiang ah an thlâk sal ah an um mi tla chu an si.

²²Solomon nih Israel tla chu sal ah a siam na lo; kawrsen tla, hotu tla, thupêktu tla, a kari hotu tla, rang tlûnah to mi tla hâwi hen a rian an ṭuan piak.

²³Solomon nih rianṭuan dang dang ṭuantu murui hotu ah a siah na mi vial chu zanga leh sâwmnga an si.

²⁴Solomon nih khuapi saklei kâng mun chu Aigupta lalchem fanu a umpi mi rangah in a sak mi chu David khuapi ah silo hen mun dangah a sak.

²⁵Solomon nih kum khat sungah duahphung leh kawmhnâk thil ap tla chu LALPA mâichâm a siam mi lakah veithum a ap. LALPA sinah rimthâw tla a duah. Churawhchun Biakin chu a lîm rawh.

²⁶Lalchem Solomon nih Edom ram ah Agaba tisumsumriat likâwlneng kap Elat kiangah mi Eziongeber ah lawng rual tla a siam.

²⁷Lalchem Hiram nih tipi ah lawng rianṭuantu tla lakah thiam mi chu Solomon minung tla ṭuanpi ding hen a fial na.

²⁸Ophir ram leiah an kal le, Solomon sinah ngûn kilogramme sîng khat leh sâng li an hawng put piak.