Read Bawm Chin 2 Lal 10 Bible Online

2 Lal 10 - Bawm Chin bible

2 Lal 10

¹Ahab thlâk tla Samari khua ah um mi tla chu sâwmsarih an si. Jehu nih lasuikuat a rîn le, nah khat chu khuapi lâirêltu tla, khuapi ruitu tla leh Ahab thlâk vêngtu tla sinah a kuat.

²Chu lasuikuat lakah chun, “Nannih chu lal thlâk tla, rang kari tla, rang tla râlthuam tla leh kulhnei khuapi tla, zauhkhenhtu nan si. Churuang chun hi lasuikuat hi nan muh kâ hen

³lal thlâk tla lakah lal a tlâk chem ding mi thîm ule, amah chu vêng ding hen do u,” a ti.

⁴Samari khua lâirêltu tla chu thungâi an lâu. “Jehu chu zeitin kan do kho lai, lalchem Joram leh Ahaziah men nih an nehlo mi,” an ti.

⁵Lal in hotu leh khuapi lakah hotu, khuapi lakah ruitu leh khuapi vêngtu nih hi thuchah hi Jehu sinah an kuat: “Kannih chu na to-aw tla kan si le, na sim mi zawng ti ding kanna tîm kumza, sikhawmsele âukhawm lal ah kan siam awt loh, ṭha na ti zia zawng ti ko,” an ti.

⁶Jehu nih lasuikuat dang a kuat nawlh na: “Keimah leikângah ṭângṭawm mi nan si hen ka thu thu hen um nan tum mi asi chun lalchem Ahab thlâk tla lû thâizîng tutik dingah Jezreel ah hawng put u,” a ti na. Lalchem Ahab thlâk sâwmsarih tla chu Samari khuapi ruitu tla zauhkhenhtu hen an um.

⁷Jehu lasuikuat an muh rawh chun Ahab thlâk tla Samari ah an um mi sâwmsarih chu an thah hep le, an lû chu pâi lakah an khumh le, Jezreel ah Jehu sinah an kuat.

⁸Ahab thlâk tla lû chu an hawng tlungpi rawh ti Jehu rangah an simh le, anih nih chun khuapi kulh kawtkâ ah mun nih hen pawng hen thâi zînglei tiang siah ding hen thu a pêk na.

⁹A thâizîng ah Jehu chu kulh kawtkâ ah a kal le, chunah um mi tla sinah, “Kei lam chu lalchem Joram lakah hel hen thahtu ka si, nannih lam chu chu lakah nan mawh lo, sikhawmsele hi tla hi âu nih a thah na?

¹⁰Hi hi LALPA nih a sim mi ziatê hen Ahab thlâk tla lakah a hawng tlung taktê asi ti a lang fiang. LALPA nih khuavâng Elija mang hen thu a sim mi chu a ti taktê asi,” a ti.

¹¹Churawhchun Jehu nih Ahab rualsia Jezreel ah an um mi zawzawng leh a hotu ah a siam na mi tla, a hâwikawmh tla, bâwlpu tla a thah hep na le, pakhat khawm a zuah na lo.

¹²Jehu chu Jezreel ah mi a suak le, Samari ah a kal. Lampi ah “Dawrâpu tla Mun” an ti mi mun ah chun

¹³Juda lalchem Ahaziah rualsia zeimaw mi tla hen anna tawng le, “Âu me nan si?” ti hen a deih na. “Ahaziah rualsia tla kan si,” an ti. “Jezreel ah lalnu Jezebel fa tla leh lal dâwngsung tla chibai bûk ding hen kan kal mi asi,” an ti.

¹⁴Jehu nih a mi tla sinah, “Tleih na ule, a nung hen hawng put na u!” ti hen thu a pêk na. An hawng put na le, khur kiangah a thah na. An ektê hen sâwmli leh panih an si, pakhat khawm nung hen zuah mi an um lo.

¹⁵Jehu chu a thawk nawlh le, lampi ah Rekab fapa Jonadab hen anna tawng. Jehu nih chibai a bûk le, a sinah, “Nang leh kei chu kan thinlung ruat â bang cho, na hawng ka bawp lai ma?” a ti. Jonadab nih a sâng le, “Ka nan bawp lai ta a,” a ti. Jehu nih, “Asi chun na kut hawng ka pêk,” a ti. An kut anna sih le, Jehu nih kari sungah a lûtpi

¹⁶“Ka sinah hawng le, LALPA sinah ka pêk zia hi nangmah ngelchel nih hawng zauh,” a ti. Churawhchun Samari leiah an panih hen munkhat hen an kal rawh.

¹⁷An va tleng rawh chun Jehu nih Ahab rualsia zawzawng a thah hep na, pakhattê khawm a zuah na lo. Chu chu LALPA nih Elija sinah a sim mi hâwi hen a hawng tlung mi asi.

¹⁸Jehu nih Samari mi tla chu munkhat ah a pumh hep na le, an sinah, “Lalchem Ahab nih Baal pathian chu a sawnh ângthâng cho, kei lam nih chun chu ngâk zual hen ka sawnh awt asi.

¹⁹Baal khuavâng zawzawng, amah sawnhtu zawzawng leh a bâwlpu zawzawng, munkhat ka ah kawh ver na u. Âukhawm a phelhsawlh lah u; Baal sinah bâwlnâk rokual tak ka ap awt, chu lakah tello mi chu thah an si lai,” a ti. (Hi hi Jehu thiltum chu Baal sawnhtu zawzawng thah hep ding hen a perpet na mi asi.)

²⁰Churawhchun Jehu nih, “Baal chawnglawmhnâk ni asi,” ti phuang ding hen thu a pêk.

²¹Thu phuangnâk chu an nei le, Jehu nih Israel ram zawzawng ah thu a thanh rawh. Baal sawnhtu tla zawzawng chu âukhawm âk lo hen an hawng hep. Baal biakin ah an ektê hen an lût hep le, in an khat zat rawh.

²²Churawhchun thuam kiltu bâwlpu rangah Jehu nih kawrfual tla kha hawng put hen sawnhtu murui tla rangah pêk hep na ding hen thu a pêk.

²³chu nûn chun amah Jehu leh Jonadab chu biakin ah an va lût le, chunah um mi tla sinah, “Tuah Baal sawnhtu vial ma an um, LALPA sawnhtu an um dahmawh zauhfiang ver u,” a ti na.

²⁴Churawhchun amah leh Jonadab chu duahphung bâwlnâk chu Baal sinah an ap rawh. Lênglei ah minung sâwmriat a siah na mi sinah thu a tiamh zet na: “Hi minung zawzawng tla hi nan thah hep na ding asi, pakhattê khawm nan suah sual chun an ruangrûl ah nanmah thah nan si lai,” ti hen.

²⁵Jehu nih thil a ap dih kâ hen vêngtu tla leh hotu tla sinah, “Lût ule, thah hep na u; pakhattê khawm suah lah na u!” a ti na. An va lût le, nâmsâu hen an thah hep na le, an ruak tla chu lênglei ah an suah na. Chun, biakin sungril lei tla an lût le,

²⁶chunah mi an lungphun thenhlimh tla chu an suakpi le, an duah.

²⁷Chun, an zarh lungphun leh biakin chu an râwk le, êk in ah an siam; tusûn ni tiang hen a um rih.

²⁸Chu hâwi hen Jehu nih Israel ram ah Baal sawnhnâk tla chu a veih.

²⁹Sikhawmsele, lalchem Jeroboam nih ngûn chawchal tla Dan leh Bethel ah a tuah mi sawnh hen Israel tla sualnâk a titir na mi chu Jehu nih a châwng.

³⁰LALPA nih Jehu sinah, “Ti ding ka nan duh hâwi hen thil zeizawng Ahab thlâk tla lakah thil na ti le, churuangah na thlâk tla nih san li tiang Israel lakah lal si ding hen thu ka nan tiamh,” a ti.

³¹Sikhawmsele, Jehu nih LALPA Israel Pathian dân chu a thinlung zawzawng hen a zûl lo le, Jeroboam Israel tla sualtirtu zia a châwng dauh.

³²Chu liau chun LALPA nih Israel tla ram chu a zûktir. Siria lal Kazael nih Israel ram zawzawng a neh le,

³³Jordan saklei ah Amon Tiva mi Aroer simlei tiang; Gilead ram leh Basan ram zawzawng tla, Gad, Reuben phun umnâk leh Manaseh phun umnâk saklei tla khawm a neh hep.

³⁴Thil zeizawng a râlṭhatnâk hen Jehu nih a ti mi chu Israel lal thâwngthâng rînnâk bu ah rîn asi.

³⁵A thi le, Samari ah an vûi, a fapa Jehoahaz chu a ruangrûl ah a lal rawh.

³⁶Jehu Israel lalchem nih Samari ah kum kul leh kum riat lâi a rêl.